ភ្នំពេញ ៖ ជនបរទេសជាតិចិន២៣៥នាក់ ដែលពាក់ព័ន្ធក្នុងករណីជំរិតទារប្រាក់តាមប្រព័ន្ធអ៊ីនធឺណែត (VOIP) នឹងបណ្កេញចេញពីកម្ពុជា ក្នុងរយៈពេល២សប្តាហ៍ទៀត។ ជនបរទេស២៣៥នាក់ ក្នុងនោះរួមមានស្ត្រីចំនួន៣៦នាក់ ត្រូវបានបង្ក្រាបនៅទីតាំង៤ផ្សេងៗគ្នាកាលពីថ្ងៃទី២៦ វិច្ឆិកា នៅក្នុងស្រុកត្រាំកក់ និងស្រុកបាទី ក្រោមកិច្ចសហការ រវាងកម្លាំងជំនាញរបស់អគ្គស្នងការដ្ឋាននគរបាល ជាតិនិងសមត្ថកិច្ចនគរបាលចិន ដោយមានការសម្របសម្រួល នីតិវិធីពីព្រះរាជអាជ្ញារង អមសាលាដំបូងខេត្តតាកែវ។
លោកឧត្តមសេនីយ៍ឯក អ៊ុក ហៃសីឡា ប្រធាននាយកដ្ឋានស៊ើបអង្កេតនិងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ បានប្រាប់ថា អគ្គនាយកដ្ឋានអន្តោប្រវេសន៍ នឹងបញ្ជូនជនជាតិចិនទាំង២៣៥នាក់ ទៅប្រទេសចិនវិញ ដោយប៉ូលិសចិន យកយន្តហោះមកយកយ៉ាងតិចពីរសប្តាហ៍ទៀត។ បច្ចុប្បន្ននេះ ជនជាតិចិនទាំង២៣៥នាក់នោះ កំពុងស្ថិតនៅអគ្គនាយកដ្ឋានអន្តោប្រវេសន៍នៅមុនការប្រគល់ទៅអោយនគរបាលប្រទេសចិន៕ ដោយ ៖ បញ្ញាស័ក្តិ
