ព្រះសីហនុ៖ ក្រសួងផែនការ បានចុះផ្សព្វផ្សាយច្បាប់ស្ដីពីស្ថិតិថ្នាក់ក្រោមជាតិ ជូនដល់វិស័យឯកជន ពិសេសមន្ត្រីរាជការ នៃរដ្ឋបាលខេត្តព្រះសីហនុ ដើម្បីពង្រឹងគុណភាព នៃការអនុវត្តច្បាប់ស្ថិតិ អោយទទួលជោគជ័យ ដល់ផែនការអភិវឌ្ឍសង្គមជាតិ។
សិក្ខាសាលានេះ រៀបចំ កាលពីថ្ងៃទី២៣ ខែវិច្ឆិកា នាសាលប្រជុំ របស់សាលាខេត្តព្រះសីហនុ ដោយមានតំណាងមកពីក្រសួងផែនការ មន្ទីរស្ថាប័នរដ្ឋ ក្រោមឱវាទរដ្ឋបាលខេត្តព្រះសីហនុ និងតំណាងវិស័យឯកជន នាខេត្តព្រះសីហនុ ជាច្រើនស្ដាប័ន បានចូលរួម។
នាឱកាសនោះ លោក យន្ត មីន អភិបាលខេត្តព្រះសីហនុ និង លោក ឆាយ ថន ទេសរដ្ឋមន្ត្រីរដ្ឋមន្ត្រីក្រសួងផែន មានចំណាប់អារម្មណ៍ប្រហាក់ប្រហែលគ្នា ដោយចាត់ទុកថា ទិន្នន័យស្ថិតិ មានសារៈសំខាន់បំផុត ក្នុងការកំណត់គោលនយោបាយ ដើម្បីអភិវឌ្ឍន៍សេដ្ឋកិច្ច សង្គមកិច្ច ការវាយតំលៃភាពក្រីក្រ និងការត្រួតពិនិត្យ ដើម្បីឈានទៅសម្រេចបានគោលដៅអភិវឌ្ឍន៍សហសវត្សរ៍ឆ្នាំ២០១៥ និងបន្តចូលដល់គោលដៅការអភិវឌ្ឍន៍ប្រកបដោយចីរភាពឆ្នាំ២០១៦-២០៣០ ដែលរួមមាន ១៧គោលដៅ ១៦៩ចំណុច និងជាង ២៣០ សូចនាករ។
លោកទេសរដ្ឋមន្ត្រី ឆាយ ធន មានប្រសាសន៍ថា ដើម្បីមានទិន្នន័យសម្រាប់សូចនាករទាំងអស់ខាងលើ អោយទទួលបានជោគជ័យ គឺចាំបាច់តម្រូវអោយអ្នកទទួលខុសត្រូវ ដឹកនាំការធ្វើទិន្នន័យស្ថិតិនេះ ចុះអង្គេតតាមដាន និងធ្វើជំរឿនផ្សេងៗ មាននៅក្នុងច្បាប់ស្ដីពីស្ថិតិ ដែលបានចែងថា វិទ្យាស្ថានជាតិស្ថិតិ ត្រូវដឹកនាំជំរឿន ស្ថិតិចំនួន ៣ រួមមាន៖ ជំរឿនប្រជាជន ជំរឿនសេដ្ឋកិច្ច និងជំរឿនកសិកម្ម ដោយត្រូវអនុវត្តជារៀងរាល់ ១០ឆ្នាំម្ដង ព្រមទាំងអង្គេតសេដ្ឋកិច្ចសង្គមកិច្ចត្រូវធ្វើរាល់ឆ្នាំ។
លោករដ្ឋមន្ត្រី ឆាយ ថន បញ្ជាក់បន្ថែមថា ច្បាប់ស្ដីពីស្ថិតិ នឹងជួយពង្រឹង និងជំរុញការប្រមែប្រមូលទិន្នន័យតាមរយៈការធ្វើជំរឿន និងការអង្គេតត្រួតពិនិត្យ ព្រោះទិន្នន័យស្ថិតិ គឺជាឧបករណ៍ចាំបាច់បំផុត របស់អ្នកធ្វើផែនការ បើគ្មានទិន្នន័យស្ថិតិ គឺផែនការអភិវឌ្ឍន៍ គឺស្ថិតក្នុងភាពមិនច្បាស់លាស់។ ក្នុងនោះ ការគិតគូរពីកំណើនសេដ្ឋកិច្ច និងចំណូលប្រចាំឆ្នាំ របស់ប្រជាជនម្នាក់ៗ គឺចាំបាច់ត្រូវមានទិន្នន័យស្ថិតិអោយបានច្បាស់លាស់។
ច្បាប់ស្ដីពីស្ថិតិ ដែលបានចូលជាធរមាន កាលពីឆ្នាំ២០១៥ ជាលទ្ធផលបានផ្ដល់ នូវមូលដ្ឋានគតិយុត្តិប្រកបដោយសក្ដានុពល និងអនុញ្ញាតិអោយវិទ្យាជាតិស្ថិតិ នៃក្រសួងផែនការប្រតិបត្តិយ៉ាងទូលំទូលាយពេញទូទាំងប្រទេស ក្នុងការផលិតទិន្នន័យស្ថិតិស្នើរគ្រប់វិស័យ តាមវិធីសាស្ត្របច្ចេកទេសទំនើប គឺធ្វើជំរឿន និងអង្គេតដើម្បីទទួលបានទិន្នន័យស្ថិតិត្រឹមត្រូវ ដែលឈានទៅកំណត់គោលដៅ នៃ គោលនយោបាយអភិវឌ្ឍន៍ របស់រដ្ឋាភិបាល និងដៃគូរអភិវឌ្ឍន៍ ប្រកបដោយប្រសិទ្ធភាព ព្រមទាំងសម្រេចបាន តាមគោលដៅជាក់លាក់ដ៏ត្រឹមត្រូវមួយ៕ ដោយ៖ ដែន សីមា
