ភ្នំពេញ ៖ ក្រសួងឧស្សាហកម្ម និងសិប្បកម្ម និងអង្គការ PTB អាល្លឺម៉ង់ ពង្រឹងកិច្ចសហប្រតិបត្តិការ អនុវត្តគម្រោងផ្នែកហេដ្ឋារចនា សម្ព័ន្ធគុណភាពជាតិ ស្របពេលកម្ពុជា មានសេដ្ឋកិច្ច ពឹងផ្អែកលើការ នាំចេញ តាមរយៈភាពអនុគ្រោះពាណិជ្ជកម្ម ដែលកម្ពុជាទទួលពីទីផ្សារក្រៅប្រទេស ។
នៅរសៀលថ្ងៃព្រហស្បតិ៍ ទី ២៩ ខែ វិច្ឆិកា ឆ្នាំ ២០១៨ លោក ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម បានទទួលជួបពិភាក្សាការងារ ជាមួយលោកស្រី Nitja Rehani អ្នកសម្របសម្រួលគម្រោងនៃអង្គការ PTB អាល្លឺម៉ង់ ទាក់ទងការពង្រឹងកិច្ចសហប្រតិបត្តិការ អនុវត្តគម្រោងផ្នែកហេដ្ឋារចនាសម្ព័ន្ធគុណភាពជាតិ នៅកម្ពុជា ។
ក្នុងឱកាសនោះ លោកស្រី Nitja Rehani បានជម្រាបជូនពីទិសដៅ និងផែនការអនុវត្តគម្រោង ដែលមានរយៈពេល៣ ឆ្នាំ គិតចាប់ពីដើមឆ្នាំ ២០១៨ ដល់ចុងឆ្នាំ ២០២០ ជាមួយទឹកប្រាក់ ៨០០.០០០ អឺរ៉ូ ក្នុងគោលដៅសម្រេចនូវលទ្ធផល៣ ជាសំខាន់ គឺ៖ ការចូលរួមអភិវឌ្ឍន៍សេដ្ឋកិច្ចកម្ពុជា តាមរយៈការពង្រឹង ហេដ្ឋារចនាសម្ព័ន្ធគុណភាពជាតិ (NQI)-ការលើកកម្ពស់ ក៏ដូចជាពង្រីក វិសាលភាពការផ្តល់សេវាទាក់ទង និងហេដ្ឋារចនាសម្ព័ន្ធគុណភាព ទៅលើអង្គភាពពាក់ព័ន្ធ ដូចជា មជ្ឈមណ្ឌលមាត្រាសាស្ត្រជាតិ -វិទ្យាស្ថានស្តង់ដារកម្ពុជា-នាយកដ្ឋានវាយតម្លៃទទួលស្គាល់ និងមជ្ឈមណ្ឌលមន្ទីរពិសោធន៍កម្ពុជា -និងការកំណត់វិភាគហេដ្ឋារចនាសម្ព័ន្ធគុណភាព(QI) ដែលមានការពាក់ព័ន្ធទៅនឹងតម្លៃសង្វាក់ផលិត កម្ម នៃការនាំចេញផលិតផលកសិកម្ម ដូចជា៖ផលិតផលដំឡូងមី ជាដើម ។
ជាមួយគ្នានេះ ប្រតិភូរបស់ PTB អាល្លឺម៉ង់ បានបង្ហាញនូវទឹកចិត្ត ចំពោះកិច្ចសហការដ៏ល្អរវាង ក្រសួងឧស្សាហកម្ម និងសិប្បកម្ម ជាមួយ PTB ជាពិសេស លោកទេសរដ្ឋមន្ត្រី មានការយកចិត្តទុកដាក់ខ្ពស់ណាស់ លើផ្នែកហេដ្ឋារចនាសម្ព័ន្ធគុណភាពជាតិនេះ ។ ប៉ុន្តែ ប្រតិភូ PTB ក៏បានបង្ហាញ នូវចំណាប់អារម្មណ៍ ក៏ដូចជាសំណូមពរមួយចំនួនផងដែរ ក្នុងន័យជំរុញឲ្យមានល្បឿន និងភាពស៊ីសង្វាក់គ្នា លើការងារ-ការកំណត់ទិសដៅជាអាទិភាព -ស្វែងយល់ពីភាពខ្វះចន្លោះ និងការងារជាន់ភារកិច្ចគ្នាជាដើម ។ ក្នុងនោះការផ្ទេរបច្ចេកវិទ្យា និងអភិវឌ្ឍន៍ធនធានមនុស្ស គឺកត្តាដែលត្រូវយកចិត្តទុកដាក់ផងដែរ ។
លោក ទេសរដ្ឋមន្ត្រី ចម ប្រសិទ្ធ បានសម្តែងការស្វាគមន៍ និងវាយតម្លៃខ្ពស់ ចំពោះកិច្ចសហការដ៏ល្អ ព្រមទាំងថ្លែងអំណរគុណដល់PTB ដែលបន្ទាប់ពីបានចុះហត្ថលេខាជាមួយគ្នា កាលពីថ្ងៃទី ២៩ ខែឧសភា ឆ្នាំ ២០១៨កន្លងមក PTB បានបំពេញការងារបានមួយចំនួនជាវិជ្ជមាន មានដូចជា ការបញ្ជូនអ្នកជំនាញ ការមកផ្តល់ប្រឹក្សាយោបល់ លើការងារបច្ចេកទេសរបស់ខ្លួន និងផ្តល់ឧបករណ៍ខ្លះ សម្រាប់ដំណោះស្រាយការងារ ក្នុងមន្ទីរពិសោធន៍ផងដែរ ។
លោករដ្ឋមន្ត្រី បានបញ្ជាក់បន្ថែមថា៖ កម្ពុជា មានសេដ្ឋកិច្ចពឹងផ្អែកលើការ នាំចេញ តាមរយៈភាពអនុគ្រោះពាណិជ្ជកម្ម ដែលកម្ពុជាទទួលពីទីផ្សារក្រៅប្រទេស ។ ដូច្នេះការងារអភិវឌ្ឍន៍ហេដ្ឋារចនាសម្ព័ន្ធគុណភាពជាតិ( NQI )គឺមិនអាចខ្វះបានទេ ដើម្បីយើងប្រើប្រាស់សមត្ថភាពមន្ទីរពិសោធន៍របស់យើង បូករួមនិងសក្តានុពលធនធានមនុស្ស ឲ្យមានសមត្ថភាពនិងលទ្ធភាពសម្រប់ការត្រួតពិនិត្យវាយតម្លៃភាពអនុលោម និងផ្តល់វិញ្ញាបនបត្របញ្ជាក់ទៅលើទំនិញរឺផលិតផល ដែលត្រូវនាំចេញឲ្យស្របតាមកំរិតស្តង់ដារ ។
ទន្ទឹមនឹងនេះ លោកចម ប្រសិទ្ធ បានបង្ហាញនូវជំហមោះមុតបន្ថែមទៀត ដោយត្រូវរួមគ្នា ជម្នះឲ្យលេចចេញជាលទ្ធផលផ្លែផ្កា នូវបញ្ហាសេសសល់ ភាពខ្វះចន្លោះនានា ដែលយើងត្រូវអនុវត្ត តាមរយៈគណៈកម្មការតម្រង់ទិស ដែលមានភារកិច្ចអនុវរួមគ្នា ដោះស្រាយ ដើម្បីឈានទៅសម្រេចជោគជ័យ តាមផែនការឆ្នាំដែលបានកំណត់ ៕ ដោយ៖ បញ្ញាស័ក្តិ
