ខេត្តកណ្តាល និងខេត្តតាកែវ ៖ ព្រឹកថ្ងៃពុធ ទី២៩ ខែមករាឆ្នាំ២០២៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអញ្ជើញចុះពិនិត្យកិច្ចអន្តរាគមន៍បូមទឹកសង្គ្រោះស្រូវប្រជាពលរដ្ឋនៅក្នុងខេត្តកណ្តាល និងខេត្តតាកែវ។ ដំណើរចុះទៅពិនិត្យកិច្ចអន្តរាគមន៍របស់សម្តេចនាយករដ្ឋមន្ត្រីនាព្រឹកថ្ងៃនេះ ជាដំណើរឆ្មក់ចុះ ដោយមិនមានការជូនដំណឹងអ្វីនោះឡើយ ហើយមានការអមដោយរដ្ឋមន្ត្រីតែពីររូបប៉ុណ្ណោះ គឺរដ្ឋមន្ត្រីធនធានទឹកនិងរដ្ឋមន្ត្រីក្រសួងអភិវឌ្ឍន៍ជនបទ។
តាមរយៈបណ្តាញសង្គមផ្លូវការ សម្តេចនាយករដ្ឋមន្រ្តី បានមានប្រសាសន៍ថា ឆ្លៀតឱកាសចុះទៅពិនិត្យការអន្តរាគមន៍បូមទឹកសង្គ្រោះស្រូវ របស់បងប្អូនប្រជាកសិករដែលកំពុងមានតម្រូវការទឹក ក្នុងការដាក់បំពេញស្រូវនៅព្រែកអំបិល ស្រុកស្អាង ខេត្តកណ្តាល និងស្រុកព្រៃកប្បាស ខេត្តតាកែវ ចំនួនជិត ២ពាន់ហិកតា និងតាមបណ្តោយប្រឡាយហនុមាន ឃុំពត់សរ ស្រុកបាទី ខេត្តតាកែវ ចំនួនជិត ៤ពាន់ហិកតា ។ ការអន្តរាគមន៍ដែលឈរលេីមានប្រភពទឹកគ្រប់គ្រាន់, រាជរដ្ឋាភិបាល គឺបានខិតខំគ្រប់លទ្ធភាពក្នុងការបូមទឹកសង្គ្រោះផង ហើយក៏បានអន្តរាគមន៍ពង្វាងទឹកចេញពីទំនប់ទឹកតាសាល មកបំពេញបន្ថែមក្នុងទន្លេបាទី ដើម្បីអាចនឹងធានាដល់ការប្រើប្រាស់នារដូវប្រាំងខាងមុខផងដែរ។
ព្រមជាមួយនេះ ក៏បានឆ្លៀតចុះពិនិត្យប្រព័ន្ធធារាសាស្ត្រដែលជាប្រព័ន្ធមានលក្ខណ:ពេញលេញ ធានាការស្រោចស្រពពេញមួយឆ្នាំ ដែលមានការចងក្រងជាសហគមន៍ ដោយរៀបចំដោយនាយកដ្ឋានសហគមន៍កសិករប្រើប្រាស់ទឹក របស់ក្រសួងធនធានទឹក និងឧតុនិយម។ ជាលទ្ធផល ពួកគាត់អាចបង្កបង្កើនផលបីដងក្នុងមួយឆ្នាំ ដោយមិនមានការខ្វះខាតទឹក ទូទាំង ២,៥០០ហិកតា ហើយបាននឹងពង្រីកបន្ថែមចំនួនជាង ៥០០ហិកតា ទៀត ជាពិសេសក៏នៅមានសល់ទឹកអាចបូមអន្តរាគមន៍សង្គ្រោះស្រូវដែលនៅក្បែរនោះបានជិត ១ពាន់ហិកតា បន្ថែមផងដែរ។
ព្រមជាមួយគ្នានេះ ក៏បានឈាងចូលពិនិត្យផងដែរ នៅការដ្ឋានកសាង និងស្តាប្រឡាយលេខ ៩៦ ដែលជាប្រឡាយដ៏ធំមួយក្នុងចំណោមប្រឡាយជាច្រើន ដែលមានទំហំទទឹង ៨០ម៉ែត្រ ដោយនឹងតភ្ជាប់ទៅទន្លេបាសាក់ និងព្រែកជីកហ្វូណន ក្នុងគម្រោងនៃការពង្វាងទឹកជំនន់ពីរាជធានីភ្នំពេញ និងពហុបំណងនៃការស្តុកទឹកសម្រាប់បម្រើដល់ការស្រោចស្រពផង និងផ្លូវទឹកផងដែរ៕ រក្សាសិទ្ធដោយ៖សុទ្ធលី
