ភ្នំពេញ ៖ ឯកអគ្គរដ្ឋទូតសហរដ្ឋអាមេរិកប្រចាំកម្ពុជា បានអះអាងថា ក្រសួងការងារ ជាដៃគូសហប្រតិបត្តិការដ៏ល្អ ដែលយើងបានធ្វើការខិតខំរួមគ្នាកន្លងមក ក្នុងការដោះស្រាយបញ្ហាប្រឈម បញ្ហាធ្វើឱ្យមានការរីកចម្រើនជាច្រើនជាមួយគ្នា ដែលវាបានឆ្លុះបញ្ចាំង នូវកិច្ចសហប្រតិបត្តិការដ៏ល្អ រវាងសហរដ្ឋអាមេរិក ជាមួយនិងកម្ពុជា។
នាទីស្តីការក្រសួងការងារ នៅព្រឹកថ្ងៃទី៨ ខែវិច្ឆិកា ឆ្នាំ២០១៨លោក បណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានអនុញ្ញាតឱ្យលោក William A. Heidt ឯកអគ្គរដ្ឋទូតសហរដ្ឋអាមេរិកប្រចាំកម្ពុជា ដែលត្រូវបញ្ចប់បេសកម្មរបស់ឯកឧត្តមនៅកម្ពុជា ចូលជួបសម្តែងការគួរសម ជម្រាបលាមុនចេញដំណើរ។
នៅក្នុងជំនួបនោះ លោកអគ្គរដ្ឋទូតបានរំលឹកឡើងវិញ នូវអនុស្សារីយ៍ ខណៈពេលដែលលោកអគ្គរដ្ឋទូត មានវត្តមានបំពេញបេសកម្មការទូត នៅក្នុងព្រះរាជាណាចក្រកម្ពុជាកន្លងមក ។ លោក William A. Heidt ពិតជារីករាយ ដែលស្ថានទូតសហរដ្ឋអាមេរិក ធ្លាប់បានសហការជាមួយ ក្រសួងស្ថាប័ន របស់រដ្ឋាភិបាលកម្ពុជា និងភាគីពាក់ព័ន្ធនានា ។ ចំពោះ ក្រសួងការងារ និងបណ្តុះបណ្តាលវិជ្ជាជីវៈ ជាដៃគូសហប្រតិបត្តិការដ៏ល្អ ដែលយើងបានធ្វើការខិតខំរួមគ្នាកន្លងមក ក្នុងការដោះស្រាយបញ្ហាប្រឈម បញ្ហាធ្វើឱ្យមានការរីកចម្រើនជាច្រើនជាមួយគ្នា ដែលវាបានឆ្លុះបញ្ចាំង នូវកិច្ចសហប្រតិបត្តិការដ៏ល្អ រវាងសហរដ្ឋអាមេរិក ជាមួយនិងកម្ពុជា។
លោករដ្ឋមន្ត្រី មានប្រសាសន៏ថា៖ “ខ្ញុំពិតជាមានការសប្បាយរីករាយផង និងអាឡោះអាល័យផង នាឱកាសដែលលោកឯកអគ្គរដ្ឋទូត ត្រូវបញ្ចប់បេសកម្មការទូតនៅកម្ពុជា។ ពេលវេលាដូចជាលឿនណាស់ រយៈពេលមួយអាណត្តិរបស់លោកកន្លងមកនេះ យើងមានទំនាក់ទំនងទៅលើវិស័យពាណិជ្ជកម្ម លក្ខខណ្ឌការងារជាដើម”។ ក្នុងនាមក្រសួងការងារ និងបណ្តុះបណ្តាលវិជ្ជាជីវៈ លោករដ្ឋមន្ត្រី សូមអរគុណ និងសម្តែងនូវការវាយតម្លៃខ្ពស់ចំពោះបេសកម្ម របស់ឯកឧត្តមអគ្គរដ្ឋទូត ដែលបានរួមវិភាគទានដ៏សំខាន់ ក្នុងការអភិវឌ្ឍសេដ្ឋកិច្ច-សង្គមនៅកម្ពុជាកន្លងមក៕ ដោយ ៖ កូឡាប
