ខេត្តព្រះសីហនុ ៖ នគរបាលចរាចរណ៍ នៃស្នងការដ្ឋានខេត្តព្រះសីហនុ បសនឱ្យដឹងថា មានគ្រោះថ្នាក់ចរាចរណ៍ បង្កដោយរថយន្ត១គ្រឿង បើកបរដោយជនជាតិចិន បើកបុកបន្តពី មួយទៅមួយ រហូតដល់ប្រជាពលរដ្ឋ ដេញស្ទាក់ចាប់បាន កាលពីល្ងាចថ្ងៃទី១៧ ខែវិច្ឆិកា ឆ្នាំ២០១៨ វេលាម៉ោង ១៦ និង៣៥នាទី។
សមត្ថកិច្ចឱ្យដឹងថា ដើមហេតុដំបូងការបុកប៉ះខាងលើនេះ គឺបានកើតឡើងនៅលើផ្លូវបេតុ ត្រង់ចំណុចបុរីប៊ីអេស អូរមួយ ស្ថិតក្នុងភូមិ៥ សង្កាត់លេខ៤ ក្រុងព្រះសីហនុ បង្កដោយរថយន្ត ១គ្រឿង ម៉ាក HYUNDAI STARIX ពណ៌ទឹកប្រាក់ ពាក់ផ្លាកលេខព្រះសីហនុ 2B-8018។
សមត្ថកិច្ចនគរបាលឱ្យដឹងបន្តថា រថយន្តបង្កគ្រោះថ្នាក់ចរាចរណ៍ខាងលើនេះ បើកបរដោយឈ្មោះ ZHEAR MING LUY ភេទប្រុស អាយុ១៦ឆ្នាំ ជនជាតិចិន មុខរបរបុគ្គលិកកាស៊ីណូស៊ិនយ៉ុងលី។ ជនជាតិចិនរូ នេះ ស្នាក់នៅក្នុងភូមិ៥ សង្កាត់លេខ៤ ក្រុងព្រះសីហនុ មានទិសដៅពីជើង ឆ្ពោះទៅត្បូង (បើកចេញពីក្នុងបូរីប៊ីអេសឆ្ពោះទៅផ្លូវមិត្តភាព) លុះដល់ចំណុចកើតហេតុបានបុកប៉ះលើកទី១ នឹងរថយន្ត ១គ្រឿងម៉ាក LEXUS RX330 ពណ៌ស ពាក់ផ្លាកលេខភ្នំពេញភ្នំពេញ2AQ-8189 បើកបរដោយឈ្មោះ ហេង ឡេង ភេទស្រី អាយុ៣៦ឆ្នាំ មុខរបរមេផ្ទះ ស្នាក់នៅភូមិ៥ សង្កាត់លេខ៤ ក្រុងព្រះសីហនុ មានទិសដៅផ្ទុយគ្នា រួចរថយន្តបង្កបានបើករត់ទៅបុកលើកទី២ នឹងម៉ូតូចំនួន ២គ្រឿងម៉ាក HONDA C125 និងម៉ាក SMASH ឈប់ចតមុខផ្ទះ ម្ចាស់ឈ្មោះ ឡឹង ស្កូដាលីន ភេទស្រី អាយុ៣៣ឆ្នាំ មុខរបរបុគ្គលិករដ្ឋាករទឹក ស្នាក់នៅភូមិ៥ សង្កាត់លេខ៤ ក្រុងព្រះសីហនុ។ ហើយ រថយន្តបង្ក ក៏បន្តបើករត់ទៅបុកលើកទី៣ គឺបុកម៉ូតូ១គ្រឿងទៀតម៉ាក HONDA C100 ពណ៌ខ្មៅ ពាក់ស្លាកលេខភ្នំពេញ1B-1339 បើកបរដោយឈ្មោះ សៅ សុផារ៉ូ ភេទប្រុស អាយុ៣០ឆ្នាំ មុខរបរកម្មករដឹកបាយហាងចិន ស្នាក់នៅភូមិ២ សង្កាត់លេខ៣ ក្រុងព្រះសីហនុ មានទិសដៅស្របគ្នា។
