ខេត្តព្រះសីហនុ៖ កាលពីព្រឹកថ្ងៃទី១៦ ខែវិច្ឆិកា ឆ្នាំ២០១៨ ក្រសួងបរិស្ថាន សហការជាមួយរដ្ឋបាលខេត្តព្រះសីហនុ រៀបចំទិវាអនាម័យបរិស្ថានជាតិ ២៣ វិច្ឆិកា ឆ្នាំ២០១៨ នៅវេទិការបុណ្យជាតិ ៧មករា ស្ថិតក្នុងសង្កាត់លេខ៣ ក្រុងព្រះសីហនុ។
ពិធីនេះ ក្រោមអធិបតីភាព លោក ស៊ុន យ៉ារ៉ែន អនុរដ្ឋលេខាធិការក្រសួងបរិស្ថាន និងលោក ឈិន សេងងួន អភិបាលរងខេត្តព្រះសីហនុ និងមានការចូលរួមពីតំណាងមន្ទីរ អង្គភាព កងកម្លាំងប្រដាប់អាវុធ អាជីវករ ប្រជាពលរដ្ឋ លោកគ្រូ អ្នកគ្រូ និងសិស្សានុសិស្ស យ៉ាងច្រើនកុះករ។
នាឱកាសនោះ លោក ឈិន សេងងួន អភិបាលរងខេត្តព្រះសីហនុ មាន ប្រសាសន៍ថា ទិវាអនាម័យបរិស្ថាន ២៣ វិច្ឆិកា គឺជាការបំផុសប្រជាពលរដ្ឋ ចលនាគាំពារបរិស្ថាន អភិរក្សជីវ:ចម្រុះ និងការរស់នៅប្រកបដោយចីរភាព ក្រោមប្រធានបទ” រួមគ្នាដើម្បីបរិស្ថានស្អាត” និងការចូលរួមកាត់បន្ថយថង់ផ្លាស្ទិក សំដៅធានាឱ្យកិច្ចគាំពារសុខភាពសាធារណៈ បរិស្ថាន និងសោភ័ណភាព ដើម្បីកាត់បន្ថយការបំពុលដោយផ្លាស្ទិច ការផ្តល់ថង់ផ្លាស្ទិចស្ដើង មានដៃយូរដល់អតិថិជននៅតាមបណ្ដាមជ្ឈមណ្ឌលពាណិជ្ជកម្ម និងផ្សារទំនើប ត្រូវបានគិតកម្រៃបន្ថែម។
លោកបន្តថា ការផ្លាស់ប្តូរអរិយាបទ របស់ប្រជាពលរដ្ឋ ឱ្យងសកមករួមគ្នាសំអាតអនាម័យបរិស្ថាន គឺផ្តើមចេញពីខ្លួនយើង គ្រួសារ និងសហគមន៍ របស់យើងមានបរិស្ថានល្អ នៅទីក្រុង របស់យើងឱ្យមានអនាម័យជាប្រចាំ។
ផ្តើមពីបញ្ហានេះ លោក ឈិន សេងងួន បានសំណូមពរដល់ប្រជាពលរដ្ឋត្រូវចូលរួមថែរក្សា សំអាតអនាម័យក្នុងក្រុងរបស់យើង ឱ្យបានទាំងអស់គ្នា ដើម្បីដោះស្រាយនូវបញ្ហាប្រឈមខាងលើ និងដើម្បីស្ដារឡើងវិញ នូវការខូចខាតផ្នែកបរិស្ថាន គឺទាមទារឱ្យយើងទាំងអស់គ្នា ត្រូវផ្តើមយកចិត្តទុកដាក់ ថែរក្សាភពផែនដី ពីភូមិ ស្រុកនីមួយៗ រហូតដល់ប្រទេស និងទូទាំងពិភពលោក ធ្វើយ៉ាងណាលើកកម្ពស់ នូវកិច្ចគាំពារបរិស្ថានការគ្រប់គ្រងធនធានធម្មជាតិ ការអភិរក្សជីវៈចម្រុះ និងការអភិវឌ្ឍដោយចីរភាព។
ចំណែក លោក ស៊ុន យ៉ារ៉ែន អនុរដ្ឋលេខាធិការក្រសួងបរិស្ថាន មានប្រសាសន៍ថា ទិវាអនាម័យបរិស្ថានជាតិនេះ មានគោលបំណង ចលនាឱ្យមានការចូលរួមធ្វើអនាម័យ នៅតាមលំនៅដ្ឋាន ទីធ្លាសាធារណ: និងទីប្រជុំជនក្នុងក្រុងជាដើម សំដៅធានាឱ្យមានបរិស្ថានស្រស់បំព្រង។ លោកថា បញ្ហានេះ គឺទាមទារឱ្យសហគមន៍នីមួយៗ ចូលរួមដោះ ស្រាយឱ្យបានទាំងអស់គ្នា ព្រោះថា រាល់ថ្ងៃនេះ យើងកំពុងប្រឈមបញ្ហាបរិស្ថានជាចម្បងចំបង នៅគ្រប់តំបន់ និងពិភពលោកនៅតាមប្រទេសនីមួយៗ មានជាអាទិ៍៖
១- ការកើនឡើងកំដៅភពផែនដី
២- គ្រោះរាំងស្ងួត និងទឹកជំនន់
៣- ការបាត់បង់ព្រៃឈើ និងជីវចម្រុះ
៤- កង្វះទឹកស្អាត និងថាមពល
៥- បញ្ហាជំងឺឆ្លង និងសន្តិសុខស្បៀង ។ល។ ដែលបញ្ហាប្រឈមទាំងអស់នេះ បានជះឥទ្ធិពល ទៅលើជីវភាពរស់នៅ សុខុមាលភាពមនុស្សនិងការអភិវឌ្ឍន៍ ប្រកបដោយចីរភាព ធ្វើឱ្យអន់ថយខាងផ្នែកសេដ្ឋកិច្ចជាដើម៕ ដោយ៖ ដែន សីមា
