យន្តហោះដឹកអ្នកដំណើរ Air Busan Airbus របស់កូរ៉េខាងត្បូងបានឆេះនៅអាកាសយានដ្ឋានអន្តរជាតិ Gimhae ភាគខាងត្បូងប្រទេសកូរ៉េខាងត្បូង ខណៈដែលយន្តហោះនេះកំពុងហៀបនឹងចេញដំណើរ ក្នុងគោលដៅឆ្ពោះទៅកាន់ទីក្រុងហុងកុង កាលពីយប់ថ្ងៃចន្ទ (២៨ មករា)។ តែជាសំណាងល្អ អ្នកដំណើរទាំង ១៦៩ នាក់ និងសមាជិកនាវិក ៧ នាក់ នៅលើយន្តហោះ ត្រូវបានជម្លៀសចេញទាន់ពេលវេលា ដោយមានតែមនុស្ស ៣ នាក់ ប៉ុណ្ណោះ បានរងរបួសស្រាល។
នាយកដ្ឋានពន្លត់អគ្គិភ័យក្រុង Busan ទទួលបានដំណឹងថា មានអគ្គិភ័យឆាបឆេះខាងក្នុងតួយន្តហោះ នៅម៉ោងប្រហែល ១០ និង ៣០ នាទីយប់ ម៉ោងក្នុងស្រុក ខណៈទីភ្នាក់ងារសារព័ត៌មានយ៉ុនហាប់ បានរាយការណ៍ថា ភ្លើងបានចាប់ផ្តើមនៅផ្នែកកន្ទុយនៃយន្តហោះ។
វីដេអូដែលចេញផ្សាយដោយទូរទស្សន៍ YTN បង្ហាញពីការប្រើប្រាស់ស្លាយ ដើម្បីជម្លៀសអ្នកដំណើរចេញពីយន្តហោះទាំងពីរផ្នែក ខណៈដែលក្រុមអ្នកជួយសង្គ្រោះបានដោះស្រាយជាមួយផ្សែង និងអណ្តាតភ្លើង។
ចំពោះមូលហេតុ នៃឧបទ្ទវហេតុនេះ គេក៏អាចដឹងច្បាស់ភ្លាមៗនោះទេ ដោយរង់ចាំស៊ើបអង្កេតជាក្រោយ។
គួរបញ្ជាក់ថា ឧបទ្ទវហេតុដ៏គួរឱ្យភ្ញាក់ផ្អើលនេះបានកើតឡើងត្រឹមតែមួយខែប៉ុណ្ណោះ បន្ទាប់ពីយន្តហោះ Jeju Air Boeing ដែលកំពុងធ្វើដំណើរពីទីក្រុងបាងកកបានរអិលចេញពីផ្លូវរត់នៅឯអាកាសយានដ្ឋានអន្តរជាតិ Muan បន្ទាប់ពីចុះចត ហើយកង់របស់វាជាប់គាំង។ ឧបទ្ទវហេតុធ្លាក់នេះ បានសម្លាប់អ្នកដំណើរ និងនាវិកចំនួន ១៧៩នាក់ ដោយក្នុងនោះមានសមាជិកនាវិកពីរនាក់ប៉ុណ្ណោះ ដែលនៅផ្នែកកន្ទុយ មានសំណាងបំផុតនៅមានជីវិត៕
