ភ្នំពេញ ៖ សមាគមអ្នកបច្ចេកវិទ្យាហិរញ្ញវត្ថុកម្ពុជា (CFA) គឺជាស្ថាប័នចម្រុះនិងមិនរកប្រាក់ចំណេញដែលមានគោលបំណងជួយគាំទ្រការអភិវឌ្ឍន៍នៃវិស័យ FinTech ក្នុងប្រទេសកម្ពុជា និងដើម្បីជំរុញកិច្ចសហការរវាងអ្នកចូលរួមនិងភាគីពាក់ព័ន្ធទាំងឡាយក្នុងប្រព័ន្ធអេកូ FinTech ក្នុងប្រទេសកម្ពុជា។
សមាគមអ្នកបច្ចេកវិទ្យាហិរញ្ញវត្ថុកម្ពុជាគឺជាស្ថាប័នមួយដែលសមាជិករបស់ខ្លួនតំណាងឲ្យភាគីពាក់ព័ន្ធគ្រប់រូបភាពក្នុងវិស័យ FinTech ចាប់តាំងពីក្រុមហ៊ុនច្នៃប្រឌិតក្នុងដំណាក់កាលដំបូងរហូតដល់ក្រុមហ៊ុនធំៗដែលនាំមុខក្នុងផ្នែកហិរញ្ញវត្ថុនិងអ្នកផ្តល់សេវាកម្មនានា។ ដើម្បីពង្រឹងគោលបំណងនៃការអភិវឌ្ឍវិស័យ FinTech ក្នុងប្រទេសកម្ពុជា សមាគមអ្នកបច្ចេកវិទ្យាហិរញ្ញវត្ថុកម្ពុជាបានចាប់ដៃគូជាមួយស្ថាប័ននិងសមាគមនានាពីប្រទេសកម្ពុជានិងទូទាំងសកលលោក ដើម្បីសហការទៅលើគំនិតផ្តួចផ្តើមផ្សេងៗទាក់ទងនឹងវិស័យ FinTech។
ដើម្បីជាកិច្ចចាប់ផ្តើម សមាគមអ្នកបច្ចេកវិទ្យាហិរញ្ញវត្ថុកម្ពុជា បានចុះហត្ថលេខាលើអនុស្សរណៈជាមួយសមាគមអ្នកបច្ចេកវិទ្យាហិរញ្ញវត្ថុផ្លូវការពីប្រទេសសឹង្ហបុរី តៃវ៉ាន់ និងថៃ នៅយប់ថ្ងៃទី 15 ខែសីហា ឆ្នាំ2018 នារាជធានីភ្នំពេញ ក្រោមអធិបតីភាព លោកស្រី ជា សេរី អគ្គនាយកធនាគារជាតិនៃកម្ពុជា និងលោក សុខ ពុទ្ធិវុធ ប្រធានសហព័ន្ធ ICT នៅសណ្ឋាគាររ៉ូសវ៉ូដ។ តាមរយៈអនុស្សរណៈមួយនេះ សមាគមទាំងបួនយល់ព្រមក្នុងការសហការនិងបន្តចូលរួមក្នុងគោលបំណងរួមចំណែកក្នុងការអភិវឌ្ឍន៍នៃវិស័យ Fintech ក្នុងប្រទេសកម្ពុជានិងទ្វីបអាស៊ី។
សមាគមអ្នកបច្ចេកវិទ្យាហិរញ្ញវត្ថុកម្ពុជាអនុវត្តនូវការងារសំខាន់ៗចំនួនបួនសម្រាប់សមាជិករបស់ខ្លួនមានដូចជា ៖
ជាជើងឯក – ផ្តល់ការប្រឹក្សាដល់រដ្ឋាភិបាលនិងនិយតករទៅលើការផ្លាស់ប្តូរគោលនយោបាយនានាដែលគាំទ្រភាពច្នៃប្រឌិតនិងការរីកលូតលាស់នៃ Fintech។
ជាអ្នកផ្តល់ជំនួយ – ផ្តល់ការស្រាវជ្រាវ ជំនួយផ្នែកច្បាប់/បទបញ្ញត្តិ ការបញ្ចុះតម្លៃសម្រាប់អ្នកផ្តល់សេវាកម្ម និងអត្ថប្រយោជន៍ផ្សេងៗទៀតដែលជួយសមាជិករបស់យើងក្នុងការកសាងនិងពង្រីក Startup របស់ពួកគេ។
ជាអ្នកផ្សំផ្គុំ – បញ្ចុះបញ្ចូលអតិថិជនឲ្យទិញ វិនិយោគិនឲ្យវិនិយោគ និងអ្នកមានទេពកោសល្យឲ្យចូលរួមក្នុងដំណោះស្រាយ Fintech នានា។
ជាស្ពានតភ្ជាប់ទំនាក់ទំនង – តភ្ជាប់ការបណ្តាក់ទុន (ធនធាន) ទេពកោសល្យ (ការអប់រំ) និងភាគីពាក់ព័ន្ធផ្សេងៗក្នុងប្រព័ន្ធអេកូ Fintech កម្ពុជា និងផ្តល់នូវទំនាក់ទំនាក់ទៅកាន់មជ្ឈមណ្ឌលនានានៅក្រៅប្រទេសតាមរយៈបណ្តាញនៃកម្មវិធីនិងដៃគូរបស់ពួកយើង។
ជាមួយនឹងភាពរឹងមាំនៃអ្នកចូលរួមផ្សេងៗទាំងឡាយដែលត្រូវបានប្រមូលផ្តុំដោយសមាគមមួយនេះ ពួកយើងសង្ឃឹមថាវានឹងអាចបង្កើតកាតាលីសសម្រាប់ការអភិវឌ្ឍន៍នាពេលអនាគតប្រកបដោយនិរន្តរភាពសម្រាប់វិស័យ Fintech នៅក្នុងប្រទេសកម្ពុជា។
សូមបញ្ជាក់ថា ទីតាំងការិយាល័យធ្វើការរួមទំហំ 5 000 ហ្វីតដែលមានទីតាំងនៅរាជធានីភ្នំពេញនឹងក្លាយជាទីតាំងផ្លូវការរបស់សមាគមអ្នកបច្ចេកវិទ្យាហិរញ្ញវត្ថុកម្ពុជា និងបើកជូនដល់ក្រុមហ៊ុន Fintech Startups នានាក្នុងត្រីមាសចុងក្រោយក្នុងឆ្នាំ 2019 ៕ ដោយ៖កូឡាប
