ភ្នំពេញ៖ អ្នកនាំពាក្យក្រសួងការបរទេសនិងសហប្រតិបត្តិការអន្តរជាតិកម្ពុជា មានការខកចិត្តយ៉ាងខ្លាំងចំពោះសេចក្តីប្រកាសនៅថ្ងៃទី៦ ខែធ្នូ ឆ្នាំ២០១៧ របស់ក្រសួងការបរទេសអាមេរិក ស្តីពីការដាក់កម្រិតទិដ្ឋាការបន្ថែមទៀត ដែលជាការឆ្លើយតបទៅនឹងវិធានការស្របច្បាប់ អនុវត្តដោយអាជ្ញាធរមានសមត្ថកិច្ចក្រោមសិទ្ធិអធិបតេយ្យនៃព្រះរាជាណាចក្រកម្ពុជា។
បើតាមសេចក្តីថ្លែងការណ៍នៅថ្ងៃទី៨ខែធ្នូឆ្នាំ២០១៧នេះ ក្រសួងការបរទេស និងសហប្រតិបត្តិការអន្តរជាតិកម្ពុជា បានបញ្ជាក់ថា កម្ពុជាបានធ្វើការកត់សម្គាល់ដោយមានការសោកស្តាយយ៉ាងខ្លាំងចំពោះការសម្រេចចិត្តចុងក្រោយរបស់ក្រសួងការបរទេសអាមេរិកដែលពុំបានពិចារណាលើអង្គហេតុ និងអង្គច្បាប់ជុំវិញការវិវឌ្ឍនយោបាយថ្មីៗ នៅកម្ពុជា ហើយការសម្រេចចិត្តនេះ គឺធ្វើឡើងដោយសារហេតុផលនយោបាយ ដោយមានាករគិតទុកជាមុន និងមានស្តង់ដារពីរ។ ការសម្រេចចិត្តនេះ ផ្ទុយពីស្មារតីនៃការបន្តកិច្ចខិតខំប្រឹងប្រែងធ្វើឲ្យប្រសើរឡើងនូវទំនាក់ទំនងកម្ពុជា និងសហរដ្ឋអាមេរិក បន្ទាប់ពីរដ្ឋាភិបាលអាមេរិក ដាក់កម្រិតទិដ្ឋាការដ៏អយុត្តិធម៌ កាលពីខែកញ្ញាឆ្នាំ២០១៧ ដោយកម្ពុជាគ្រាន់តែស្នើឲ្យយកចិត្តទុកដាក់ចំពោះទិដ្ឋាការមនុស្សធម៌ និងមេត្តាធម៌ក្នុងកិច្ចសហប្រតិបត្តិការនៃកម្មវិធីមាតុភូមិនិវត្តន៍។
ជាការដែលមិនអាចប្រកែកបានដែលថា ការលើកកម្ពស់លទ្ធិប្រជាធិបតេយ្យ និងការគោរពសិទ្ធិមនុស្សត្រូវតែដើរទន្ទឹមនឹងការពង្រឹងនីតិរដ្ឋ។ ដូច្នេះ វិធានការច្បាប់ប្រឆាំងនឹងបុគ្គល អង្គការមិនមែនរដ្ឋាភិបាល និងប្រព័ន្ធផ្សព្វផ្សាយមួយចំនួនតូចដែលបានបំពានច្បាប់ មិនគួរត្រូវបានចាត់ទុកថាជាការប៉ុនប៉ងធ្វើឲ្យលំហលទ្ធិប្រជាធិបតេយ្យនៅកម្ពុជាចុះខ្សយោនោះទេ។ វិធានការទាំងនេះត្រូវបានដាក់ចេញក្នុងគោលបំណងការពារអធិបតេយ្យភាព សន្តិភាព ស្ថិរភាព និងសន្តិសុខជាតិ។ អ្នកនយោបាយ ប្រព័ន្ធផ្សព្វផ្សាយ និងអង្គការមិនមែនរដ្ឋាភិបាលជាច្រើនផ្សេងទៀត រួមទាំងមជ្ឈមណ្ឌលសិទ្ធិមនុស្សកម្ពុជា ដែលមិនបានបំពានច្បាប់ នៅតែបន្តអនុវត្តការងាររបស់ពួកគេ ដោយសេរីនៅទូទាំងប្រទេស។ ក្នុងន័យនេះ រាល់ការគាំទ្រណាមួយដល់បុគ្គល និងអង្គភាពដែលបំពានច្បាប់គឺមានន័យស្នើនឹងការសម្លាប់ដំណើរការប្រជាធិបតេយ្យប្រកបដោយសន្តិភាពក្រោមនីតិរដ្ឋនៅកម្ពុជា។
ការជ្រៀតជ្រែកពីបរទេសចូលក្នុងកិច្ចការផ្ទៃក្នុង គឺជាបញ្ហារសើបសម្រាប់កម្ពុជា។ការចោទប្រកាន់របស់សហរដ្ឋអាមេរិកដែលថា រាជរដ្ឋាភិបាលកម្ពុជាកំពុងចាត់វិធានការប្រឆាំងនឹងលទ្ធិប្រជាធិបតេយ្យគឺជាការនិយាយផ្ទុយនឹងទង្វើរបស់ខ្លួនឯង បើយើងពិនិត្យមើលគោលនយោបាយអាមេរិកកាលពីអតីតកាលដែលគាំទ្រការផ្លាស់ប្តូរមិនតាមបែបប្រជាធិបតេយ្យ និងបានបង្កឲ្យមានការបំផ្លិចបំផ្លាញមកលើប្រជាជន និងប្រទេសដ៏តូចមួយនេះ។
ប្រតិកម្មរបស់សហរដ្ឋអាមេរិក ចំពោះការវិវឌ្ឍនយោបាយនៅកម្ពុជានាពេលថ្មីៗនេះ ហាក់ដូចជាធ្វើឡើងមិនមែនក្រោមហេតុផលនៃគោលការណ៍លទ្ធិប្រជាធិបតេយ្យនោះទេ ប្រសិនបើពិចារណាលើការប្រព្រឹត្តរបស់សហរដ្ឋអាមេរិកចំពោះប្រទេសផ្សេងទៀតអំពីបញ្ហាប្រជាធិបតេយ្យ និងការគោរពសិទ្ធិមនុស្ស។
ដោយមានគណបក្សនយោបាយជាច្រើន កំពុងលូតលាស់នៅកម្ពុជា លំហលទ្ធិប្រជាធិបតេយ្យ និងប្រព័ន្ធពហុបក្សនៅតែបន្តមាន។ កម្ពុជាប្តេជ្ញាចិត្តក្នុងការអនុវត្តលទ្ធិប្រជាធិបតេយ្យសេរីពហុបក្សដែលអនុលោមតាមរដ្ឋធម្មនុញ្ញកម្ពុជានិងការរៀបចំការបោះឆ្នោតព្រឹទ្ធសភានៅថ្ងៃទី២៥ខែកុម្ភៈនិងការបោះឆ្នោតជ្រើសតាំងតំណាងរាស្ត្រនៅថ្ងៃទី២៩ខែកក្កដាឆ្នាំ២០១៨ ក្នុងបរិយាកាសសេរី យុត្តិធម៌ និងរបៀបរៀបរយ ដែលអាចទទួលយកបានសម្រាប់ម្ចាស់ឆ្នោតនៅកម្ពុជា ៕ បញ្ញាស័ក្តិ
