កំពង់ស្ពឺ ៖ កម្លាំងកងរាជអាវុធហត្ថមូលដ្ឋានក្រុងច្បារមន ចុះបង្ក្រាបករណីចែកចាយគ្រឿងញៀន និងឃាត់ខ្លួនជនសង្ស័យចំនួន ២ នាក់ និងបានដកហូតវត្ថុតាងថ្នាំញៀនម៉ាទឹកកកចំនួន ១៩កញ្ចប់ និងដាវចំនួន ៥ដើម។
កម្លាំងកងរាជអាវុធហត្ថមូលដ្ឋានក្រុងច្បារមន បានឲ្យដឹងថា នៅរសៀលថ្ងៃទី ១៥ ខែកក្កដា ឆ្នាំ២០១៨ នៅចំណុចភូមិសំណង់ សង្កាត់រកាធំ ក្រុងច្បារមន ខេត្តកំពង់ស្ពឺ កម្លាំងមូលដ្ឋានកងរាជអាវុធហត្ថក្រុងច្បារមន ដោយមានការអនុញ្ញាត និងបញ្ជាដោយផ្ទាល់ពីលោកឧត្តមសេនីយ៍ត្រី ជូ សារុន មេបញ្ជាការកងរាជអាវុធហត្ថខេត្តកំពង់ស្ពឺ បានចុះបង្ក្រាបករណីចែកចាយគ្រឿងញៀន និងឃាត់ខ្លួនជនសង្ស័យបានចំនួន ២នាក់មាន ឈ្មោះ ជួន យី ភេទប្រុស អាយុ ៣៥ឆ្នាំ មុខរបរមិនពិតប្រាកដ មានទីលំនៅភូមិចំបក់ ឃុំវល្លីស ស្រុកសំរោងទង ខេត្តកំពង់ស្ពឺ និងឈ្មោះ ហឿន វុទ្ធី ភេទប្រុស អាយុ ២៣ឆ្នាំ មុខរបរមិនពិតប្រាកដ មានទីលំនៅភូមិ/ឃុំ ជាមួយគ្នា រួមទាំងដកហូតបានវត្ថុតាងថ្នាំញៀនម៉ាទឹកកកចំនួន ១៩កញ្ចប់ ស្មើនឹង១០,១០ក្រាម ជញ្ជីងថ្លឹងថ្នាំចំនួន ១ ថង់ច្រកថ្នាំចំនួន ៥៧៧ថង់ ដែកកេះចំនួន ១៣ ដបជក់ថ្នាំញៀនចំនួន ៦ ទូរស័ព្ទចំនួន ១គ្រឿង និងដាវចំនួន ៥ដើម ។
បច្ចុប្បន្ន ជនសង្ស័យ និងវត្ថុតាង ត្រូវបានកម្លាំងមូលដ្ឋានក្រុងច្បារមន បញ្ជូនមកបញ្ជាការដ្ឋានកងរាជអាវុធហត្ថខេត្តកំពង់ស្ពឺ ដើម្បីចាត់ការបន្តតាមនីតិវិធី ៕ ដោយ ៖ បញ្ញាស័ក្តិ
