ភ្នំពេញ ៖ ប្រជាពលរដ្ឋរស់នៅតាមដងប្រឡាយស្ទឹងមានជ័យចំនួន១៥៣គ្រួសារដែលស្ថិតក្នុងតំណាក់ការទី១នៃគម្រោងរបស់រដ្ឋបាលរាជធានីភ្នំពេញពួកគាត់បានឯកភាពហើយក្នុងការចាប់ឆ្នោតយកផ្ទះស្នាក់នៅជាបណ្តោះអាសន្ននៅក្រោមស្ពានអាកាសស្ទឹងមានជ័យ ។ទន្ទឹងនឹងនេះពួកគាត់ក៏បានឯកភាពចាប់ឆ្នោតយកដីឡូត៏ជាកម្មសិទ្ធិជាក់ស្តែងនៅរយៈពេល២ខែកន្លះខាងមុខទៀត។
ពិធីចាប់ឆ្នោតនេះបានធ្វើឡើងកាលពីព្រឹកថ្ងៃទី១១ធ្នូនៅបរិវេណវត្តស្ទឹងមានជ័យ សង្កាត់ស្ទឹងមានជ័យ ខណ្ឌមានជ័យ។
លោកមាន ចាន់យ៉ាដា អភិបាលរងរាជធានីភ្នំពេញ បានមានប្រសាសន៍ថាកាលពីថ្ងៃ៦តុលា ២០១៧កន្លងមកនេះ រដ្ឋបាលរាជធានីភ្នំពេញនិងរដ្ឋបាលខណ្ឌមានជ័យបានបើកវេទិកាសាធារណៈមួយនៅក្នុងបរិវេណវត្តស្ទឹងមានជ័យនេះដែរ ក្នុងវេទការកាលណោះ ត្រូវបានបងប្អូនប្រជាពលរដ្ឋរស់នៅលើប្រឡាយស្ទឹងបានឯកភាព រុះរើផ្ទះចេញពីលើប្រឡាយនិងសុខចិត្តទទួលយកដីជាកម្មសិទ្ធិស្របច្បាប់ពីរដ្ឋបាលរាជធានី ក្នុងទំហំ៤ម៉ែត្រគុណនឹង៦ម៉ែត្រ នៅសល់៤ម៉ែត្រខាងមុខនិងនៅសល់១ម៉ែត្រនៅក្រោយ ។ចំណែកតួប្រឡាយយើងអាចស្ថាបនាបានតួប្រឡាយ៨ម៉ែត្រ និងផ្លូវ៦ម៉ែត្រអមសងខាងប្រឡាយ។
លោក មាន ចាន់យ៉ាដា បានបន្តថា ចំពោះការចាប់ឆ្នោតនេះយើងធ្វើឡើងតែចំនួន១៥៣គ្រួសារដែលស្ថិតក្នុងតំណាក់ការទី១នៃគម្រោងរបស់រដ្ឋបាលរាជធានី ដើម្បីអោយពួកគាត់ចូលទៅស្នាក់នៅជាបណ្តោះអាសន្ននៅក្រោមស្ពានអាកាសស្ទឹងមានជ័យ ក្រោយពីយើងបានសាងសង់ ដាក់បង្គន់ បន្ទប់ទឹក តបណ្តាញទឹកនិងភ្លើងរួចរាល់។លោកបានបញ្ជាក់នៅចំពោះមុខប្រជាពលរដ្ឋផងដែរថា រដ្ឋបាលរាជធានីភ្នំពេញផ្តល់ជម្រើស២យ៉ាងមុននៃការប្រគល់ដីស្របច្បាប់ជូន ក្នុងនោះរួមមានទី១ ប្រជាពលរដ្ឋអាចចាប់ឆ្នោតយកដីកម្មសិទ្ធិនៅក្នុងប្លង់ដែលបានបែងចែករួច និងទី២ ប្រជាពលរដ្ឋអាចចាប់ឆ្នោតយកដីកម្មសិទ្ធិ ដែលបានរៀបចំ ពុះជាឡូត៏រួចរាល់ តែជម្រើសទី២នេះប្រជាពលរដ្ឋត្រូវទុកពេលអោយរដ្ឋបាលរាជធានីភ្នំពេញរយៈពេល២ខែកន្លះដើម្បីរៀបដីចែកឡូត៏អោយបានត្រឹមត្រូវសិនទើបយើងចាប់ឆ្នោតយកជាក់ស្តែងតែម្តង។ក្នុងជម្រើសទាំង២នេះត្រូវបានប្រជាពលរដ្ឋសម្រេចយកជម្រើសទី២ផងដែរ។
គួរបញ្ជាក់ថា ជាគម្រោងរបស់រដ្ឋបាលរាជធានីភ្នំពេញ នៅពេលដែលការស្ថាបនាប្រឡាយនិងផ្លូវអមសងខាងប្រឡាយនេះ រួចរាល់ រដ្ឋបាលរាជធានីភ្នំពេញ នឹងរៀបចំតបណ្តាញទឹកស្អាត ភ្លើងអគ្គីសនីចូលផ្ទះប្រជាពលរដ្ឋ រួមនឹងការដាក់បង្កោលភ្លើងសាធារណៈនៅលើផ្លូវនេះថែមទៀត ដើម្បីអោយតំបន់នេះក្លាយជាទីក្រុងស្ទឹងមានជ័យ ។
មន្ត្រីរដ្ឋបាលរាជធានីភ្នំពេញបានអោយដឹងថា ប្រឡាយស្ទឹងមានជ័យដែលរដ្ឋបាលរាជធានីភ្នំពេញគ្រោងនឹងធ្វើការអភិវឌ្ឍនេះមានប្រវែង១៣៥០ម៉ែត្រ ដោយឆ្លងកាត់ខណ្ឌចំនួន២ នោះគឺខណ្ឌមានជ័យនិងខណ្ឌសែន សុខ ដែលមានប្រជាពលរដ្ឋរស់នៅនិងរងផលប៉ះពាល់ប្រឡាយនេះចំនួន៥៦២គ្រួសារ ហើយប្រជាពលរដ្ឋទាំងអស់នេះនឹងទទួលបានដីទំហំ៤គុណនិង៦ម៉ែត្រជាកម្មសិទ្ធិស្របច្បាប់នៅហ្នឹងកន្លែងតែម្តង។
ប្រឡាយស្ទឹងមានជ័យនឹងត្រូវសាងសង់ឡើង ដោយបុកស៊ីផាយដូចនៅប្រឡាយបាក់ទូកដែរ ដោយត្រូវធ្វើផ្លូវ៦ម៉ែត្រជាប្រភេទផ្លូវបេតុង រៀបចំតបណ្តាញទឹក ភ្លើងអគ្គីសនីចូលផ្ទះប្រជាពលរដ្ឋ ដាក់បង្កោលភ្លើងសាធារណៈនៅលើផ្លូវនេះថែមទៀត ។ ប្រឡាយស្ទឹងមានជ័យនេះបានដើរតួយ៉ាងសំខាន់ ក្នុងការនាំទឹកទំលាក់ចូលទៅបឹងទំពុន។ ជាគម្រោងតួប្រឡាយស្ទឹងមានជ័យមានទំហំ៨ម៉ែត្រចិញ្វើម២ ម៉ែត្រ សាងសង់ផ្លូវបេតុងទទឹង៦ម៉ែត្រ ផ្លូវមុខផ្ទះ៥ម៉ែត្រ ដីនៅសល់មុខផ្ទះ១ម៉ែត្រកន្លះនិងក្រោយផ្ទះកន្លះម៉ែត្រ៕ ដោយ៖កូឡាប 