ភ្នំពេញ ៖ សម្តេចតេជោ ហ៊ុន សែន បានប្រកាសសារជាថ្មីថា នឹងមិនអត់ឱនឱ្យអ្នកដែលញុះញង់ធ្វើរដ្ឋប្រហារយោធា និងបដិវត្តន៍ពណ៌ដើម្បីបំផ្លាញសន្តិភាពនៅកម្ពុជាជាដាច់ខាត ព្រោះមានតែសន្តិភាពប៉ុណ្ណោះ ដែលអាចធ្វើឱ្យប្រទេសជាតិយើង បានរីកចម្រើនទៅមុខជាលំដាប់ ពីមួយថ្ងៃទៅមួយ ថ្ងៃឥតឈប់ឈរ។
សម្តេចនាយករដ្ឋមន្ត្រីបានថ្លែងដូចនេះ នៅថ្ងៃទី៨ ខែវិច្ឆិកា ឆ្នាំ២០១៨ ក្នុងឱកាសអញ្ជើញជួបសំណេះសំណាល និងផ្ដល់រង្វាន់លើកទឹកចិត្តដល់សិស្សានុសិស្សដែលបានប្រឡងជាប់សញ្ញាប័ត្រមធ្យមសិក្សាទុតិយភូមិ (បាក់ឌុប) ទទួលបាននិទ្ទេសA ចំនួន៤០៨នាក់ ដែលពិធីនេះបានធ្វើឡើងនៅវិមានសន្តិភាព រាជធានីភ្នំពេញ។
សម្តេចតេជោ បានគូសបញ្ជាក់ថា នៅពេលដែលប្រទេសជាតិបាត់បង់សន្តិភាព សូម្បីតែអាយុជីវិតរបស់ខ្លួន ក៏ការពារមិនបានផង កុំថាឡើយការអភិវឌ្ឍន៍សេដ្ឋកិច្ចជាតិ និងសង្គមនោះ។ ដូច្នេះហើយយើងត្រូវតែការសន្តិភាពឱ្យបាន ទោះក្នុងតម្លៃណាក៏ដោយ។
សម្តេចតេជោ បានថ្លែងថា ការញុះញង់ដើម្បីបំផ្លាញសុខសន្តិភាពមិនត្រូវអត់ឱននោះទេ។ ការធ្វើរដ្ឋប្រហារតាមយោធា ក៏ដូចជាតាមវិធីផ្សេងៗ ដែលមិនមែនជាដំណើរការប្រជាធិបតេយ្យមិនអាចអត់ឱនឲ្យបាននោះឡើយ។ ចង់នរណាថាយ៉ាងម៉េច ឲ្យសម្តេច ក៏ថាទៅ ប៉ុន្តែអ្នកដែលថាឲ្យសម្តេច ក៏បានទទួលប្រយោជន៍ ពីនយោបាយរក្សាសុខសន្តិភាព របស់សម្តេចនេះផងដែរ៕ ដោយ ៖ បញ្ញាស័ក្តិ
