ព្រះសីហនុ ៖ គេយកដីហើយចាប់ម្ចាស់ដាក់គុកទៀត នៅកំពង់សោមយើងហ្នឹង ម្ចាស់ដីស្របច្បាប់ក្លាយជាអ្នកទោស។ នេះបើតាមការផ្សាយរបស់ផេកហ្វេសប៊ុករបស់លោកផែង វណ្ណៈ។ លោកផែង វណ្ណៈ បានលើកឡើងថា “នៅព្រឹកថ្ងៃទី ២០ ខែ ធ្នូ ឆ្នាំ ២០១៨ ខ្ញុំបានមកពន្ធនាគារខេត្តព្រះសីហនុ ដើម្បីជួបអ្នកមីង ខាត់ គឹមលាង អាយុ ៦៩ ឆ្នាំ ជាម្ចាស់ដីស្របច្បាប់ទំហំ ២ ហិកតា ស្ថិតនៅភូមិ ចំណោទរាម ឃុំ បិតត្រាង ស្រុក ព្រៃនប់ ខេត្ត ព្រះសីហនុ ដើម្បីស្វែងរកយុត្តិធម៌ជូនគាត់ ។
អ្នកមីង ខាត់ គឹមលាង ត្រូវបានសមត្ថកិច្ចស្រុកព្រៃនប់ចាប់ខ្លួនដោយគ្មានដីកា កាលពីថ្ងៃទី ១២ ខែ ធ្នូ ឆ្នាំ ២០១៨ រួចបញ្ជូនទៅតុលាការតែម្ដង ខណៈអ្នកមីងមកបោះបង្គោលលើព្រំដីរបស់គាត់ ដែលគាត់បានទិញពីលោកស្នងការរងខេត្តព្រះសីហនុមានឯកសារបញ្ជាក់ពីអាជ្ញាធរត្រឹមត្រូវ ។
អ្នកមីងបានបញ្ជាក់ថា អ្នកមីង បានទិញដី និងគ្រប់គ្រងដីនេះ អស់រយៈពេលជាង ១១ ឆ្នាំហើយ ព្រមទាំងបានធ្វើផ្ទះឈើចំនួន ២ និងដាំដំណាំហូបផ្លែរាប់រយដើម មិនដែលមានបញ្ហាអ្វីទេ ។ ប៉ុន្តែរយៈពេលជាងមួយខែកន្លងមកនេះ មានគេមកឈូសដំណាំ និង ឈូសផ្ទះគាត់ចោលដោយមិនដឹងជាខាងណាទេ ។
ប្រភពពីតុលាការខេត្តព្រះសីហនុបានអោយដឹងថា ការចាប់ឃុំខ្លួនអ្នកមីង ខាត់ គឹមលាង គឺធ្វើតាមពាក្យបណ្ដឹងរបស់តំណាងក្រុមហ៊ុន អ្នកឧកញ៉ា លីយុងផាត់ ។
លោកផែង វណ្ណៈ បានបញ្ជាក់ថា “តើយើងឈឺចាប់ទេ ដែលគេឈូសផ្ទះ និង ឈូសដំណាំយើងចោល គេយកដីយើង ហើយគេចាប់យើងដាក់គុកទៀតនោះ ?”។
ក្រុមហ៊ុនអ្នកឧកញ៉ា លី យុងផាត់ ប្ដឹងចាប់រាស្ត្រម្ចាស់ដី ២ នាក់ដាក់គុក សមត្ថកិច្ច និង តុលាការក្រវីក្បាល ? ប្រជាជន ២ នាក់ គឺ លោកស្រី ខាត់ គឹមលាង ភេទស្រី អាយុ ៦៦ឆ្នាំ មុខរបរ កសិករ មានអាសយដ្ឋានបច្ចុប្បន្ន ភូមិរាម ឃុំរាម ស្រុកព្រៃនប់ ខេត្តព្រះសីហនុ និង លោក ឆាំ សាំង ភេទប្រុស អាយុ៥៣ឆ្នាំ មុខរបរ យោធា អាសយដ្ឋានរស់នៅបច្ចុប្បន្ន ភូមិរាម ឃុំរាម ស្រុកព្រៃនប់ ខេត្តព្រះសីហនុ ជាម្ចាស់ដីទំហំ ២ ហិកតា ដែលមានទីតាំងនៅភូមិ ចំណោទរាម ឃុំ បិតត្រាង ស្រុក ព្រៃនប់ ខេត្ត ព្រះសីហនុ ត្រូវបានសមត្ថកិច្ចចាប់ខ្លួនបញ្ជូនទៅសាលាដំបូងខេត្តព្រះសីហនុ តាមបញ្ជាអាជ្ញាធរខេត្តដោយមានបណ្ដឹងពីខាងក្រុមហ៊ុន អ្នកឧកញ៉ា លី យុងផាត់ ។
លោកស្រី ខាត់ គឹមលាង បានអោយដឹងថា ដីលោកស្រី ទិញពីលោក អ៊ឹម វលក្ខណ៍ ស្នងការរងនគរបាលខេត្តព្រះសីហនុ តាំងពីឆ្នាំ ២០០៧ មកម្ល៉េះ ដោយមានអាជ្ញាធរភូមិ ឃុំ បញ្ជាក់ត្រឹមត្រូវ និងមានមេធាវីប្រថាប់ត្រាដឹងលឺទៀតផង ។ បន្ទាប់ពីទិញដី ២ហិកតា នេះរួចមកលោកស្រីបានដាំដើមមៀនចំនួន ១៥០ ដើម និងបានសង់ផ្ទះឈើតូចចំនួន ២ នៅលើដីនោះ ។ ឥឡូវនេះបែជាខាងក្រុមហ៊ុន ឧកញ៉ា លី យុងផាត់ ប្ដឹងចាប់គាត់ដាក់គុកគឺជារឿងអយុត្តិធម៌ណាស់ ។ ខាងក្រុមហ៊ុនឧកញ៉ា លី យុងផាត់ បានឈូសឆាយដើមមៀនទាំង ១៥០ ដើមចោលអស់ថែមទៀត ។
លោកស្រី បានអោយដឹងថា ទោះបីលោកស្រីយកឯកសារត្រឹមត្រូវបង្ហាញសមត្ថកិច្ច និង តុលាការ យ៉ាងណាក៏ដោយក៏សមត្ថកិច្ច និង តុលាការ មិនយកភ្នែកមើលដែរគឺដឹងតែ អនុវត្តតាមពាក្យបណ្ដឹងរបស់តំណាងក្រុមហ៊ុនឧកញ៉ា លី យុងផាត់ យកលោកស្រីម្ចាស់ដីស្របច្បាប់ដាក់គុកតែម្ដង៕ ដោយ ៖ បញ្ញាស័ក្តិ
