ខេត្តព្រះសីហនុ ៖ រដ្ឋបាលក្រុងខេត្តព្រះសីហនុ កាលពីព្រឹកថ្ងៃសុក្រ ទី៣០ ខែវិច្ឆិកា ឆ្នាំ២០១៨ បានរៀបចំកម្មវិធីជួបសំណេះសំណាលជាមួយក្រុមអ្នកវិនិយោគទុនជនជាតិចិនមានចំនួនជិត ៥០នាក់ ដែលជាតំណាងឱ្យក្រុមហ៊ុន និងអាជីវកម្មផ្សេងៗ របស់អ្នកវិនិយោគទុនជនជាតិចិន ដើម្បីឈានជំរុញឱ្យមូលដ្ឋាននេះមានការរីកចំរើនថែមទៀត។
មន្ត្រីរដ្ឋបាលក្រុងព្រះសីហនុ បានឱ្យដឹងថា ជំនួបនេះ ដើម្បីឈានទៅកែនគរចំនួនអ្នកវិនិយោគទុនចិន ឱ្យចូលមកបោះទុនវិនិយោគ នៅលើវិស័យផ្សេងៗឱ្យបានច្រើនថែមទៀតនាថ្ងៃខាងមុខ។
បន្ថែមលើនេះ ក៏ដើម្បីរួមគ្នាស្វែងរកគន្លឹះពីផែនការវិនិយោគ មករួមសហការគ្នាអភិវឌ្ឍន៍មូលដ្ឋានខេត្តព្រះសីហនុ ឱ្យកាន់តែរីកចម្រើនទាំងផ្នែកហេដ្ឋារចនាសម្ព័ន្ធនានា និងសេដ្ឋកិច្ចក្នុងខេត្តព្រះសីហនុ។ ជាពិសេសជំរុញឱ្យសេដ្ឋកិច្ច របស់ប្រជាពលរដ្ឋក្នុងមូលដ្ឋាននេះ ឱ្យកាន់តែប្រសើរថែមទៀតនាថ្ងៃអនាគត។
ពិធីជួបសំណោះសំណាលនេះ រៀបចំនៅសាលប្រជុំធំ របស់សាលាក្រុងព្រះសីហនុ ព្រឹកថ្ងៃទី៣០ ខែវិច្ឆិកា ឆ្នាំ២០១៨ ដឹកនាំដោយ លោក អ៊ី សុខឡេង អភិបាលក្រុងព្រះសីហនុ និង មានតំណាងក្រុមហ៊ុន ឬអាជីវករជនជាតិចិនជិត ៥០នាក់ បានចូលរួមជួបពិភាក្សាគ្នា។
នាឱកាសនោះ លោក អ៊ី សុខឡេង អភិបាលក្រុងព្រះសីហនុ បានប្រកាសស្វាគមន៍អ្នកវិនិយោគទុនជនជាតិចិន ដែលកន្លងមកបានមកវិនិយោគ និងត្រៀមចូលមកវិនិយោគបោះទុករកស៊ី នាមូលដ្ឋាននេះស្របច្បាប់ ស្នើឱ្យពិចារណា និងចុះសិក្សាគម្រោងវិនិយោគឱ្យបានច្រើនថែមទៀតនាថ្ងៃខាងមុខ ដើម្បីភាពរីកចម្រើន រវាងប្រទេសទាំងពីរ ក៏ដូចជាភាពរីកចម្រើនទាំងអស់គ្នា។
ចំណែកតំណាងអ្នកវិនិយោគទុនចិន ក៏បានសន្យា នៅចំពោះមុខ លោក អ៊ី សុខឡេង អភិបាលក្រុងព្រះសីហនុថា នឹងកែនគរអ្នកវិនិយោគទុនចិន ឱ្យចូលមកបោះទុនវិនិយោគនាមូលដ្ឋានជាប់សមុទ្រមួយនេះឱ្យបានច្រើនថែមទៀត។
តំណាងអ្នកវិនិយោគទុនចិន បានអះអាងថា មានក្រុមហ៊ុនជាច្រើន នឹងចុះមកសិក្សាលើគម្រោងវិនិយោគនីមួយៗ ក្នុងពេលដ៏ឆាប់ខាងមុខនេះ។ ជាងនេះទៀត តំណាងក្រុមហ៊ុនហ៊ុនវិនិយោគ ក៏ដូចជាក្រុមអ្នកវិនិយោគទុនជនជាតិចិនទាំងនោះ បានសន្យាថា នឹងរួមគ្នាអនុវត្តច្បាប់វិនិយោគ ក៏ដូចជាអនុវត្តច្បាប់លើការវិនិយោគ របស់ពួកគេឱ្យស្របតាមច្បាប់ របស់ព្រះរាជាណាចក្រកម្ពុជា បានដាក់ចេញ ឬបានកំណត់ ៕ ដោយ ៖ ដែន សីមា
