ភ្នំពេញ ៖ សម្តេច ហេង សំរិន បានថ្លែងថា ទាំងរដ្ឋសភា និងរាជរដ្ឋាភិបាលកម្ពុជា យកចិត្តទុកដាក់ និងជម្រុញលើកទឹកចិត្តចំពោះវិនិយោគផ្ទាល់ ពីបរទេសលើគ្រប់វិស័យ ហើយទទួលបានការចាប់ អារម្មណ៍ និងការគាំទ្រ ដោយមានក្រុមហ៊ុនធំៗ ពី បរទេសជាច្រើន បាន និងកំពុងអនុវត្តផែនការវិនិយោគ របស់ពួកគេ។
ក្នុងឱកាសនោះដែរ លោក កឺ ឈួនបាវ នាយកប្រតិបត្តិក្រុមហ៊ុន សៀងហៃ គួស៊ីគ្រុប ខេត្តចាំងស៊ូរបស់ប្រទេសចិន បានស្នើសុំ សម្តេចអគ្គមហាពញាចក្រី ហេង សំរិន ប្រធានរដ្ឋសភា គាំទ្រ និងផ្តល់កិច្ចសហការដល់ក្រុមហ៊ុនរបស់លោក ដែលមានបំណងយ៉ាងមុះមុត នៅក្នុងការវិនិយោគនៅកម្ពុជា ដែលជាផ្នែកមួយ ចូលរួមចំណែកអភិវឌ្ឍន៍កម្ពុជា ពិសេសការផ្តល់ការងារដល់ប្រជាពលរដ្ឋខ្មែរ។
សម្តេចអគ្គមហាពញាចក្រី ហេងសំរិន ប្រធានរដ្ឋសភា នៃព្រះរាជាណាចក្រកម្ពុជា បានអនុញ្ញាតឲ្យលោក កឺ ឈួនបាវ នាយកប្រតិ បត្តិក្រុមហ៊ុន សៀងហៃ គួស៊ីគ្រុប ខេត្តចាំងស៊ូ ព្រមទាំងសហការី ចូលជួបសម្តែងការគួរសម នៅវិមានរដ្ឋសភាកាលពីព្រឹកថ្ងៃទី១៣ខែកញ្ញាឆ្នាំ២០១៨។
សម្តេចអគ្គមហាពញាចក្រី ហេង សំរិន បានមានប្រសាសន៍ថា ប្រទេសកម្ពុជាបច្ចុប្បន្ន មានសុខសន្តិភាព ស្ថិរភាព នយោបាយល្អ និងមានស្ថិរភាពម៉ាក្រូសេដ្ឋកិច្ចល្អប្រសើរ។ ទិសដៅតែមួយគត់ ដែលកម្ពុជាកំពុងធ្វើ គឺ ជម្រុញការអភិវឌ្ឍសេដ្ឋកិច្ច ឲ្យបានខ្លាំងក្លា។ រាជរដ្ឋាភិបាល បានចាត់ទុក វិស័យឯកជន ជាដៃគូរដ៏មានសក្តានុពល ដើម្បីជួយជម្រុញការអភិវឌ្ឍប្រទេសជាតិ ឲ្យកាន់តែមានការរីកចម្រើនបន្ថែមទៀត។
នៅក្នុងឱកាសនោះ លោកនាយកប្រតិបត្តិក្រុមហ៊ុន បានជម្រាបសម្តេចប្រធានថា បន្ទាប់ពីបានបំពេញទស្សនកិច្ចនៅកម្ពុជា លោកបានសង្កេតឃើញ ពីសក្តានុពលយ៉ាងខ្លាំង របស់កម្ពុជា ហើយនៅពេលត្រឡប់ទៅប្រទេសចិនវិញ ក្រុមហ៊ុនលោក នឹងទាក់ទាញអ្នកវិនិយោគនានា មកបណ្តាក់ទុននៅកម្ពុជា។
ក្រុមហ៊ុនសៀងហៃ គួស៊ីគ្រុប ខេត្តចាំងស៊ូ គឺជាក្រុមហ៊ុនធំរបស់ចិន ដែលមានទុនវិនិយោគមកពីប្រទេសសឹង្ហបុរី និងសហរដ្ឋអាមេរិក ដែលមានទុន វិនិយោគប្រមាណ១៩ពាន់លានដុល្លារ។ ការវិនិយោគនៅកម្ពុជា ជាផ្នែកមួយក្នុងការអនុវត្ត តាមយុទ្ធសាស្ត្រខ្សែក្រវ៉ាត់មួយផ្លូវមួយរបស់ចិន។ នេះជាការ បញ្ជាក់បន្ថែមរបស់ លោក កឺ ឈួនបាវ។
សម្តេចអគ្គមហាពញាចក្រី ហេង សំរិន បានគាំទ្រចំពោះគម្រោងវិនិយោគនេះ ដោយសម្តេចបានគូសបញ្ជាក់ថា ទាំងរដ្ឋសភា និងរាជរដ្ឋាភិបាល កម្ពុជា យកចិត្តទុកដាក់ និងជំរុញលើកទឹកចិត្ត ចំពោះវិនិយោគផ្ទាល់ពីបរទេសលើគ្រប់វិស័យ ហើយទទួលបានការចាប់អារម្មណ៍ និងការគាំទ្រដោយមាន ក្រុមហ៊ុនធំៗពីបរទេសជាច្រើន បាននឹងកំពុងអនុវត្តផែនការវិនិយោគរបស់ពួកគេ។
សម្តេចប្រធានរដ្ឋសភា បានមានប្រសាសន៍បន្តថា ការភ្ជាប់ជើងហោះហើរត្រង់មកកម្ពុជា ពីបណ្តាប្រទេសមានសេដ្ឋកិច្ចលូតលាស់ផ្សេងៗ វាបានជម្រុញឲ្យមានកំណើនទេសចរណ៍ និងការវិនិយោគផ្ទាល់ ពីបរទេសមកកាន់កម្ពុជាកាន់តែច្រើនរៀងរាល់ឆ្នាំ ជាពិសេសប្រទេសចិនផ្ទាល់តែម្តង។ ចំណែកប្រទេសចិន ចិនគឺជាដៃគូរវិនិយោគដ៏មានសក្តានុពលរបស់កម្ពុជា។ គិតមកដល់ឆ្នាំ២០១៧ ទុនវិនិយោគរបស់ចិនឈរនៅលេខរៀងលំដាប់ ទី១ គឺមានទឹកប្រាក់ប្រមាណជា១៦ពាន់លានដុល្លារអាមេរិក។
បើតាមគម្រោងក្រុមហ៊ុនចិន សៀងហៃ គួស៊ីគ្រុប នឹងចុះកិច្ចព្រមព្រៀងវិនិយោគ ជាមួយក្រុមហ៊ុនក្នុងស្រុកមួយ ឈ្មោះ ឆាយ ឆាយ អ៊ិនវេសម៉េន ក្នុងទំហំទឹកប្រាក់២០០លានដុល្លារអាមេរិក ៕
ដោយ ៖ កូឡាប
