បាត់ដំបង ៖ ចៅប្រុសអកតញ្ញុម្នាក់ បានយកចបជីកដែកវាយទៅលើជីតារបស់ខ្លួន បណ្តាលឲ្យបែកក្បាលស្លាប់។ ជនដៃដល់ ត្រូវបានឃាត់ខ្លួ កាលពីម៉ោង១២និង៣០នាទីរសៀល ថ្ងៃទី១៨ វិច្ឆិកា ២០១៨ នៅត្រង់ចំណុចក្រុមទី១ ស្ថិតក្នុងភូមិអន្លង់វិល ឃុំអន្លង់វិល ស្រុកសង្កែ។
ជនសង្ស័យឈ្មោះ ភិន សុធា ហៅក្រត អាយុ២៦ឆ្នាំ មុខរបរមិនពិតប្រាកដ រស់នៅភូមិស្វាយជ្រុំ ឃុំអូរដំបង២ ស្រុកសង្កែ។ ចំណែកជនរងគ្រោះឈ្មោះអឹុម ឆឺយ អាយុ៦៦ឆ្នាំ ។
បើតាមសមត្ថកិច្ចបានរាយការណ៍ឱ្យទៀតថា ជនសង្ស័យរូបនេះបានយកចបជីកដែកវាយទៅលើជីតារបស់ខ្លួនត្រូវចំក្បាលជាច្រើនកន្លែង បណ្តាលឲ្យបែកក្បាលផ្នែកខាងក្រោយ ស្លាប់ភ្លាមៗនៅនឹងកន្លែងកើតហេតុតែម្តង។ ក្រោយធ្វើសកម្មភាពរួច ជនសង្ស័យនេះ បានគេចខ្លួនបាត់ តែក្រោយមកពីសមត្ថកិច្ចបានចុះអន្តរាគមន៍ ក៏ត្រូវឃាត់ខ្លួនបានភ្លាមៗផងដែរ។ សមត្ថកិច្ច មិនទាន់ប្រាប់ អំពីមូលហេតុដែលនាំឲ្យមានអំពើឃាតកម្ម នៅឡើយទេ៕ ដោយ ៖ បញ្ញាស័ក្តិ
