ភ្នំពេញ ៖ ក្រោយបរាជ័យ ក្នុងទឹកទី២ ជាមួយកីឡាករ អ៊ុយក្រែន លើសង្វៀន Thai Fight នៅលើទឹកដីថៃ គេបានឃើញ កែវ រំចង់ កំពុងធ្វើដំណើរវិលមកកម្ពុជាយើងវិញហើយ ទាំងជាំភ្នែក និងបែកមាត់។
ក្នុងការ Live វីដេអូនេះ ជាមួយទឹកមុខ ប៉ោងហើម ដោយកណ្តាប់ដៃរបស់កីឡាករអ៊ុយក្រែនេះ កែវ រំចង់ នៅបញ្ជាក់ឲ្យរឹតតែច្បាស់ថា រំចង់ ពិតជាអ្នកដែលស្រឡាញ់កីឡាពិតប្រាកដមែន បើទោះខ្លួនរងការឈឺចាប់យ៉ាងណា ក៏នៅតែស៊ូទ្រាំរហូតដល់ថ្នាក់ដួលសន្លប់។
អ្នកគាំទ្រវិស័យកីឡាប្រដាល់បានចាំពីការប្រកួតដែលទើបតែបញ្ចប់ក្តៅៗរវាងអ្នកប្រដាល់ កែវ រំចង់ និងអ្នកប្រដាល់ អ៊ុយ ក្រែន ខណៈការប្រកួតបានបង្កើនកម្តៅសាច់ដុំដាក់គ្នាធ្វើឲ្យអ្នកទស្សនាផ្ទាល់អង្គុយលែងជាប់កៅអី ស្រាប់តែអាជ្ញាកណ្ដាលបញ្ឈប់ កែវ រំចង់ ត្រឹមទឹកទី២ ក្រោយត្រូវមួយដៃចំថ្ពាល់ពេញៗដេកដួលលើតាបពី ។
ដោយកាលពីថ្ងៃទី២៥វិច្ឆិកា បើយោងតាមហ្វេសប៊ុកផ្លូការរបស់ Kun Khmer Boxing បានបង្ហោះវីដេអូមួយ ពីការប្រកួតរវាង កែវ រំចង់ និង Oleksandr Moisa ជនជាតិ អ៊ុយក្រែន។ ការប្រកួតដ៏ធំមួយនេះ បានធ្វើឡើងនៅក្នុងទឹកដីប្រទេសថៃ ក្នុងកម្មវិធីប្រដាល់មួយឈ្មោះ Thai Fight។ ជាពិសេសក្នុងទឹកទី១ បើទោះបី កែវ រំចង់ មានកម្ពស់មិនស្មើជាមួយគូប្រកួតក្តី តែ រំចង់ ពិតជាមានការតស៊ូ និង
ព្យាយាមវាយសម្រុកខ្លាំងណាស់ទៅលើគូប្រកួត។ កីឡាករខ្មែរយើងមួយរូបនេះ ពិតជាមិនរាថយទេ តែងតែសម្រុកដើរចូលរហូតជាមួយស្មារតីប្រឹងប្រែង ដើម្បីមុខមាត់ជាតិរបស់ខ្លួន។
រហូតចូលមកដល់ក្នុងទឹកទី២ រំចង់ នៅតែតស៊ូតយ៉ាងស្វិតស្វាញ ដោយដាល់ចំមុខគូរប្រកួតជាច្រើន ដោយមិនឲ្យគូប្រកួតមើលងាយឡើយ ។ តែជាអកុសលភ្លាត់ស្លៀត ត្រូវបានគូប្រកួតវាយចំមុខមួយដៃក្នុងទម្ងន់មួយធ្ងន់ធ្វើឲ្យ កែវ រំចង់ ចាញ់គូប្រកួត នៅក្នុងទឹកទី២នេះ។
