បាត់ដំបង ៖ អាជ្ញាធរមីន បានឲ្យដឹងថា កាលពីវេលាម៉ោង ៤ ល្ងាចថ្ងៃទី១៩ ខែកុម្ភៈ ឆ្នាំ២០១៩ មានឧប្បត្តិហេតុគ្រោះថ្នាក់ ដោយសារគ្រឿងផ្ទុះច្នៃមួយករណី ស្ថិតនៅភូមិអូរដា ឃុំអូរដា ស្រុកកំរៀង ខេត្តបាត់ដំបង ដែលបានបណ្តាល ឲ្យមានជនរងគ្រោះថ្នាក់ចំនួន ២នាក់ បានរងរបួស ដែលបច្ចុប្បន្ន កំពុងសម្រាកព្យាបាលនៅមន្ទីរពេទ្យឯកជន នៅស្រុកកំរៀង ខេត្តបាត់ដំបង។ ប្រភពព័ត៌មាន ពីបណ្តាញស្ម័គ្រចិត្ត ផ្តល់ព័ត៌មាន របស់ការិយាល័យព័ត៌មាន ជនរងគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាម (CMVIS) ប្រចាំខេត្តបាត់ដំបង បានឲ្យដឹងថា គ្រោះថ្នាក់នេះ កើតឡើងនៅពេលជនរងគ្រោះ ព្យាយាមយករំសេវច្នៃ ដាក់កំប៉ុងធ្វើជាគ្រឿងផ្ទុះ ក្នុងគោលបំណងបោកយកត្រី។
ប្រមុខថ្នាក់ដឹកនាំអាជ្ញាធរមីន ដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានអាជ្ញាធរមីន សូមចូលរួមសម្តែង នូវការសោកស្តាយចំពោះប្អូនៗ ដែលរងគ្រោះទាំងអស់ និងសូមអំពាវនាវ ដល់ប្រជាពលរដ្ឋទាំងអស់ សូមកុំលេង ឬ កែច្នៃគ្រាប់មីន និងគ្រាប់មិនទាន់ផ្ទុះ សូមរាយការណ៍មកអាជ្ញាធរមូលដ្ឋាន និងសមត្ថកិច្ចពាក់ព័ន្ធ ដើម្បីបង្ការនូវគ្រោះថ្នាក់ដូចករណីខាងលើនេះ។
ជាមួយនេះ អាជ្ញាធរមីន ក៏គ្រោងនឹងរៀបចំមិទ្ទីងខួបលើកទី២០ ទិវាជាតិយល់ដឹងពីមីន នាថ្ងៃទី២២ ខែកុម្ភៈ ឆ្នាំ២០១៩ នៅវិទ្យាល័យកំរៀង ខេត្តបាត់ដំបង ខាងមុខនេះផងដែរ៕ ដោយ ៖ កូឡាប