ភ្នំពេញ ៖ រថយន្តសាំយ៉ុងមួយគ្រឿង ដាច់ហ្វ្រាំងជាន់មិនស៊ី ជ្រុលទៅបុកស្លាកសញ្ញាចរាចរណ៍ និងស្លាកលេខផ្លូវ កាលពីម៉ោង៩និង៣០នាទីព្រឹក ថ្ងៃអង្គារ ទី១ ខែមករា ឆ្នាំ២០១៩ ចំណុចមុខផែស្ងួតភ្នំពេញ តាមបណ្ដាយ ផ្លូវលេខ៨០កែងផ្លូវ ព្រះស៊ីសុវត្ថិ ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ ។
បន្ទាប់ពីបង្កគ្រោះថ្នាក់ ទើបសមត្ថកិច្ចចរាចរណ៍ឆែកឃើញសុទ្ធតែដឹកឈើប្រណីតពេញ រថយន្ត ។ នៅមុនពេលកើតហេតុ រថយន្តមួយគ្រឿងម៉ាក សាំយ៉ុង ពណ៌ស ពាក់ស្លាកលេខ បាត់ដំបង 2B-2132 បានដឹកឈើចេញពីខេត្តព្រះវិហារ ដោយធ្វើដំណើរមកភ្នំពេញ រហូតបើកមកតាមបណ្ដោយផ្លូវលេខ៨០ ក្នុងទិសដៅពីលិចទៅកើត ស្រាប់តែរថយន្តជាន់ហ្វ្រាំង ជាន់មិនស៊ី តៃកុងក៏សម្រេចចិត្តបួងចង្កូតបុកឡើងមាត់លូ និងបុកបង្គោលស្លាកសញ្ញាចរាចរណ៍ និងស្លាកសញ្ញាផ្លូ បណ្តាលឲ្យដួលស្លាកនិងខូចជញ្ជាំងរថយន្ត។ រថយន្តនេះ ដឹកឈើយកទៅដាក់ឲ្យម៉ូយនៅម្តុំបឹងត្របែក ខណ្ឌចំការមន។
សមត្ថកិច្ច ជំនាញចរាចរណ៍ ចុះមកវាស់វែងយករថយន្តបង្ក ទៅរក្សារទុកនៅការិយាល័យចរាចរណ៍ផ្លូវគោក នៃស្នងការនគរបាលរាជធានីភ្នំពេញ រង់ចាំដោះស្រាយតាមផ្លូវច្បាប់ ៕ ដោយ ៖ បញ្ញាស័ក្តិ
