ថ្មីៗនេះ វីដេអូឃ្លីបមួយដែលបង្ហាញពី «អាកប្បកិរិយាដ៏ចម្លែក» របស់ក្មេងប្រុសម្នាក់ ស្ថិតនៅពីមុខផ្ទះរបស់គេ ត្រូវបានចែករំលែកយ៉ាងផុសផុលនៅលើបណ្តាញសង្គមចិន ប៉ុន្តែ នៅពេលបានដឹងរឿងរ៉ាវនៅពីក្រោយហេតុការណ៍នេះ បានធ្វើអោយមនុស្សជាច្រើនរំជួលចិត្តជាខ្លាំង។
ហេតុការណ៍នេះបានកើតឡើងនៅថ្ងៃទី៣១ ខែធ្នូ ឆ្នាំ២០២៣ នៅផ្ទះរបស់គ្រួសារមួយនៅក្នុងទីក្រុង Shantou ខេត្ត Guangdong ប្រទេសចិន។ តាមរយៈវីដេអូ CCTV បានបង្ហាញថា មានក្មេងប្រុសតូចម្នាក់ពាក់អាវពណ៌ទឹកក្រូច និងខោវែងដើរនៅមុខផ្ទះតែម្នាក់ឯង។ ក្មេងប្រុសរូបនោះបានដើរជុំវិញមួយសន្ទុះ ហើយនៅពេលឃើញថាគ្មានអ្នកណាមើល រូបគេក៏លុតជង្គង់ចុះ បន្ទាប់មក បានលើកដៃទាំងពីរសំពះឡើងលើ ដោយមិនដឹងជាបន់ស្រន់អ្វីនោះទេ។
ទោះជាយ៉ាងណា នៅពេលដែលក្មេងប្រុសរូបនោះបានកត់សម្គាល់ឃើញថា មានមនុស្សម្នាក់ដើរចូលមក រូបគេបានក្រោកឡើងយ៉ាងលឿន ហើយបន្ទាប់មកដើរជុំវិញហើយមើលទៅផ្ទះ។ នៅពេលដឹងច្បាស់ថាគ្មានអ្នកណាដើរមកឃើញ ក្មេងប្រុសនោះបានត្រឡប់មកវិញ ហើយអង្គុយចុះលុតជង្គង់ រួចយកទាំងពីរលើកប្រណម បន់ស្រន់ម្ដងទៀត មុននឹងក្រាបថ្វាយបង្គំដល់ដីចំនួន ៥ដង រួចក្រោកឈរដើរចូលផ្ទះដោយភាពស្ងប់ស្ងាត់។
ទោះជាយ៉ាងណា មិនមានអ្នកណាដឹងថាមានអ្វីកើតឡើង ចំពោះក្មេងប្រុសរូបនោះទេ។ ប៉ុន្តែរហូតដល់ប៉ុន្មានថ្ងៃក្រោយមក ឪពុករបស់ក្មេងប្រុសរូបនោះបានទៅពិនិត្យកាមេរ៉ាសុវត្ថិភាព ហើយបានឃើញទង្វើរបស់កូនប្រុសបែបនេះ បុរសជាឪពុកពិតជាមានការភ្ញាក់ផ្អើល និងសោកស្តាយយ៉ាងខ្លាំង។
ឪពុករូបនោះបានបង្ហោះវីដេអូឃ្លីបនៅលើអ៊ីនធឺណិត រួមជាមួយនឹងសារសារភាពដ៏ក្រៀមក្រំថា «ខ្ញុំស្រក់ទឹកភ្នែកពេលឃើញហេតុការណ៍នេះ។ នៅថ្ងៃនោះ ខ្ញុំនិងប្រពន្ធបានប្រកែកគ្នាខ្លាំង។ ការឈ្លោះប្រកែកគ្នារបស់ពួកយើង បានធ្វើឲ្យក្មេងៗភ័យខ្លាចដោយមិននឹកស្មានដល់»។
រូបភាពដែលបង្ហាញក្នុងឃ្លីបវីដេអូដំបូងនេះ វាបានបង្កភាពងឿងឆ្ងល់ និងស្រឡាំងកាំងបន្តិចសម្រាប់អ្នកដែលបានឃើញ។ មនុស្សជាច្រើនមិនយល់ពីអ្វីដែលក្មេងប្រុសរូបនោះកំពុងធ្វើទេ។ ប៉ុន្តែ នៅពេលដឹងមូលហេតុ បានធ្វើឱ្យមនុស្សជាច្រើនមានអារម្មណ៍សោកសៅ និងស្រក់ទឹកភ្នែកផងដែរ។
បើតាមប្រភពព័ត៌មាន បានឲ្យដឹងថា ក្មេងប្រុសរូបនោះបានដើរចេញនៅពីមុខផ្ទះ បន្ទាប់ពីបានឃើញឪពុកនិងម្តាយរបស់គាត់ ឈ្លោះប្រកែកគ្នានៅក្នុងផ្ទះ រហូតបង្កជាហិង្សាខ្លាំងឡើង។ គេសន្និដ្ឋានថា ក្មេងប្រុសនោះមិនដឹងរកជំនួយទៅណា ដូច្នេះហើយ រូបគេបានបួងសួងឲ្យឪពុកម្តាយឈប់ឈ្លោះគ្នាបែបនេះទៅ៕ រក្សាសិទ្ធិដោយ៖ លឹម ហុង
