ខេត្តព្រះសីហនុ ៖ នគរបាលចរាចរណ៍ នៃស្នងការដ្ឋាននគរបាលខេត្តព្រះសីហនុ បានឲ្យដឹងថា នៅវេលាម៉ោងប្រមាណជាង ១២ថ្ងៃត្រង់ ទី២ ខែមករា ឆ្នាំ២០១៩នេះ មានគ្រោះថ្នាក់ចរាចរណ៍ បង្កដោយរថយន្តដឹកខ្សាច់មួយគ្រឿង បានបុករះប៉ះទៅលើរថយន្ត ម៉ូតូ និងរ៉ឺម៉កម៉ូតូជាច្រើនគ្រឿងទៀត នៅតាមផ្លូវបេតុងវត្តលើ ស្ថិតក្នុងសង្កាត់លេខ២ ក្រុង- ខេត្តព្រះសីហនុ។
សេចក្តីរាយការណ៍ របស់កម្លាំងនគរបាល ពីកន្លែងកើតហេតុឲ្យដឹងថា មានបុរសម្នាក់ បានស្លាប់នៅកន្លែង និងមនុស្សក្មេង ចាស់ ប្រុស ស្រី យ៉ាងតិច១៦នាក់ ផ្សេងទៀតរងរបួស។ ក្នុងនោះមានទាំងជនជាតិខ្មែរ និងជនជាតិចិន។
សមត្ថកិច្ចបន្តថា ក្រោយពេលកើតហេតុភ្លាមៗ ក្រុមសង្គ្រោះមានទាំងសមត្ថកិច្ច និងរថយន្តពេទ្យ បានអន្តរាគមន៍ជួយសង្គ្រោះ ដឹកជញ្ជូនអ្នករងរបួសទៅកាន់មន្ទីរពេទ្យ ដើម្បីសង្គ្រោះបន្ទាន់ផងដែរ។
សមត្ថកិច្ចនគរបាលចរាចរណ៍បាន ឲ្យដឹងថា ចំពោះអ្នកបើកបររថយន្តបង្កហេតុ បានចុះរត់គេចបាត់ ក្រោយកើតហេតុចរាចរណ៍ បណ្តាលឲ្យមានមនុស្សស្លាប់ និងរងរបួសសរុបជិត ២០នាក់រួចមក។
សមត្ថកិច្ចបន្តថា ករណីគ្រោះថ្នាក់ចរាចរណ៍បង្ក ដោយរថយន្តដឹកខ្សាច់ខាងលើនេះ គឺបានបុករះបណ្តាលឲ្យមានមនុស្សស្លាប់ និងរបួសច្រើននាក់នេះ តាមរបាយការណ៍ របស់សមត្ថកិច្ចបញ្ជាក់ថា គ្រោះថ្នាក់នេះ កើតឡើងនៅវេលាម៉ោងជាង ១២ថ្ងៃត្រង់ ថ្ងៃទី២ ខែមករា ឆ្នាំ២០១៩ តាមផ្លូវបេតុង ត្រង់ចំណុច ផ្លូវចុះវត្តលើមកសង្កាត់លេខ២ ស្ថិតនៅក្នុង ក្រុម១៧ ភូមិ២ សង្កាត់លេខ២ ក្រុងព្រះសីហនុ បង្កដោយ រថយន្តបែនដឹកដីមួយគ្រឿងម៉ាក NISSAN ពាក់ស្លាកលេខ ចង្កូតស្តាំKPS-0576។ ចំណែក អ្នកបើកបរ រថយន្តបង្កគ្រោះថ្នាក់ចរាចរណ៍ខាងលើ សមត្ថកិច្ចនៅមិនស្គាល់អត្តសញ្ញាណទេ ដោយបានចុះរត់គេចខ្លួនបាត់ស្រមោលឈឹង។
សមត្ថកិច្ចឲ្យដឹងបន្តថា រថយន្តបង្កខាងលើ បើកបរមានទិសដៅ ពីលើចុះក្រោម លុះដល់ចំណុចខាងលើ ស្ថានភាពផ្លូវចុះចំណោតរថយន្ត ក៏បានដាច់ហ្វ្រាំង ហើយក៏ជ្រុលទៅបុករះមធ្យោបាយធ្វើដំណើរតាមផ្លូវនេះ ជាបន្តបន្ទាប់។ ក្នុងនោះបានបុកប៉ះរថយន្ត ម៉ាក COROLLA ពណ៌ ផ្ទៃមេឃ ពាក់ស្លាកលេខភ្នំពេញ2C-8424 ជារថយន្តដឹកភ្ញៀវ។ បុកប៉ះ ម៉ូតូម៉ាក HONDA C125 ពណ៌ ខ្មៅ ពាក់ស្លាកលេខព្រះសីហនុ1D-1703។ បុកប៉ះម៉ូតូម៉ាក HONDA C125 ពណ៌ ខ្មៅ ពាក់ស្លាកលេខតាកែវ1O-2746 និងបុកប៉ះ ម៉ូតូម៉ាក FTR ពណ៌ ខៀវ គ្មានផ្លាកលេខ។
គ្រោះថ្នាក់នេះ បណ្ដាលឲ្យស្លាប់មនុស្សប្រុសម្នាក់នៅកន្លែងកើតហេតុ និងមានអ្នករងរបួសធ្ងន់ ស្រាលចំនួន១៥នាក់។ ក្នុងនោះមានជនជាតិខ្មែរ៧នាក់ (ស្រី២នាក់ក្មេង២នាក់) និងបុរសជនជនជាតិចិនចំនួន៨នាក់៕ ដោយ៖ ដែន សីមា
