ខេត្តព្រះសីហនុ៖ (ដំណឹងបឋម) សមត្ថកិច្ចនគរបាលខេត្តព្រះសីហនុ បានឱ្យដឹងថា ព្រឹកមិញនេះ មានរថយន្តក្រឡុកសុីម៉ង់ត៍ ១គ្រឿង បានបើកបុកចូលផ្ទះ របស់ប្រជាពលរដ្ឋ ១គ្រួសារនៅម្តុំជិតអង្គភាពសាខាកាំកុងត្រូលខេត្តព្រះសីហនុ គឺនៅទល់មុខបុរី ឆឹង សុខាស្ថិតក្នុងសង្កាត់លេខ៣ ក្រុងព្រះសីហនុនៅម៉ោងប្រមាណ១០ព្រឹកថ្ងៃទី១២ ខែមករា ឆ្នាំ២០១៩នេះ។
ហេតុការណ៍នេះ បានបណ្តាលឲ្យបែកបាក់ផ្នែកខាងមុខផ្ទះ ខូចខាតរថយន្ត៣គ្រឿង និងម៉ូតូ២គ្រឿង (រថយន្តក្រឡុកសុីម៉ង់ត៍២គ្រឿង រថយន្តតូច២បាំងកន្លះ១គ្រឿង នៅតាមផ្លូវ និងម៉ូតូ ២គ្រឿងនៅខាងមុខផ្ទះ របស់ពលរដ្ឋរងគ្រោះ)។
តាមរបាយការណ៍បឋមពីសមត្ថកិច្ចបានបង្ហាញថា មុនដំបូងរថយន្តបង្កខាងលើនេះ បានបើកមកប៉ះរថយន្តតូច ១គ្រឿងនិងរថយន្តក្រឡុកសុីម៉ង់ត៍ដូចគ្នា ១គ្រឿងទៀត មុននឹងបុកចូលផ្ទះ របស់ប្រជាពលរដ្ឋ។
ក្រោយហេតុការណ៍នេះ សម្រាប់អ្នកបើកបររថយន្តបង្កហេតុ ត្រូវបានសមត្ថកិច្ចឃាត់ខ្លួន ដើម្បីបន្តនីតិវិធីតាមផ្លូវច្បាប់៕ ដោយ ៖ ដែន សីមា
