ខេត្តស្វាយរៀង ៖ អាជ្ញាធរខេត្តស្វាយរៀង បានធ្វើការរំដោះមនុស្ស១៤នាក់ និង១២នាក់ត្រូវចាប់ខ្លួន ក្រោយមានការចែករំលែកវីដេអូឃ្លីបមួយលើបណ្តាញព័ត៌មានសង្គម បង្ហាញពីសកម្មភាពមនុស្សមួយក្រុមស្លៀកឈុតពណ៌ខ្មៅ វាយទៅលើជនជាតិបរទេសយ៉ាងកំរោល នៅថ្ងៃទី៣០ ខែមករា ឆ្នាំ២០២៥ ។
ក្រោយមានការចែករំលែក វីដេអូឃ្លីបមួយលើបណ្តាញព័ត៌មានសង្គម បង្ហាញពីសកម្មភាព មនុស្សមួយក្រុម ស្លៀកឈុតពណ៌ខ្មៅវាយទៅលើជនជាតិបរទេសយ៉ាងកំរោល បន្ទាប់ពីព្យាយាមរត់ចេញ ទីតាំងអគារអនឡាញ ស្ថិតក្នុងភូមិសាស្ត្រក្រុងបាវិត ពេលនេះ លោកអភិបាលរងខេត្តស្វាយរៀង លោក ម៉ែន អេង បញ្ជាក់ថា អាជ្ញាធរបានធ្វើការរំដោះមនុស្សចំនួន១៤នាក់ និង១២នាក់ត្រូវចាប់ខ្លួន។
កម្លាំងផែនការងារនគរបាលព្រហ្មទណ្ឌ ដឹកនាំដោយលោកវរសេនីយ៍ឯក គឹម ឡៃ ស្នងការរងនៃកម្លាំងអធិការដ្ឋាននគរបាលក្រុងបាវិត កម្លាំងកងរាជអាវុធហត្ថក្រុងបាវិត និងដោយមានការសម្របសម្រួលនីតិវិធីច្បាប់ពីលោក ឡាយ ជុងហេង ព្រះរាជអាជ្ញារងនៃអយ្យការអមសាលាដំបូងខេត្តស្វាយរៀង បានចុះទៅដល់ក្រុមហ៊ុនកាស៊ីណូ អេអាយកាំង ស្ថិតក្នុងភូមិប្រាសាទ សង្កាត់ប្រាសាទ ក្រុងបាវិត ដើម្បីធ្វើការស្រាវជ្រាវ និងពិនិត្យជុំវិញទីតាំងកើតហេតុ។
ជាលទ្ធផលក្នុងការស្រាវជ្រាវ និងពិនិត្យតាមរយៈកាមេរ៉ាសុវត្ថិភាព សមត្ថកិច្ចបានធ្វើការរំដោះ ជនជាតិវៀតណាម១៤នាក់ ខណៈជនស្ស័យ ត្រូវបានអាជ្ញាធរអះអាងថា បានឃាត់ខ្លួនក្នុងករណីនោះ សុទ្ធសឹងតែបុរសជាសន្តិសុខ និងមេការសន្តិសុខ ក្នុងទីតាំងកើតហេតុ។
ជនសង្ស័យដែលត្រូវឃាត់ខ្លួនមានជាតិខ្មែរ និងចិន៖ ឈ្មោះ ហ្គួ សុង ជនជាតិចិន, ឈ្មោះ លីវ វ៉ី ជនជាតិចិន, ឈ្មោះ ចូ ហុងពីង ជនជាតិចិន, ឈ្មោះ មីវ យៀនសិ ជនជាតិចិន, ឈ្មោះ ទេព មានុន ជនជាតិខ្មែរ, ឈ្មោះ ឆុន ពិសិទ្ធ ជនជាតិខ្មែរ, ឈ្មោះ ឡេង សុផាត ជនជាតិខ្មែរ, ឈ្មោះ ប៉ែន សំណាង ជនជាតិខ្មែរ, ឈ្មោះ សកា វែន ជនជាតិខ្មែរ, ឈ្មោះ ខែម ខួច ជនជាតិខ្មែរ, ឈ្មោះ ប៉ោ ភារម្យ ជនជាតិខ្មែរ, ឈ្មោះ ឃាន ប៉ាទី ជនជាតិខ្មែរ។
មកទល់ពេលនេះ ជនសង្ស័យ កំពុងឃាត់ខ្លួននៅអធិការដ្ឋាននគរបាលក្រុងបាវិត ដើម្បីសាកសួរ និងកសាងសំណុំរឿងបញ្ជូនទៅតុលាការ៕ រក្សាសិទ្ធដោយ៖សុទ្ធលី
