វីដេអូដែលបង្ហាញពីភាពស្មោះត្រង់របស់សត្វឆ្មា១ក្បាលចំពោះមិត្តរបស់វា ខណៈពេដែលវាព្យាយាមពាំយក «សាកសព» មិត្តភក្តិរបស់វាយ៉ាងលំបាក ទៅកន្លែងមានសុវត្តិភាព បានរីករាលដាលនៅលើបណ្តាញសង្គមរបស់ប្រទេសចិន ដោយបានទាក់ទាញភាពរំជួលចិត្ត ពីសំណាក់អ្នកលេងអ៊ិនធើណែតជាច្រើន ។
ខណៈពេលដ៏សង្វេកនេះ ត្រូវបានគេប្រទះឃើញនៅលើដងផ្លូវមួយកន្លែង ស្ថិតក្នុងស្រុក Songbei ទីក្រុង Harbin ខេត្ត Heilongjiang ប្រទេសចិន កាលពីថ្ងៃទី០២ កក្កដា ។ នេះបើយោងតាម Daily Mail ។
គេក៏ពុំដឹងថា សត្វឆ្វានោះងាប់ដោយរបៀបណានោះទេ ប៉ុន្តែ គេបានឃើញមិត្តភក្តិរបស់វា បានប្តេជ្ញាចិត្តមិនចាកចេញពីសាកសពរបស់វាទេ ដែលកំពុងដេកនៅលើដងផ្លូវមួយ នៃស្រុក Songbei ។
សត្វឆ្មាដ៏ស្មោះត្រង់នេះ ពិតជាបានព្យាយាមយ៉ាងលំបាក ដើម្បីនាំយកសាកសពមិត្តភក្តិរបស់វា ដោយឈប់លើកជាច្រើនដង ទម្រាំវានាំយកទៅដល់កន្លែងរថយន្ត១គ្រឿង និងសម្ងំលាក់ខ្លួននៅខាងក្រោមនោះបណ្តោះអាសន្ន ។
អ្នកមើលម្នាក់អាចត្រូវបានលឺនិយាយថា៖ «បងប្អូន មើលចុះ! សត្វឆ្មា១ក្បាលនេះ ពិតជាចេះណាស់ វាកំពុងព្យាយាមនាំយកសាកសពមិត្តភក្តិរបស់វា ចេញពីកន្លែងកើតហេតុ…» ។
ទោះយ៉ាងណា ឃ្លីបនេះបានបញ្ចប់ត្រឹមពួកវាទាំងពីរជ្រកក្រោមរថយន្ត១គ្រឿង ៕ ចន្ទី
