ភ្នំពេញ ៖ លោក រដ្ឋមន្ត្រី បរិស្ថាន បានជំរុញ និងលើកទឹកចិត្តដល់មន្ត្រីវ័យក្មេងចេះប្រែក្លាយឱកាស ដើម្បីអភិវឌ្ឍខ្លួន និងចាប់យកការបំពាក់បំប៉នស្មារតី និងគោលជំហរ ដើម្បីក្លាយជាមន្ត្រីល្អ និងមានភាពជាអ្នកដឹកនាំប្រកបដោយប្រសិទ្ធភាព។
ទីស្តីការក្រសួងបរិស្ថាន នៅ ថ្ងៃទី២០ ខែសីហា ឆ្នាំ២០១៨ លោក សាយ សំអាល់ រដ្ឋមន្ត្រីក្រសួងបរិស្ថាន បានអញ្ជើញជាអធិបតីក្នុងពិធីបើកវគ្គបណ្ដុះបណ្ដាលស្តីពី ការគ្រប់គ្រងបរិស្ថាន និងធនធានធម្មជាតិ ជំនាន់ទី២ ដើម្បីការជម្រុញ និងលើកស្ទួយការកសាង និងអភិវឌ្ឍន៍ធនធានមនុស្ស ដែលជាធាតុចូលដ៏សំខាន់មិនអាចខ្វះបានក្នុងការកសាង និងអភិវឌ្ឍន៍ប្រទេសជាតិ។
តាមរយៈវគ្គបណ្តុះបណ្តាលនេះ ក៏ជាការកសាង និងពង្រឹងសមត្ថភាពមន្ត្រីរាជការវ័យក្មេង ដែលបានប្រឡងជាប់ក្របខណ្ឌថ្មីរបស់ក្រសួងបរិស្ថានជារៀងរាល់ឆ្នាំ ឱ្យមានមូលដ្ឋានគ្រឹះ ទាំងចំណេះដឹង និងចំណេះធ្វើការងារគ្រប់គ្រងវិស័យបរិស្ថាន ។
ជាមួយគ្នានេះ លោក រដ្ឋមន្ត្រី បានលើកពីការធ្វើទំនើបកម្មថ្មីក្នុងអាណត្តិថ្មីនេះ ធ្វើយ៉ាងណា ដើម្បីឆ្លើយតបនឹងការកែទម្រង់លើវិស័យបណ្ដុះបណ្ដាលធនធានមនុស្ស ដែលជាទំពាំងស្នងឬស្សីក្នុងការរួមចំណែកអនុវត្តការងាររបស់ក្រសួងបរិស្ថាន ជាពិសេស ការសិក្សាស្វែងយល់ ក៏ដូចជាការអនុវត្តការងារលើវិស័យបរិស្ថាន និងអភិវឌ្ឍប្រទេសកម្ពុជា នាពេលបច្ចុប្បន្ន ក៏ដូចជាពេលអនាគតឱ្យទទួលបានប្រសិទ្ធភាព និងប្រសិទ្ធផលខ្ពស់។
លោក សឹម យ៉ារ៉ែន អនុរដ្ឋលេខាធិការក្រសួងបរិស្ថាន បានឱ្យដឹងថា នេះជាការបើកវគ្គបណ្តុះ បណ្តាលជំនាន់ទី២ នៅក្នុងឆ្នាំ២០១៨នេះ តាមរយៈអគ្គនាយកដ្ឋានរដ្ឋបាល និងហិរញ្ញវត្ថុ សម្រាប់វគ្គបណ្ដុះបណ្ដាលស្ដីពី “ការគ្រប់គ្រងបរិស្ថាន និងធនធានធម្មជាតិ ” (ជំនាន់ទី២) មាន(រយៈពេល២០ថ្ងៃ) ដែលប្រព្រឹត្តទៅចាប់ពីថ្ងៃទី២០ ខែសីហា ដល់ថ្ងៃទី១៣ ខែកញ្ញា ឆ្នាំ២០១៨ ដល់មន្ត្រីរាជការដែល ប្រឡង ក្របខណ្ឌឆ្នាំ២០១៧ សរុបចំនួន៨០នាក់ ក្នុងនោះមន្ត្រីក្របខណ្ឌនៅទីស្ដីការក្រសួង ចំនួន៤៦ នាក់ មន្ទីរបរិស្ថានខេត្ត២៤នាក់ និងមន្ត្រីក្របខណ្ឌឧទ្យានុរក្សថ្នាក់កណ្ដាលចំនួន៣៤នាក់ និងមានប្រធានបទចម្បងចំនួន០៨ និងប្រធានបទរងចំនួន៣៧ រួមមាន ៖ គោលនយោបាយ ផែនការយុទ្ធសាស្ត្រ រចនាសម្ព័ន្ធក្រសួង និងមន្ទីរបរិស្ថានរាជធានី-ខេត្ត ការងារវិមជ្ឈការ និងវិសហមជ្ឈការ ការងារស្នូលរបស់ អគ្គលេខាធិការដ្ឋាន អគ្គនាយកដ្ឋាន អគ្គាធិការដ្ឋាន នាយកដ្ឋានសវនកម្មផ្ទៃក្នុងរបស់ក្រសួងបរិស្ថាន ដើម្បីជាប្រយោជន៍ក្នុងការអនុវត្តការងារនៅក្នុងស្ថាប័នប្រកបដោយប្រសិទ្ធភាព៕ ដោយ ៖ កូឡាប
