ភ្នំពេញ ៖ រយៈពេល៣ថ្ងៃ នៃព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែបានប្រព្រឹត្តទៅដោយល្អប្រសើរ ដែលមានប្រជាពលរដ្ឋមកចូលរួមទស្សនាកម្សាន្តសរុបប្រមាណ៤,៥លាននាក់។ ទន្ទឹមនឹងនោះ អាជ្ញាធរ និងសមត្ថកិច្ចពាក់ព័ន្ធទាំងអស់បានខិតខំប្រឹងប្រែងពង្រឹងវិធានការសន្តិសុខ និងដោះស្រាយរបៀបរៀបរយសណ្តាប់ធ្នាប់ និងសម្រួលការកកស្ទះ ប្រកបដោយការយកចិត្តទុកដាក់ និងទទួលខុសត្រូវខ្ពស់។
បើយោងរបាយការណ៍របស់លោកឧត្តមសេនីយ៍ឯក ឆាយ គឹមឌឿន ដែលជាប្រធានលេខាធិការដ្ឋាន នៃគណៈកម្មការការពាររបស់គណៈកម្មាធិការជាតិរៀបចំបុណ្យជាតិ-អន្តរជាតិ នៅព្រឹកថ្ងៃទី២៤ ខែវិច្ឆិកា ឆ្នាំ២០១៨នេះបានបញ្ជាក់ថា ចំពោះសភាពការសន្តិសុខ មានការលក្ខណៈល្អប្រសើរ ដោយពុំមានព្រឹត្តិការណ៍ណាមួយកើតឡើងជះឥទ្ធិពលជាអវិជ្ជមានដល់ស្ថានភាពសន្តិសុខឡើយ ក្នុងនោះ សមត្ថកិច្ចបានឃាត់ខ្លួន និងធ្វើការអប់រំប្រជាពលរដ្ឋចំនួន៣៣នាក់ ដែលបានពាក់អាវដែលមានអក្សរ POLICE និង ARMY ដកហូតអាវ និងអនុញ្ញាតឲ្យត្រឡប់ទៅវិញ។
របាយការណ៍ដដែល បានឲ្យដឹងទៀតថា លទ្ធផលកិច្ចប្រតិបត្តិការ អន្តរាគមន៍ និងសង្គ្រោះ របស់សមត្ថកិច្ចរួមមាន ៖ បានជួយសង្គ្រោះ ពិនិត្យ និងព្យាបាលជំងឺជាង២ម៉ឺននាក់ និងបញ្ជូនទៅកាន់មន្ទីរពេទ្យ៤៩នាក់ បានជួយសង្គ្រោះទូកលិច ១១គ្រឿង និងសង្គ្រោះកីឡាករបាន១១៥នាក់ដោយសុវត្ថិភាព បានជួយសង្គ្រោះជនវង្វេងគ្រួសារ ១៨១លើក (ក្មេង១៧៣នាក់ មនុស្សចាស់៨នាក់) ។ បទល្មើសកើតឡើង៨លើក គឺលួច៥លើក ឃាត់ខ្លួនម្នាក់ ឆក់២លើក ឃាត់ខ្លួនម្នាក់ និងហិង្សាដោយចេតនា១លើក ឃាត់ខ្លួនម្នាក់ បណ្តាលឲ្យបាត់ម៉ូតូ២គ្រឿង ខ្យល់គរ ៤នាក់ ផ្ទុះកំប៉ុងហ្គាស់១០លើក គ្រោះថ្នាក់ចរាចរ១លើក ឡានឆ្លងចរន្តអគ្គិសនីឆេះ១លើក។
ចំណែករដ្ឋបាលរាជធានីភ្នំពេញ បានឲ្យដឹងថា ព្រឹកថ្ងៃទី២៤វិច្ឆិកានេះ ទីតាំងសប្បាយរបស់បងប្អូនប្រជាពលរដ្ឋ បានជួបជុំសប្បាយរីករាយ ក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក រយៈពេល៣ថ្ងៃ ត្រូវបានបោសសម្អាតរួចរាល់។ រដ្ឋបាលរាជធានីភ្នំពេញ សូមថ្លែងអំណគុណបងប្អូនប្រជាពលរដ្ឋទាំងអស់ ចំពោះការសហការ តាមការអំពាវនាវរបស់ រដ្ឋបាលរាជធានី ក្នុងការចូលរួមថែរក្សាអនាម័យ បរិស្ថានអនាម័យបានល្អ ដោយវេចខ្ចប់ ទុកដាក់សំរាមក្នុងធុងបានត្រឹមត្រូវ ហើយសង្ឃឹមថា ឆ្នាំក្រោយៗ បងប្អូននឹងចូលរួមរឹតតែល្អប្រសើរ ជាងនេះទៀត។ ចំពោះទីតាំងមួយចំនួនទៀត នៅសេសសល់ ការប្រឡាក់កំណកខ្លាញ់ ការខូចស្មៅដោយអន្លើរតាមសួនច្បារ រដ្ឋបាលរាជធានី នឹងចាត់ចែងរៀបចំបន្តទៀត នៅថ្ងៃចន្ទសប្តាហ៍ក្រោយ ដោយទុកឱកាសជូនបងប្អូន កម្មករបោសសម្អាត បានឈប់សំរាក១ថ្ងៃ បន្ទាប់ពីបំពេញភារកិច្ចទាំងយប់ទាំងថ្ងៃ អស់រយៈពេល៣ថ្ងៃកន្លងមកនេះ ៕ ដោយ ៖ កូឡាប
ព័ត៌មានលម្អិត សូមអានរបាយការណ៍ទាំងស្រុងខាងក្រោមនេះ ៖
