ភ្នំពេញ ៖ បើតាមផេកហ្វេសប៊ុកផ្លូវការ របស់លោក គង់ គាំ អតីតទីប្រឹក្សាជាន់ខ្ពស់ និងជាវាគ្មិនកិត្តិយសក្រៅរចនាសម្ព័ន្ធ CNRP ជាប់បម្រាមទាំងគ្មានកំហុស នៅថ្ងៃទី២០ខែវិច្ឆិកានេះថា “កុំប្រើមនុស្សខូច កុំសំរួចឈើពុក”។
លោក គង់ គាំ បានសរសេរថា ភាពមិនអាចបំបែកបានរវាង សម រង្ស៊ី និង កឹម សុខា ពេលធ្លោយ សម រង្ស៊ី ក៏ដាក់ការដោះលែង កឹម សុខា ជាវត្ថុភ្នាល់ដូរយកការចុះចេញពីតំណែងរបស់នាយករដ្ឋមន្ត្រីកម្ពុជាបច្ចុប្បន្ន ដែលមិនអាចកើតឡើងបានទាល់តែសោះនោះ បានធ្វើឲ្យ កឹម សុខា សម្តែងថា “ខ្ញុំដឹងថា សម រង្ស៊ី ចង់ធ្វើអ្វីចំពោះខ្ញុំ និងចំពោះប្រទេសជាតិ”។
អតីតទីប្រឹក្សាជាន់ខ្ពស់ និងជាវាគ្មិនកិត្តិយសក្រៅរចនាសម្ព័ន្ធ CNRP បានបន្ថែមថា អ្នកនយោបាយមាននិន្នាការ កឹម សុខានិយម បានហៅសម រង្ស៊ីថាអគុណធម៌ ហើយបានសម្តែងការមិនពេញចិត្តចំពោះ សម រង្ស៊ី។ (មាន CNRP ឡើងវិញ ប្រគល់អំណាចត្រលប់វិញ បោះឆ្នោតឡើងវិញ លើកបម្រាមធ្វើនយោបាយដល់ ១១៨រូបដោយមិនឆ្លងកាត់ហ៊ុន សែន តើធ្វើបានពិតមែនឬ?)។ សម រង្ស៊ី និងក្រុមបរាជ័យគ្រប់ដំណាក់ បានងាកមករម្លឹកថារហូតខែ មីនា ២០១៩ មានតែ “ឬមួយនៅជាមួយ កឹម សុខា (សម រង្ស៊ី) ឬមួយជាមួយ ហ៊ុន សែន”។ បើមិនរក្សាសាមគ្គីភាពជាមួយ កឹម សុខា (សម រង្ស៊ី) ទេ គណបក្ស សង្គ្រោះជាតិនឹងសាបសូន្យជារៀងរហូតហើយ។ កុំសំរួចឈើពុក។ កុំលាបពណ៌អ្នកស្និទ្ធ កឹម សុខា។
ចំណែកលោកម៉ុត ចន្ថា នាយខុទ្ទកាល័យលោកកឹម សុខា នៅថ្ងៃអង្គារនេះដែរ បានសរសេរលើផេកហ្វេសប៊ុកថា ពាក្យ “សម រង្ស៊ី + កឹម សុខា ជាមនុស្សតែមួយ” ពិតជាងាយស្រួលនិយាយ និងសរសេរ ប៉ុន្តែការអនុវត្តជាក់ស្តែង ជាការលំបាក។ ឯកឧត្តម កឹម សុខា នៅតែកំពុងត្រូវបានគេធ្វើទុក្ខបុកម្នេញ។ មានអ្នកនយោបាយខ្លះ ធ្លាប់អះអាងថា ស្មោះត្រង់ជាមួយព្រះមហាក្សត្រ ជាទីគោរពសក្ការៈ ប៉ុន្តែការអនុវត្តជាក់ស្តែង ធ្វើមិនទាន់បានទេ នៅពេលដែលព្រះមហាក្សត្រ ព្រះអង្គទ្រង់អំពាវនាវឲ្យមានការផ្សះផ្សា និងបង្រួបបង្រួមជាតិ។ ខ្ញុំធ្លាប់ឆ្លងកាត់របបប្រល័យពូជសាសន៍ ប៉ុល ពត ដែលរបបនេះ បានដាក់ចេញគោលនយោបាយមួយៈ “មិនយល់ស្របនឹងអង្គការ ទុកក៏មិនចំណេញ ដកចេញក៏មិនខាត”។ ខ្ញុំបានបាត់បង់លោកឪពុក និងសាច់ញាតិជាង ៣០នាក់ ដោយសាររបបនេះ”៕ ដោយ ៖ រចនា
