ខេត្តកំពត៖ ករណីគ្រោះថ្នាក់ចរាចរមួយបានកើតឡើង រវាងម៉ូតូប៉ះជាមួយរថយន្ត បណ្តាលអោយយុវជនម្នាក់បានរងរបួសធ្ងន់ តែម្ចាស់រថយន្ត និងរថយន្ត ត្រូវបានលោកឧត្តមសេនីយ៍ទោ ម៉ៅ ចន្ទ័មធុរឹទ្ធ ស្នងការនគរបាលខេត្តកំពតបញ្ជាទៅអោយកូនចៅអោយអនុញ្ញាតអោយម្ចាស់រថយន្តនិងរថយន្ត ចេញពីប៉ុស្តិ៍រដ្ឋបាលគរបាលកោះតូច ដោយគ្មានរងចាំដំណោះស្រាយតាមនីតិវិធីសិន។ ចំណែកជនរងគ្រោះកំពុងព្យាបាលនៅមន្ទីរពេទ្យ។
ករណីនះស្នងការដ្ឋាននគរបាលខេត្តកំពត បានសេចក្តីបំភ្លឺព័ត៌មានថា «ក្នុងនាមស្នងការ នៃស្នងការដ្ឋាននគរបាលខេត្តកំពត ខ្ញុំសូមធ្វើការបំភ្លឺដល់បងប្អូនសាធារណៈជន និងក្រុមគ្រួសាររបស់ប្អូនជនរងគ្រោះមេត្តាជ្រាបថា ៖ កាលពីថ្ងៃទី ០៥ ខែ កុម្ភៈ ឆ្នាំ ២០១៩ វេលាម៉ោង ១៤ មានគ្រោះថ្នាក់ចរាចរណ៍រវាងម៉ូតូ និងរថយន្តលើដងផ្លូវជាតិលេខ ៣ (កំពត-វាលរេញ) ស្របទិសគ្នា នៅក្នុងភូមិព្រែកអំពិល ឃុំកោះតូច ស្រុកទឹកឈូ ខេត្តកំពត ។ បន្ទាប់ពីកើតហេតុសមត្ថកិច្ចបានចុះពិនិត្យ វាស់វែង និងសាកសួរព័ត៌មាននៅកន្លែងកើតហេតុ ព្រមទាំងយកវត្ថុតាងទាំងពីរមករក្សាទុកនៅប៉ុស្តិ៍នគរបាលរដ្ឋបាលកោះតូច ។ ក្រោយពីបានពិនិត្យវាស់វែង និងប្រមូលបានព័ត៌មានគ្រប់ជ្រុងជ្រោយ យើងសន្និដ្ឋានបានថា ករណីគ្រោះថ្នាក់នេះ គឺបណ្តាលមកពីម៉ូតូបើកបរក្នុងល្បឿនលឿន ហើយជ្រុលទៅបុករថយន្តដែលបានបត់ចូលទៅផ្លូវរមណីយដ្ឋានណាតាយ៉ាទាំងកម្រោលនៅលើជាយផ្លូវផ្ទុយទិសគ្នា ប៉ះត្រង់ទ្វារមុខប៉ែកខាងឆ្វេងរថយន្ត បណ្តាលឲ្យអ្នកបើកបរម៉ូតូរបួសធ្ងន់ ។ ផ្អែកតាមកំណត់ហេតុវាស់វែង ករណីនេះ គឺបង្កឡើងដោយអ្នកបើកម៉ូតូបើកបរខ្ជីខ្ជា បើកបរក្នុងល្បឿនលឿន ។ ដោយឡែក ក្នុងករណីដែលសមត្ថកិច្ចអនុញ្ញាតឲ្យភាគីរថយន្តត្រឡប់ទៅវិញដោយសារ រថយន្តមិនមានកំហុសក្នុងការបើកបរ មានអ្នកធានាក្នុងការទទួលខុសត្រូវក្នុងការចូលខ្លួនមកដោះស្រាយតាមផ្លូវច្បាប់ ហើយក្នុងករណីនេះដែរ គឺមិនបណ្តាលឲ្យបាត់បង់អាយុជីវិតរបស់អ្នកបើកម៉ូតូនោះដែរ ហេតុដូច្នេះ សមត្ថកិច្ចបានអនុញ្ញាតឲ្យភាគីខាងរថយន្តយករថយន្តទៅជួសជុលប្រើប្រាស់បណ្តោះអាសន្នសិន ទម្រាំហៅចូលដោះស្រាយនៅពេលក្រោយ »។
គួរំលឹកថា៖ កន្លងទៅ មានហេតុការណ៍គ្រោះថ្នាក់ចរាចរណ៍គួរអោយភ្ញាក់ផ្អើលនេះបានកើតឡើងនៅវេលាម៉ោង១៣និង៣០នាទី ថ្ងៃទី០៥ ខែកុម្ភៈ ឆ្នាំ២០១៩នៅ ចំណុចគីឡូម៉ែត្រលេខ១២ ឃុំកោះធំ ស្រុកទឹកឈូ ខេត្តកំពត។
ជនរងគ្រោះមានឈ្មោះ ញើង អាង ភេទប្រុស អាយុ២២ឆ្នាំ មានទីលំនៅភូមិកោះចំការ ឃុំបឹងសាលាខាងត្បូង ស្រុកកំពង់ត្រាច ខេត្តកំពត។ ចំណែកឯអ្នកបើកបររថយន្តមិនស្គាល់អត្តសញ្ញាណ្ណ។
បើតាមឈ្មោះ ញើង អាង ជនរងគ្រោះកំពុងសម្រាកនៅមន្ទីរពេទ្យបានប្រាប់អ្នកសារព័ត៌មានអោយដឹងថា នៅមុនពេលកើតហេតុខ្លួនបានជិះម៉ូតូម៉ាកCBR ស្លាកលេខ កណ្តាល 1S 7369 ក្នុងទិសដៅពីកើត ទៅទិសខាងលិច (កំពត ទៅកំពង់សោម) ក្នុងល្បឿនធម្មតាលុះដល់ចំណុចកើតហេតុខាងលើក៍មានរថយន្តមួយគ្រឿងម៉ាកហាយឡែនឌ័រ ពណ៌ទឹកមាស ពាក់ស្លាកលេខ ភ្នំពេញ 2AP 7453 បើកបរក្នុងទិសដៅស្របគ្នា ពីទិសខាងកើតទៅទិសខាងលិចដូចគ្នា ស្រាប់តែរថយន្តបត់ឆ្វេងក្នុងល្បឿនលឿន ធ្វើអោយអ្នកបើកបរម៉ូតូវាក់អើរក៍ជ្រុលទៅប៉ះជាមួយរថយន្តតែម្តង បណ្តាលអោយអ្នកបើកម៉ូតូឌួលបោកខ្ទប់ទៅនិងថ្នល់រងរបួសជាទម្ងន់រួចរថយន្តបើករត់រហូតប្រជាពលរដ្ឋដេញឃាត់បានប្រគល់អោយសមត្ថកិច្ច៕ ដោយ៖កូឡាប