ក្រោយពេលចប់ការប្រកួត កែវ រំចង់ ក៏បានប្រាប់មូលហេតុពិតមួយជូនមហាជនទូទៅដែលបានគាំទ្រ និងទុកចិត្តលើរូបលោកកន្លងមក ដោយបញ្ជាក់ប្រាប់យ៉ាងច្បាស់ថា “សុំទោស ពុកម៉ែ បងប្អូន ទាំងអស់គ្នាផង។ គេខ្ពស់ពេក ចូលវៃគេមិនកើតទេ”។ ក្រោយឃើញបែបនេះហើយបានធ្វើឲ្យអ្នកគាំទ្រជាច្រើន បានសម្តែងនូវអារម្មណ៍អាណិតដល់ កែវ រំចង់ ជាខ្លាំង ហើយអ្នកខ្លះទៀតក៏បានលើកទឹកចិត្តផងដែរថា កុំអស់សង្ឃឹមឲ្យសោះ idol ដោយពួកគេនៅតែគាំទ្រកីឡាកររូបនេះដដែល ព្រោះការប្រកួតតែងតែមានការឈ្នះ និងចាញ់ មិនអាចជៀសផុតឡើយ។
តែទោះជាយ៉ាងណាក៏នៅមានអ្នកផ្តល់កម្លាំងចិត្តដល់រំចង់ជាច្រើននាក់ផងដែរ។ ជាក់ស្តែងលោក ឧកញ៉ា ស្រី ចាន់ថន បានបង្ហោះសារលើកទឹកចិត្តមួយជូនកីឡាប្រដាល់ខ្មែរ កែវ រំចង់ បើទោះបី រំចង់ ចាញ់ដៃគូប្រកួតក៏ដោយ ក្នុងនោះអ្វីដែលរឹតតែពិសេសនោះ ឧកញ៉ា ក៏បានផ្តល់នូវថវិកាមួយចំនួនថែមទៀត ដើម្បីជូន កែវ រំចង់ ទុកមើលថែសុខភាព។ លោក ឧកញ៉ា ក៏បានបង្ហោះសារ លើកឡើងថា ៖ “បងគ្មានពាក្យនិយាយ លើសពីការលើកទឹកចិត្ត ដល់ប្អូនរំចង់ដោយការតស៊ូ យ៉ាងស្វិតស្វាញ ហូរញើសឈាមស្រស់លើសង្វៀនប្រដាល់ ដើម្បីមុខមាត់ប្រទេសជាតិមាតុភូមិរបស់យើង។ ខ្ញុំមានចម្ងល់បន្តិច ហេតុអីបានរៀបចំ ចាប់គូរ មិនព្រមមើលដៃគូរប្រកួតដូចជាកម្ពស់របស់កីឡាករមុនសិន ដូចជាកីឡាករ សុខ ហ៊ុច ក៏ធ្លាប់ប្រដាល់ថ្នាក់ជាតិ ចាញ់ដោយការកម្ពស់ម្តងហើយដូចនេះសូមបងៗអ្នករៀបចំការងារចាប់គូរប្រដាល់នេះ ជួយសម្របសម្រួលនិងពិនិត្យឲ្យបានច្បាស់លាស់ជាមុនសិន( បើខ្ញុំនិយាយពាក្យពេចន៍ មិនគាប់បីសូមអធ្យាស្រ័យផង)ជាការលើកទឹកចិត្តដល់ប្អូន កែវ រំចង់ បងសូមជូនជាថវិកាចំនួន 4.000.000 រៀល ដើម្បីមើលថែសុខភាពប្អូន ហើយជាចុងក្រោយបងជូនពរប្អូនឲ្យបានឆាប់ជាសះស្បើយ និងបន្តការវឹកហាត់បន្ថែមទៀត។ គាំទ្រការតាំងចិត្តរបស់ប្អូនជានិច្ច អរគុណសម្រាប់ការប្រឹងប្រែងអស់ពីកម្លាំងកាយចិត្ត”៕ ដោយ ៖ បញ្ញាស័ក្តិ