ខេត្តស្វាយរៀង ៖ ក្រុមចោរលួច ឆក់យ៉ាងសកម្មនៅក្នុងភូមិសាស្ត្រខេត្តស្វាយរៀងត្រូវបានកងរាជអាវុធហត្ថខេត្តស្វាយរៀងបង្ក្រាប និងធ្វើការបង្ហាញមុខនៅព្រឹកថ្ងៃទី២៨ ខែវិច្ឆិកា ឆ្នាំ២០១៨នេះ នៅទីបញ្ជាការដ្ឋានកងរាជអាវុធហត្ថខេត្តស្វាយរៀង ហើយកន្លងមកក្រុមនេះបានធ្វើសកម្មភាពជាច្រើនលើកផងដែរក្នុងភូមិសាស្ត្រទឹកដីខេត្តស្វាយរៀង។
លោកវរសេនីយ៍ឯក ស្រី វុន្ថា មេបញ្ជាការរងកងរាជអាវុធហត្ថខេត្តស្វាយរៀងបានដឹងថា យោងតាមពាក្យបណ្តឹងរបស់ជនរងគ្រោះឈ្មោះ ឡុង ហ្គីម ភេទប្រុស អាយុ៣០ឆ្នាំ ជនជាតិវៀតណាមស្នាក់នៅបន្ទប់ជួលលេខ៨ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀងថា នៅវេលាម៉ោង២១ និង៣០នាទីថ្ងៃទី២៣ ខែវិច្ឆិកា ឆ្នាំ០១៨ ឈ្មោះ ហេង ឈ្មោះ ត្រា ឈ្មោះ ចន្តា និងបក្ខពួកមួយចំនួនទៀតបានធ្វើសកម្មភាពឆក់កាបូបរបស់ខ្លួន។
លោកបានបន្តទៀតថា ក្រោយពីទទួលបានព័ត៌មាន និងពាក្យបណ្តឹងភ្លាមនោះ ឯកឧត្តមឧត្តមសេនីយ៍ត្រី សែ វុទ្ធី មេបញ្ជាការកងរាជអាវុធហត្ថខេត្តស្វាយរៀងបានដាក់បទបញ្ជាយ៉ាងម៉ឺងម៉ាត់ទៅកម្លាំងមន្ទីរយុត្តិធម៌សហការជាមួយកម្លាំងមូលដ្ឋានកងរាជអាវុធហត្ថក្រុងបាវិតដឹកនាំដោយលោកវរសេនីយ៍ឯក ស្រី វុន្ថា មេបញ្ជាការរងកងរាជអាវុធហត្ថខេត្តព្រមទាំមានការសម្របសម្រួលពីលោក គង់ ច័ន្ទខេមរិទ្ធ ព្រះរាជអាជ្ញាអមសាលាដំបូងខេត្តស្វាយរៀងចុះស្រាវជ្រាវបង្ក្រាប និងឃាត់ខ្លួនក្រុមចោរលួចចោរឆក់ជាបន្តបន្ទាប់រួមនិងអ្នកទទួលទិញផលចោរកម្មនៅវេលាម៉ោង២ និង១០នាទីថ្ងៃទី២៥ ខែវិច្ឆិកា ឆ្នាំ២០១៨ចំនួន១១នាក់។ ក្នុងនោះឃាត់ខ្លួនអ្នកទទួលទិញផលចោរកម្មម្នាក់ផងដែរដែលមានឈ្មោះ អ៊ួ ឌី ភេទប្រុស អាយុ២៦ឆ្នាំ មុខរបរអាជីវករមានទីលំនៅភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង។
លោកបញ្ជាក់ថា វត្ថុតាងដែលសមត្ថកិច្ចយើងដកហូតបានរួមមាន ៖ ទូរស័ព្ទដៃចំនួន២៨គ្រឿង, ម៉ូតូចំនួន៧គ្រឿង, កាបូបចំនួន១ និងអាយផេត១គ្រឿង។
បច្ចុប្បន្នជនសង្ស័យជាមុខសញ្ញា និងអ្នកទទួលផលចោរកម្មព្រមទាំងវត្ថុតាងត្រូវបានសមត្ថកិច្ចកងរាជអាវុធហត្ថខេត្តស្វាយរៀងបញ្ជូនទៅសាលាដំបូងខេត្តស្វាយរៀងចាត់ការតាមនីតិវិធីច្បាប់នៅព្រឹកថ្ងៃទី២៨ ខែវិច្ឆិកា ឆ្នាំ២០១៨នេះ៕ ដោយ ៖ វ៉ៃគោ
