នៅថ្ងៃទី១១ ខែវិច្ឆិកា ឆ្នាំ២០២៣ ឬ 11.11 ដែលត្រូវបានគេហៅថាពិធីបុណ្យទិញទំនិញអនឡាញដ៏ធំបំផុតប្រចាំឆ្នាំ ជាពិសេសនៅប្រទេសចិន ដែលត្រូវបានគេចាត់ទុកជា «ទិវាអ្នកនៅលីវជាតិ» ដូច្នេះអ្នកនៅលីវអាចដើរទិញឥវ៉ាន់យ៉ាងរីករាយ។ ហើយឆ្លើយតបសម្រាប់ថ្ងៃដ៏ពិសេសនេះ វេទិកាហាងអនឡាញបានចាប់ផ្តើមយុទ្ធនាការមួយ ដើម្បីកាត់បន្ថយតម្លៃរបស់ពួកគេយ៉ាងធំ ពោលគឺរាល់មុខទំនិញគឺថោកៗបំផុត។ ដូច្នេះអ្នកទិញទំនិញទាំងអស់មិនចង់ឲ្យឱកាសនេះកន្លងផុតឡើយ។
យ៉ាងណាមិញ ទាក់ទងថ្ងៃបញ្ចុះទំនិញដ៏មិនធម្មតានេះផងដែរ នៅថ្ងៃទី១២ ខែវិច្ឆិកា ឆ្នាំ២០២៣ គេហទំព័រ CTWANT បានរាយការណ៍ថា មាននារីវ័យក្មេងម្នាក់នៅក្នុងប្រទេសចិន នាងបានជក់ចិត្តយ៉ាងខ្លាំង ទៅនឹងការទិញទំនិញក្នុងអំឡុងពិធីបុណ្យថ្ងៃ 11.11 រហូតដល់បាត់បង់ស្មារតី និងពេលវេលា ដែលជាហេតុធ្វើឲ្យនាងត្រូវខកខានជើងយន្តហោះវិលត្រឡប់ទៅផ្ទះវិញ ហើយអង្គុយយំនៅកណ្តាលអាកាសយានដ្ឋាន ធ្វើឱ្យមនុស្សម្នាភ្ញាក់ផ្អើលជាខ្លាំងតែម្តង ហើយក៏បានក្លាយជាប្រធានបទបង្កការវែកញែក និងអស់សំណើចព្រោងព្រាតនៅលើលើអ៊ីនធឺណិត។
យោងតាមរបាយការណ៍របស់ប្រព័ន្ធផ្សព្វផ្សាយក្នុងស្រុក នារីរូបនេះបានត្រៀមខ្លួនយ៉ាងល្អ សម្រាប់ផែនការធ្វើដំណើររបស់នាង។ នាងបានមកដល់អាកាសយានដ្ឋានសៀងហៃទាន់ពេល។ ប៉ុន្តែ ដោយសារតែនៅសល់ពេលច្រើនមុនពេលឡើងយន្តហោះ ហើយខណៈពេលដែលកំពុងរង់ចាំ នាងបានបើកទូរស័ព្ទឆែកមើល និងឆ្លៀតដើរទិញឥវ៉ាន់អនឡាញនៅថ្ងៃ 11.11។ តែអ្វីដែលគួរឲ្យហួសចិត្តខ្លាំងនោះ គឺថាស្រ្តីរូបនេះបាន «ជ្រមុជខ្លួន» នៅក្នុងពិភពនៃការបញ្ចុះតម្លៃដ៏ធំ រហូតដល់ថ្នាក់មិនដឹងថាពេលវេលាហោះហើរបានកន្លងផុតទៅជាយូរមកហើយនោះទេ។
រហូតដល់នាងដឹងខ្លួនវិញ ទើបនាងដឹងថា ជើងហោះហើររបស់នាងបានចេញដំណើរទៅហើយ ដែលធ្វើឱ្យនាងភ្ញាក់ផ្អើល និងបានអង្គុយទ្រហ៊ោយំនៅកណ្តាលអាកាសយានដ្ឋានអស់មួយសន្ទុះធំ។ ទោះជាយ៉ាងណា បន្ទាប់មកនាងបានស្ងប់អារម្មណ៍ ក្រោកឡើងជូតទឹកភ្នែក ហើយបានទៅសួរបុគ្គលិកអាកាសយានដ្ឋាន ដើម្បីស្នើសុំការផ្លាស់ប្តូរជើងហោះហើរ ហើយនាងក៏បានឡើងយន្តហោះបន្ទាប់ដោយជោគជ័យ។
នារីវ័យក្មេងរូបនេះ បាននិយាយថា «ខ្ញុំបានរៀនមេរៀនមួយ ហើយខ្ញុំនឹងមិនឲ្យខកខានពេលឡើងយន្តហោះ ដោយសារតែការទិញទំនិញតាមអ៊ីនធឺណិតបែបនេះម្តងទៀតទេ»។
បន្ទាប់ពីវីដេអូឃ្លីបនៃហេតុការណ៍នេះ ត្រូវបានផ្សព្វផ្សាយនៅលើបណ្តាញសង្គម ឃើញថាទទួលបានការចាប់អារម្មណ៍ជាខ្លាំងពីមហាជន។ មនុស្សជាច្រើនបានឃើញបែបនេះហើយ បានបង្ហាញក្តីអាណិតអាសូរ និងក៏ទប់សំណើចមិនបានផងដែរ។ ពួកគេបានយល់ថា នេះជាមេរៀនពិតក្នុងការទិញទំនិញតាមអនឡាញ ដោយចង្អុលបង្ហាញថា “ជាធម្មតាការទិញទំនិញនៅថ្ងៃទី ១១.១១ ទាមទារឲ្យមានការប្រុងប្រយ័ត្ន ជាពិសេសក្នុងស្ថានភាពពិសេសដែលត្រូវតែប្រយ័ត្នពេលវេលាបំផុត ពោលគឺត្រូវរម្លឹកខ្លួនឯងឲ្យបានច្រើនដង។ មនុស្សម្នាក់ទៀតបាននិយាយថា «11.11 បានធ្វើឱ្យមនុស្សជាច្រើនក្ស័យធន និងបំផ្លាញ គ្រាន់តែមួយភ្លែតសោះ»៕ រក្សាសិទ្ធិដោយ៖ លឹម ហុង