សមត្ថកិច្ចនគរបាលឱ្យដឹងបន្តថា បន្ទាប់ពីបានបុករះជាបន្តបន្ទាប់ៗ មករថយន្តបង្ក ក៏បានបើករត់រហូតទៅបុកលើកទី៤ គឺបុករថយន្ត១គ្រឿងទៀត ម៉ាក SIENNA ពណ៌ស ពាក់ផ្លាកលេខភ្នំពេញ 2AB-7572 ដែលឈប់ចតលើផ្លូវ ហើយអ្នកបើកបរឈ្មោះ រស់ ឧត្តម ភេទប្រុស អាយុ២៧ឆ្នាំ មុខរបរបុគ្គលិកក្រុមហ៊ុនទូរស័ព្ទវីវូ ស្នាក់នៅភូមិ៣ សង្កាត់លេខ២ ក្រុងព្រះសីហនុ មានទិសដៅស្របគ្នា។
បន្តមកទៀត រថយន្តបង្ក ក៏បានថយបុកកិនម៉ូតូ ១គ្រឿងទៀតម៉ាក HONDA C125 ពណ៌ខ្មៅ ពាក់ផ្លាកលេខ ព្រះសីហនុ 1H-6751 អ្នកបើកបរឈ្មោះ ម៉េត សុខន ភេទប្រុស អាយុ២៨ឆ្នាំ មុខរបរជាងដែក ហើយអ្នករួមដំណើរម្នាក់ឈ្មោះ ម៉េត មើត ភេទប្រុស អាយុ២៤ឆ្នាំ មុខរបរជាងដែក។ អ្នកទាំងពីរស្នាក់នៅភូមិ២ សង្កាត់លេខ២ ក្រុងព្រះសីហនុ មានទិសដៅពីស្របគ្នា។
ក្រោយកើតហេតុ អ្នកបើកបររថយន្តបង្កឈ្មោះ ZHEAR MING LUY ត្រូវបានប្រជាពលរដ្ឋចាប់ឃាត់ អូសចេញពីក្នុងរថយន្ត ចេញមកក្រៅរថយន្ត រួចបាននាំគ្នាវាយដំបណ្តាលឱ្យរងបួស។
សមត្ថកិច្ចនគរបាល បញ្ជាក់ថា គ្រោះថ្នាក់ចរាចរណ៍នេះ បណ្ដាលឱ្យរងរបួសមនុស្សចំនួន ៣នាក់ ៖
១- ឈ្មោះ ម៉េត សុខន អ្នកបើកបរម៉ូតូ HONDA C125 រងរបួសស្រាល។
២- ឈ្មោះ ម៉េត មើត អ្នករួមដំណើរលើម៉ូតូ HONDA C125 រងរបួសស្រាល។
៣- ឈ្មោះ ZHEAR MING LUY
អ្នកបើកបររថយន្ត HYUNDAI STARIX បង្កហេតុ រងរបួសមធ្យម បញ្ចូនទៅសម្រាកព្យាបាល នៅមន្ទីរពេទ្យបង្អែកខេត្តព្រះសីហនុ។
បញ្ជាក់៖ រថយន្ត១គ្រឿងម៉ាក SIENNA ខូចខាតស្រាល ម្ចាស់សុំយកទៅជួសជុលវិញដោយខ្លួនឯង មិនមានការប្ដឹងផ្ដល់ទេ។
រីឯវត្ថុតាងរថយន្តចំនួន ៣គ្រឿង និង ម៉ូតូចំនួន ៤គ្រឿង ត្រូវសមត្ថកិច្ចយកមករក្សាទុក នៅការិយាល័យនគរបាលចរាចរណ៍ផ្លូវគោក ដើម្បីដោះស្រាយបន្តតាមនីតិវិធី៕ ដោយ៖ ដែន សីមា
