ខេត្តកំពង់ចាម: ឯកឧត្តម អ៊ុន ចាន់ដា ប្រធានសាខាកាកបាទក្រហមកម្ពុជាខេត្ត នៅព្រឹកថ្ងៃទី២៧ ខែតុលា ឆ្នាំ២០២៤ បានដឹកនាំក្រុមការងារនិងព្រះសង្ឃព្រមទាំងអាជ្ញាធរមូលដ្ឋានបានរៀបចំប្រគល់ផ្ទះមនុស្សធម៌ទី២២ ជូនទុគតជនជរាគ្មានទីពឹង ឈ្មោះ បួ កប អាយុ ៥៩ឆ្នាំ រស់នៅ ភូមិត្រពាំងឬស្សី ឃុំជយោ ស្រុកចំការលើ ។ជាមួយនោះក៏មានការចូលរួមធ្វើសាក្សីពីសំណាក់បងប្អូនប្រជាពលរដ្ឋជិតខាតផងដែរ។
លោក ទូច ឆៃ នាយកប្រតិបត្តិសាខាកាកបាទក្រហមខេត្ត បានឲ្យដឹងថា លោកតា បួ កប រស់នៅម្នាក់ឯង គ្មានប្រពន្ធ កូន ទេ ។ គាត់ជាអតីតយុទ្ធជន ធ្លាប់បម្រើការក្នុងអង្គភាពយោធា ស្រុកចំការលើ ហើយបានរំសាយក្នុងឆ្នាំ១៩៨៥ ដោយពុំទទួលបានរបបគោលនយោបាយអ្វីឡើយ ។ កន្លងមក ធ្លាប់រស់នៅជាមួយបងប្រុស ក្នុងភូមិនេះដែរ ប៉ុន្តែដោយសារគាត់មានសតិមិនសូវគ្រប់ ធ្ងន់ត្រចៀក ហើយមិនចេះរកស៊ីទៀត ធ្វើអោយការរស់នៅមិនចុះសម្រុងគ្នាផងដែរ។
ម៉្លោះហើយ គាត់ចេះតែដើររស់នៅជាមួយអ្នកជិតខាង រហូតត្រូវបានក្រុមគ្រួសារ លោក ម៉េត គឿន អាណិតយកមកនៅក្នុងដីភូមិរបស់ខ្លួន ដោយបានសង់ជាកូនខ្ទមតូចមួយ ដែលដំបូលនិងជញ្ជាំងបិទបាំងដោយស្លឹកត្នោត ជាជម្រកអោយគាត់ ។ សព្វថ្ងៃ រស់នៅពឹងអាស្រ័យ តែលើការជួយរបស់រាជរដ្ឋាភិបាលកម្ពុជា តាមរយៈ ប័ណ្ណសមធម៌ ក្រ ១ និងការជួយឧបត្ថម្ភចំណីអាហារពីអ្នកជិតខាងនិងម្ចាស់ដី ប៉ុណ្ណោះ ។
ម្យ៉ាងទៀត ទុរគតជនជរា រូបនេះ ពុំមានដីផ្ទាល់ ខ្លួនទេ តែដោយក្តីអាណិតអាសូរ លោក ម៉េត គឿន សុខចិត្តបរិច្ចាគ ដីភូមិរបស់គាត់ទំហំ ១០ម × ១២ម ជូន លោកតា បួ កប រស់នៅអស់មួយជីវិត តែមិនប្រគល់អោយជាកម្មសិទ្ធិទេគឺស្នាក់នៅពេញមួយជីវិត។
លោក ទូច ឆៃ ឲ្យដឹងទៀតថា តាមការស្នើសុំពីក្រុមកាកបាទក្រហមឃុំ អនុសាខាស្រុក រួមជាមួយសំណើ សុំបិណ្ឌបាត្រពីព្រះអនុគណ ស្រុក និងដោយ មើលឃើញពីស្ថានភាពដ៏លំបាកនេះ ឯកឧត្តម អ៊ុន ចាន់ដា ប្រធានគណៈកម្មាធិការសាខា បានសម្រេចផ្តល់ជូនផ្ទះឈើខ្ពស់ផុតពីដី ប្រក់ស័ង្កសីភ្លីធំ (ទំហំ៤ម × ៦ម) ១ខ្នង រួមជាមួយបង្គន់អនាម័យ ១បន្ទប់ អណ្តូងទឹក ១ តម្លៃសរុបប្រមាណជិត ១២លានរៀល ជាថវិកាបដិភាគ របស់សាខាសាលាគណ សាលាអនុគណ អនុសាខាស្រុក ចៅអធិការវត្តទូទាំងស្រុកចំការលើ និងសប្បុរសជនផងដែរ ជូនលោកតា បួ កប ស្នាក់នៅតទៅ។
ជាមួយគ្នានោះដែរ ដើម្បីជួយសម្រាលជីវភាពរស់នៅ , សាខា បានផ្តល់សម្ភារ គ្រឿង ឧបភោគ បរិភោគ ជូនទុរគតជនជរា រូបនេះ សម្រាប់សង្កត់ផ្ទះថ្មី រួមមាន អង្ករ ៥០គក្រ, ត្រីខ ២០កំប៉ុង, ទឹកត្រី ១២ដប ទឹកស៊ីអ៊ីវ ១២ដប, មី ២កេស, ឃីត ២សម្រាប់, អាវយឺត ១២ , សាប៊ូ ១៦ដុំ , សម្ភារផ្ទះបាយ និង ថវិកា ២០០,០០០រៀល ។ជាមួយនោះលោកតា លោកយាយ ដែលចូលរួមជាសាក្សី ក្នុងពិធីប្រគល់-ទទួលផ្ទះថ្មីនេះ ចំនួន ១២នាក់ ក៏បានទទួលអំណោយពីសាខាកាកបាទក្រហមកម្ពុជាខេត្តផងដែរ៕ រក្សាសិទ្ធដោយ ៖ ភ្នំប្រុសភ្នំស្រី
