ប្រតិភូក្រសួងមហាផ្ទៃ ដឹកនាំដោយ លោក សក់ សេដ្ឋា រដ្ឋលេខាធិការក្រសួងមហាផ្ទៃ នៅថ្ងៃទី៣១ ខែមករា ឆ្នាំ២០១៩នេះ បានចូលប្រជុំពន្យល់បកស្រាយបំភ្លឺជូន ឧត្តមក្រុមប្រឹក្សាពិគ្រោះ និងផ្តល់យោបល់ អំពីការងារមួយចំនួន ក្នុងនោះក៏មានប្រសិទ្ធភាពការងារថ្នាក់ក្រោមជាតិ និងការបង្ក្រាបបទល្មើសផ្សេងៗផងដែរ។
ឧត្តមក្រុមប្រឹក្សាពិគ្រោះ និងផ្តល់យោបល់ខែនេះ ដឹកនាំដោយ លោក ម៉ម សូណង់ដូរ ប្រធានគណបក្សសំបុកឃ្មុំសង្គមប្រជាធិបតេយ្យ ដែលជាប្រធានប្តូរវេន។
នៅក្នុងកិច្ចប្រជុំនោះ លោក ពេជ្រ ស្រស់ ប្រធានគណបក្សយុវជនកម្ពុជា បានចោទ៣សំណួរទៅកាន់ប្រតិភូក្រសួងមហាផ្ទៃ ក្នុងនោះមានពាក់ព័ន្ធនឹងលិខិតកាន់កាប់ដីធ្លីពីមេឃុំគឺជាន់លើគ្នាហើយមិនទទួលខុសត្រូវ, អំពីការធ្វើច្បាប់បែងចែកអំណាចមេឃុំចំពោះការផ្តល់លិខិតកាន់កាប់ដីធ្លី និងអំពីចំណាត់ការក្រសួងមហាផ្ទៃចំពោះ អភិបាលខេត្ត និងរដ្ឋបាលខេត្តដែលមិនគោរពអនុក្រឹត និងសេចក្តីសម្រេចផ្សេងៗរបស់រដ្ឋាភិបាលចំពោះការដោះស្រាយបញ្ហាដីធ្លីជូនប្រជាពលរដ្ឋខ្មែរជាដើម។
លោក ពេជ្រ ស្រស់ បានបញ្ជាក់យ៉ាងដូច្នេះថា បីសំនួរខាងលើនេះ គឺខ្ញុំផ្អែកលើបញ្ហាជាក់ស្តែងដែលកំពុងកើតមានឡើងចំពោះពលរដ្ឋខ្មែរ និងកិច្ចការរដ្ឋបាលនៅថ្នាក់ក្រោមជាតិរបស់រដ្ឋាភិបាលកម្ពុជា។
ចំពោះមុខប្រតិភូក្រសួងមហាផ្ទៃដឹកនាំដោយ លក សក់ សេដ្ឋា រដ្ឋលេខាធិការក្រសួងមហាផ្ទៃ ខ្ញុំបានតាំងសំនួរចំនួនបីសំនួរទៅគាត់។
សំនួរ៖ ១. ពាក់ព័ន្ធបញ្ហាដីធ្លីភាគច្រើនបណ្តាលមកពីការផ្តល់នូវលិខិតកាន់កាប់ដីធ្លីពីមេឃុំគឺជាន់លើគ្នា ហើយមិនទទួលខុសត្រូវ តើករណីនេះក្រសួងមហាផ្ទៃមានចំណាត់ការបែបណាចំពោះមេឃុំ និងមេភូមិ ដែលបានប្រព្រឹត្ត.? ហើយមេឃុំនិងមេភូមិនោះអាចនឹងប្រឈមចំពោះមុខច្បាប់ដែរឬទេ..?
២. តើក្រសួងមហាផ្ទៃអាចធ្វើច្បាប់កែប្រែនូវអំណាចមេឃុំចំពោះការផ្តល់លិខិតកាន់កាប់ដីធ្លីបានដែរឬទេ? ដោយទុកភារៈកិច្ចនេះជូនមន្ទីរសុរិយោដីជាអ្នកទទួលខុសត្រូវវិញ ហើយមេឃុំគ្រាន់តែបញ្ជូនដីការអមពីប្រវត្តិដីបានហើយ។
៣. តើក្រសួងមហាផ្ទៃមានចំណាត់ការបែបណា ចំពោះអភិបាលខេត្តនិងរដ្ឋបាលខេត្តដែលមិនគោរពអនុក្រឹត និងសេចក្តីសម្រេចផ្សេងៗរបស់រដ្ឋាភិបាលចំពោះការដោះស្រាយបញ្ហាដីធ្លីជូនប្រជាពលរដ្ឋខ្មែរ………….?
លោកបន្តថា បីសំនួរខាងលើនេះ គឺខ្ញុំផ្អែកលើបញ្ហាជាក់ស្តែងដែលកំពុងកើតមានឡើងចំពោះពលរដ្ឋខ្មែរ និងកិច្ចការរដ្ឋបាលនៅថ្នាក់
ក្រោមជាតិរបស់រដ្ឋាភិបាលកម្ពុជា។ សូមបងប្អូនជនរួមជាតិរង់ចាំចម្លើយនៅបន្តិចទៀតនេះ។ ក្រៅពី៣សំនួររបស់ខ្ញុំគឺខ្ញុំបានថែមមួយសំនួរទៀតទៅកាន់លោក សក់ សេដ្ឋា រដ្ឋលេខាធិការក្រសួងមហាផ្ទៃ និងជាប្រធានប្រតិភូក្រសួងមហាផ្ទៃក្នុងកិច្ចប្រជុំជាមួយឧត្តមក្រុមប្រឹក្សាពិគ្រោះ និងផ្តល់យោបល់នៅព្រឹកនេះផងដែរ ហើយសំនួរបន្ថែមរបស់ខ្ញុំមួយទៀតនោះគឺ៖សំនួរដូចតទៅ ៖
១. តើក្រសួងមហាផ្ទៃមានយន្តការបែបណាដើម្បីទប់ស្កាត់កងកម្លាំងកុំឲ្យប្រើហិង្សាលើប្រជាពលរដ្ឋខ្មែរពេលមានការតវ៉ាអ្វីមួយនោះ? ដោយហេតុថាប្រជាពលរដ្ឋខ្មែរមាន សិទ្ធិពេញលេញក្នុងការធ្វើបាតុកម្មតវ៉ាដែលមានច្បាប់រដ្ឋ ធម្មនុញ្ញធានាជូនប្រជាពលរដ្ឋខ្មែរគ្រប់ៗរូប។
ការគេចចេញពីបញ្ហាវាមិនមែនជាដំណោះស្រាយទេ ហើយការដោះសារយកត្រូវ ក៏មិនអាចកែប្រែកំហុសបានដែរ ដូច្នេះមានតែទទួលយកភាពរិះគន់ ដើម្បីកែប្រែស្ថានភាពខុសឲ្យក្លាយទៅជាត្រូវនិងទទួលស្គាល់ ការពិតទើបមានការកែប្រែពិតប្រាកដ៕ ដោយ៖កូឡាប