កាលពីវេលាម៉ោង១និង៥០នាទីរំលងអធ្រាត្រឈានចូលថ្ងៃទី១៦ ខែកក្កដា នេះ តារាចម្រៀងលោក ម៉ារ៉ា ប៊ុនណា បានជួបគ្រោះថ្នាក់ចរាចរណ៍បើករថយន្តបុកបង្កាន់ដៃស្ពានបណ្ដាលឱ្យខ្ទេចរថយន្តស្ទើរទាំងស្រុង សំណាងហើយដែលមនុស្សមិនមានគ្រោះថ្នាក់ ។
គ្រោះថ្នាក់ចរាចរណ៍នេះ បានកើតឡើងត្រង់ចំណុចគល់ស្ពានអាកាសស្ទឹងមានជ័យផ្នែកខាងលិច តាមបណ្តោយផ្លូវ២៧១ ស្ថិតក្នុងសង្កាត់ស្ទឹងមានជ័យទី១ ខណ្ឌមានជ័យ បង្កឡើងដោយសារម្ចាស់បទ «ដីថ្លៃប្រឡៃស្នេហ៍ខ្ញុំ» ម៉ារ៉ា ប៊ុនណា ងោកមួយភាំងហើយ ក៏ជ្រុលចង្កូតរថយន្តម៉ាកទីកូរបស់លោក ទៅបុកបង្កាន់ដៃស្ពានមួយទំហឹងបណ្ដាលឱ្យខូចខាតរថយន្តស្ទើរទាំងស្រុង ។
បើតាមសម្តីពីមិត្តភក្តិរបស់តារាចំរៀងជើងចាស់ខាងលើម្នាក់ សូមមិនបញ្ចេញឈ្មោះបានឱ្យដឹងថា រថយន្តទីកូខាងលើនេះ គឺលោក ម៉ារ៉ា ប៊ុនណា ទើបតែទិញពីតារាចំរៀង ម្នាក់ទៀតឈ្មោះ នាយ ផ្លាកទីន ។ ដោយមានបំណងយករថយន្តខាងលើទៅថត MV បទថ្មីរបស់គាត់ ដែលគ្រោងនឹងចេញក្នុងពេលឆាប់ៗនេះគឺបទ «ទីកូបង់រំលោះ» តែមិនទាន់និងបានថតផងបែរជាទៅជួបគ្រោះថ្នាក់ចរាចរណ៍ បណ្តាលអោយខូចខាតរថយន្តយ៉ាងដំណំបាត់ទៅហើយ ៕ សាវុធ
