ថ្មីៗនេះ វីដេអូមួយដែលបង្ហាញអ្នកគ្រូសាស្ត្រាចារ្យម្នាក់ នៅទីក្រុង Shenyang ប្រទេសចិន ខណៈពេលកំពុងបង្រៀន ដែលកូនសិស្សបានថតបង្ហោះ បើទោះបីគ្រាន់តែជាវីដេអូធម្មតាក៏ដោយ ប៉ុន្តែ វីដេអូនេះទទួលបានការចាប់អារម្មណ៍យ៉ាងខ្លាំង ពីអ្នកនិយមលេងអ៊ីនធឺណេត ហើយថែមទាំងក្លាយជាប្រធានបទក្តៅដែលត្រូវបានពិភាក្សានៅលើ Weibo ទៀតផង។
អ្វីដែលធ្វើឱ្យអ្នករាល់គ្នាភ្ញាក់ផ្អើលនោះ គឺដោយសារមិនគួរឱ្យជឿថា “អ្នកគ្រូរូបនោះជាមនុស្សដ៏សាមញ្ញបែបនេះ”។ គេបានដឹងថាអ្នកគ្រូសាស្ត្រាចារ្យក្នុងវីដេអូ គឺជាសាស្ត្រាចារ្យរង Feng នៅសាកលវិទ្យាល័យ Shenyang City។ ទោះបីជាអ្នកគ្រូនៅក្មេង និងទទួលបានសញ្ញាបត្រខ្ពស់ក៏ដោយ តែអ្នកគ្រូសាមញ្ញបំផុត។ ជាក់ស្តែង អ្នកគ្រូមិនបានកាន់កាបូបស្បែកតម្លៃខ្ពស់ទេ ប៉ុន្តែបានប្រើថង់ប្លាស្ទីកថោក ដើម្បីដាក់សៀវភៅ និងសម្ភារៈការិយាល័យដែលអ្នកគ្រូត្រូវការប៉ុណ្ណោះ។
មិនត្រឹមតែប្រើថង់ក្រដាសទេ គឺសូម្បីដបទឹករបស់នាងក៏សាមញ្ញណាស់ដែរ គ្រាន់តែដបទឹកផ្លែឈើធម្មតា។ លើសពីនេះ អ្នកគ្រូក៏គ្មានគ្រឿងអលង្ការ ឬសម្លៀកបំពាក់ម៉ាកល្បីៗនៅលើខ្លួនដែរ ពោលគឺអ្វីគ្រប់យ៉ាងអំពីនាង គឺសាមញ្ញណាស់។
សាស្ត្រាចារ្យស្រីរូបនេះ បានធ្វើឲ្យនិស្សិតថ្មីៗដែលទើបតែចូលសកលវិទ្យាល័យមានការភ្ញាក់ផ្អើល។ និស្សិតដែលបានថតវីដេអូតាមអ៊ីនធឺណិតបាននិយាយថា “តាមចំណាប់អារម្មណ៍របស់ខ្ញុំ អ្នកគ្រូសាស្ត្រាចារ្យមានលក្ខណៈប្លែកពីគេ។ នៅពេលដែលខ្ញុំឃើញនាងកាន់សៀវភៅនៅក្នុងថង់ក្រដាស និងទឹកផឹកពីដបចាស់ ធ្វើឲ្យខ្ញុំមិននឹកស្មានងថានាងជាមនុស្សសាមញ្ញបែបនេះសោះ»។
បន្ទាប់ពីល្បីភ្លាម អ្នកសារព័ត៌មានបានមកសាលាដើម្បីសម្ភាស។ អ្នកគ្រូសាស្ត្រាចារ្យរង Feng បាននិយាយថា ដបទឹកដែលគ្រប់គ្នាឃើញក្នុងវីដេអូនេះ តាមពិតជាដបទឹកផ្លែឈើដែលទិញនៅហាងកាលពីមួយឆ្នាំមុន ដែលនាងបានកែច្នៃ និងប្រើប្រាស់រហូតមកដល់បច្ចុប្បន្ន។ រីឯថង់សៀវភៅជាកាបូបសម្រាប់ដាក់របស់របរពេលដើរទិញឥវ៉ាន់នៅហាងអាហារសាលា។ វាមើលទៅដូចនោះ ប៉ុន្តែរឹងមាំ និងងាយស្រួលណាស់ ដូច្នេះហើយនាងតែងតែប្រើវាដើម្បីរក្សាទុកសម្ភារៈបង្រៀន។
សម្រាប់អ្នកគ្រូ Feng វត្ថុសម្ភារៈគឺជារឿងបន្ទាប់បន្សំ តែអ្នកគ្រូយកចិត្តទុកដាក់ខ្លាំងជាងទៅលើទ្រព្យសម្បត្តិខាងក្នុង និងការប្រមូលផ្តុំចំណេះដឹង។ អ្នកគ្រូចែករំលែកថា ជីវិតរបស់នាងសាមញ្ញ ប៉ុន្តែសម្បូរបែប ពិភពលោកពោរពេញដោយក្តីស្រលាញ់ ចំណេះដឹង និងការយល់ដឹងជ្រៅជ្រះនៃជីវិត។ អ្នកគ្រូជឿថា តម្លៃរបស់មនុស្សម្នាក់មិនគួរត្រូវបានចងភ្ជាប់ទៅនឹងវត្ថុសម្ភារៈនិយមនោះទេ ប៉ុន្តែដើម្បីសម្រេចបាននូវសុភមង្គល និងការពេញចិត្តពិតប្រាកដ តាមរយៈការខិតខំប្រឹងប្រែងរបស់បុគ្គលម្នាក់ៗ។
នៅពេលដែលសិស្សចង់ដឹង សួរថាហេតុអ្វីបានជាអ្នកគ្រូជ្រើសរើសរបៀបរស់នៅដ៏សាមញ្ញបែបនេះ អ្នកគ្រូ Feng តែងតែឆ្លើយតបដោយស្នាមញញឹមដ៏កក់ក្តៅ និងសប្បុរស។ អ្នកគ្រូបានប្រាប់ពួកគេថា ពិភពលោកខាងក្នុងរបស់នាង គឺសម្បូរបែបណាស់ដែលនាងមិនចាំបាច់ពឹងផ្អែកលើការតុបតែងខាងក្រៅ ដើម្បីឱ្យមានអារម្មណ៍ពេញចិត្តនោះទេ។ សុភមង្គលរបស់នាងកើតចេញពីការងារ និងការប្រាស្រ័យទាក់ទងជាមួយសិស្ស មិនមែនទ្រព្យសម្បត្តិសម្ភារៈ ឬកិត្តិយសលើសលប់នោះទេ។
របៀបរស់នៅដ៏សាមញ្ញរបស់សាស្ត្រាចារ្យរង និងពិភពលោកខាងក្នុងដ៏ជ្រាលជ្រៅ បានធ្វើឱ្យសិស្ស និងអ្នកនិយមលេងអ៊ីនធឺណិតកោតសរសើរយ៉ាងជ្រាលជ្រៅ។ ជាការពិតណាស់ មនុស្សដែលមានចំណេះដឹងពិតប្រាកដ នឹងមិនត្រូវការទទួលឥទ្ធិពលពីភាពល្បីល្បាញខាងក្រៅ និងវត្ថុសម្ភារៈនិយមនោះទេ ប៉ុន្តែពិភពលោកខាងក្នុង និងតម្លៃខាងក្នុង គឺសំខាន់បំផុត៕ រក្សាសិទ្ធិដោយ៖ លឹម ហុង
