នេះបើតាមទំព័រហ្វេសប៊ុក តើការបើកបររបស់ខ្ញុំដូចម្តេចដែរ បានបង្ហោះខ្លឹមសារគួរឲ្យភ្ញាក់ផ្អើលថា «អីយ៉ូយ មន្ត្រីកិច្ចសន្យាឥឡូវពាក់អាវមានស្លាកសញ្ញា នប ដែរហើយតើនែក! ស្មានតែនគរបាលចរាចរណ៍ ឆ្ងល់ចុះហេតុអីមិនឃើញមានពាក់សក្តិលើស្មារ? តាមពិតល្បងអត់ក្របខ័ណ្ឌបន្លំភ្នែកធ្វើជានគរបាលចរាចរណ៍ទេតើ។ គោលដៅស្តុបវេងស្រេង កែងស្តុបទួលពង្រ ព្រឹកថ្ងៃទី ២៧-៥-២០២៣ ក្រុមនគរបាលចរាចរណ៍ក្រោមការគ្រប់គ្រងរបស់លោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ។ ចាំបាច់ក្លែងភេទចឹងធ្វើអី?»។
ជាក់ស្តែង តាមរយៈវីដេអូ បានបង្ហាញលោកមន្រ្តីជាប់កិច្ចសន្យាម្នាក់ បានឈរសម្ញែងរាង ជាមួយវ៉ែនតាខ្មៅឡើងហំ ខណៈភ្នែកចាំតែសម្លឹងមើលម៉ូតូឡានមានខុសប៉ុណ្ណោះ ជាជាងជួយសំរួលចរាចរណ៍។ អ្វីដែលកាន់តែគួរឲ្យហួសចិត្តទៀតនោះ គឺនៅពេលឃើញកាមេរ៉ាចាប់ពីក្នុងរថយន្ត ស្រាប់តែប្រញាប់ប្រញាល់ទាញក្រណាត់ឃ្លុំមុខជិតឈឹងតែម្តង។
គួរបញ្ជាក់ថា បើតាមការឱ្យនិយមន័យរបស់អនុក្រឹត្យស្តីពី «ការគ្រប់គ្រងវត្តមានរាជការស៊ីវិល និងមន្ត្រីជាប់កិច្ចសន្យា» ចុះថ្ងៃទី១ ខែមេសា ឆ្នាំ២០១៦ ចេញដោយសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានឲ្យដឹងថា មន្ត្រីជាប់កិច្ចសន្យា គឺសំដៅដល់មន្ត្រី «មិនមានក្របខណ្ឌរដ្ឋ» ដែលត្រូវបានជ្រើសរើសទៅតាមនីតិវិធីជាធរមាន ដើម្បីបម្រើការងារ ផ្អែកតាមការងារជាក់ស្ដែង និងចាំបាច់របស់ក្រសួងស្ថាប័នថ្នាក់ជាតិ និងថ្នាក់ក្រោមជាតិ។ ហើយមន្រ្តីជាប់កិច្ចសន្យាទាំងនោះ ក៏ទទួលបានប្រាក់ខែពីពី ៦០ ម៉ឺនរៀល ទៅ ៦៥ ម៉ឺនរៀល ផងដែរ។
ដោយឡែក ទាក់ទងរឿងចេញមកចាប់ផាកពិន័យនេះ ប្រជាពលរដ្ឋក៏ចង់ដឹងខ្លាំង និងសូមសួរទៅថ្នាក់លើថា តើមន្រ្តីជាប់កិច្ចសន្យាមានសិទ្ធិផាកពិន័យដែរ ឬទេ? ព្រោះបើមន្រ្តីនគរបាលចរាចរត្រឹមត្រូវ មិនមែនខ្លាចកាមេរ៉ា និងបិទបាំងមុខបែបនេះទេ!។ ទោះជាយ៉ាងណា ប្រជាពលរដ្ឋ គាំទ្រចំពោះការអនុវត្តច្បាប់ចរាចរណ៍ តែធ្វើម៉េចកុំអោយលុយចូលហោប៉ៅផ្ទាល់ខ្លួន៕ រក្សាសិទ្ធិដោយ៖ លឹម ហុង
