ភ្នំពេញ៖រដ្ឋសភាជាតិកម្ពុជា បានលិខិតមួយច្បាប់ គោរពជូនអតីតតំណាងរាស្ត្រ នៃអតីតគណបក្សសង្គ្រោះជាតិ នៅព្រឹកថ្ងៃទី២១ ខែវិច្ឆិកា ឆ្នាំ២០១៧នេះ ដោយបានស្នើសុំប្រគល់សម្ភារៈរបស់រដ្ឋជូនរដ្ឋសភាវិញ យោងតាមសាលាដីការ៣៤០ ចុះថ្ងៃទី១៦ខែវិច្ឆិកាឆ្នាំ២០១២៧ របស់តុលាការកំពូល។
លោក ឡេង ប៉េងឡុង អ្នកនាំពាក្យរដ្ឋសភា បានបញ្ជាក់ក្នុងលិខិតនេះថា៖ រដ្ឋសភា ពេលនេះ បានសម្រេចលុបឈ្មោះ តំណាងរាស្ត្រគណបក្សសង្គ្រោះជាតិទាំង៥៥រូប និងទីប្រឹក្សា ជំនួយការ អ្នកបើករថយន្ត សរុបជាង១០០នាក់ ចេញពីបញ្ជីក្របខណ្ឌ ហើយពួកគេត្រូវបានបញ្ចប់មុខងារ និងប្រាក់ខែចាប់ពីខែវិច្ឆិកា ឆ្នាំ២០១៧នេះតទៅ។
លោក ឡេង ប៉េងឡុងបញ្ជាក់ទៀតថា៖ សម្ភារៈប្រើប្រាស់ ដូចជារថយន្តទំនើបៗ កុំព្យូទ័រ សម្ភារៈការិយាល័យ របស់អតីតតំណាងរាស្ត្រគណបក្សសង្គ្រោះជាតិទាំងនោះ ក៏ត្រូវរឹបអូសយកមកទុកជាសម្បត្តិរដ្ឋវិញដែរ។
លោកបន្តថា៖ “តុលាការកំពូល បានសម្រេចរំលាយគណបក្សសង្គ្រោះជាតិ តាមរយៈសាលដីកា កាលពីថ្ងៃទី១៦ ខែវិច្ឆិកា ឆ្នាំ២០១៧ ឯកឧត្តម លោកជំទាវ លែងជាសមាជិករដ្ឋសភាទៀតហើយ ដូចនេះអគ្គលេខាធិការដ្ឋានសភា ស្នើសុំឯកឧត្តម លោកជំទាវ មេត្តាប្រគល់សម្ភារៈរបស់រដ្ឋ ឲ្យអគ្គលេខាធិការដ្ឋានរដ្ឋសភាវិញ។ ក្រុមការងារទទួលបន្ទុក ទទួលសម្ភារៈ និងរង់ចាំការទទួលប្រគល់សម្ភារៈ ពីថ្ងៃនេះ រហូតដល់ថ្ងៃទី២៤ខែវិច្ឆិកា ឆ្នាំ២០១៧”៕ ដោយ៖បញ្ញាស័ក្តិ
