នេះជាហេតុការណ៍ដ៏ភ្ញាក់ផ្អើល និងអស់គួរឲ្យអស់សំណើចមួយ ខណៈដែលស្ត្រីម្នាក់ត្រូវជាប់ជើងម្ខាងនៅក្នុងចានបង្គន់ក្នុងស្ថានភាពបែបនេះ បន្ទាប់ពីចូលទៅ «បន្ទូរ» ភាពតានតឹង ។
ក្រុមពន្លត់អគ្គីភ័យ Yulin បានទទួលការហៅដ៏ចម្លែកមួយ កាលពីថ្ងៃអង្គារ ដើម្បីស្នើឲ្យពួកគេជួយស្ត្រីស្រវឹងស្រាម្នាក់ ដែលជើងរបស់នាងកំពុងត្រូវបានជាប់នៅក្នុងចានបង្គន់ នៅក្នុងផ្ទះរបស់នាង ស្ថិតក្នុងទីក្រុង Yulin តំបន់ស្វយ័តក្វាងស៊ី ប្រទេសចិន ។
ស្ត្រីរូបនេះបានរអិលជើង និងធ្លាក់ចូលក្នុងចានបង្គន់ ហើយជើងស្តាំរបស់នាងក៏ត្រូវជាប់ក្នុងប្រហោងចានបង្គន់ដកពុំរួចតែម្តង ។ គ្រូសាររបស់នាង ក៏បានព្យាយាមរំដោះជើងរបស់នាងចេញផងដែរ ប៉ុន្តែ ពុំអាចទៅរួចទេ ។ ពួកគេបានសម្រេចខលហៅសេវាសង្គ្រោះបន្ទាន់នៅវេលាម៉ោង ៣ និង ៣៨ នាទីព្រឹកថ្ងៃអង្គារ ដើម្បីជួយនាង ។
យោងតាមកាសែត Daily Mail បានឲ្យដឹងថា ក្រុមសង្គ្រោះបានមកដល់កន្លែងកើតហេតុ ក្នុងរយៈពេល ៦ នាទីក្រោយមក ហើយពួកគេបានប្រញាប់ជួយសង្គ្រោះស្ត្រីស្រវឹងនេះ ដែលកំពុងស្រែកយំជាខ្លាំង ខណៈជើងរបស់នាងពុំអាចដកចេញបែបនេះ ។
Beiing Youth បានរាយការណ៍ថា មុនពេលកើតហេតុ សមាជិកគ្រួសាររបស់នាង បានព្រមាននាងមិនឲ្យប្រើប្រាស់បង្គន់អង្គុយច្រហោងនេះ ខណៈពេលស្រវឹងទេ ប៉ុន្តែ នាងមិនស្តាប់ការណែនាំរបស់ពួកគេនោះទេ និងទីបំផុត ក៏ជួបស្ថានភាពដ៏អាម៉ាស់មួយនេះទៅ ។
ក្នុងវីដេអូបង្ហោះលើបណ្តាញសង្គមចិន ក្រុមសង្គ្រោះបានប្រើឧបករណ៍ជាច្រើន ដើម្បីបំបែកចានបង្គន់ប៉សឺឡែននេះ ដើម្បីរំដោះជើងរបស់នាង ។ ស្ត្រីនេះគ្រាន់តែរងរបួសស្រាលបន្តិចបន្តួចប៉ុណ្ណោះ ពីហេតុការណ៍ដ៏គួរឲ្យហួសចិត្តនេះ ៕ ចន្ទី
