ភ្នំពេញ៖ នៅព្រឹកថ្ងៃទី១ខែកក្កដា ឆ្នាំ២០១៨នេះ ធនាគារស្ថាបនាបានប្រារព្ធពិធីកាត់ខ្សែបូសម្ពោធជាផ្លូវការសាខាថ្មីរបស់ខ្លួនដែលមានទីតាំងនៅផ្សារ Aeon Mall សែនសុខ ស្ថិតនៅជាន់ទី២។ ជាមួយសាខាថ្មីនេះ ចំនួនសាខាសរុបរបស់ធនាគារ ស្ថាបនា កើនដល់១៦៩ នៅទូទាំងប្រទេស។
លោក Norihiko Kato ប្រធាននាយកប្រតិបត្តិធនាគារស្ថាបនា បានមានប្រសាសន៍ថា “នេះគឺជាព្រឹត្តិការសំខាន់មួយទៀត សម្រាប់ធនាគារស្ថាបនា។ សាខានេះ គឺជាសាខាដំបូងរបស់យើងដែលស្ថិតនៅក្នុងផ្សារទំនើបក្នុងប្រទេសកម្ពុជា។
យើងមានសេចក្តីសោមនស្សរីករាយក្នុងការណែនាំ នូវអត្តសញ្ញាណរបស់ធនាគារស្ថាបនា ជាមួយនឹងផលិតផល និងសេវាធនាគារសម្បូរបែប ដល់អតិថិជនទាំងអស់ ដែលអញ្ជើញមកទស្សនានិងទិញទំនិញនៅផ្សារទំនើប អ៊ីអន សែនសុខ ក៏ដូចជាអ្នករស់នៅជុំវិញទីតាំងនោះផងដែរ។
សាខា Aeon Mall សែនសុខនេះ នឹងផ្តល់នូវសេវាធនាគារពាណិជ្ជពេញលេញ មានដូចជា ជាប្រាក់កម្ចី ប្រាក់បញ្ញើ សេវាផ្ទេប្រាក់ក្នុងស្រុក និងក្រៅស្រុក និងហិរញ្ញប្បទានពាណិជ្ជកម្ម។
អតិថិជនក៏នឹងទទួលបាននូវអត្ថប្រយោជន៍ពីបុគ្គលិកជំនាញរបស់សាខា ក្នុងការជួយជ្រោមជ្រែងលើតម្រូវការហិរញ្ញវត្ថុរបស់ពួកគេផងដែរ។
លោក Norihiko Kato ក៏បានបញ្ជាក់ផងដែរថា “យើងនឹងខិតខំប្រឹងប្រែងបន្ថែមទៀត ដើម្បីឲ្យសេវាធនាគារកាន់តែមានភាពងាយស្រួល ភាពបត់បែន និងកាន់តែខិតជិតអតិថិជនរបស់យើង។ សាខា Aeon Mall សែនសុខនេះ ក៏មិនខុសពីសាខាផ្សេងៗទៀតរបស់ធនាគារស្ថាបនា ដែរគឺនឹងផ្តល់ជូនអតិថិជននូវសេវាធនាគារដ៏ល្អបំផុត”៕ ដោយ៖កូឡាប
