ខេត្តបន្ទាយមានជ័យ៖ កម្ទេចមីកញ្ចប់ និងទឹកក្រូចនាំចូលពីបរទេសដែលខូចគុណភាព និងហួសកាលបរិច្ឆេទប្រើប្រាស់ ចំនួន សរុប ១១ គីឡូក្រាម ត្រូវបានមន្ត្រីសាខាកាំកុងត្រូលខេត្តបន្ទាយមានជ័យ ធ្វើការដកហូត។
នៅថ្ងៃព្រហស្បតិ៍ ៩រោច ខែមាឃ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៨ ខែកុម្ភៈ ឆ្នាំ២០១៩ មន្ត្រីជំនាញសាខាកាំកុងត្រូលខេត្តបន្ទាយមានជ័យ ដោយមានការសហការជាមួយមន្ត្រីមន្ទីរពាណិជ្ជកម្មខេត្ត បានចុះផ្សព្វផ្សាយអំពីគុណភាព សុវត្ថិភាពម្ហូបអាហារ ដោយបានត្រួតពិនិត្យទៅលើទំនិញវេចខ្ចប់ស្រាប់នៅផ្សារកណ្តាល និងតាមគេហដ្ឋានតាំងលក់ ស្ថិតក្នុងសង្កាត់ផ្សារកណ្តាល ក្រុងប៉ោយប៉ែត។
លទ្ធផល មន្ត្រីជំនាញបានរកឃើញកម្ទេចមីកញ្ចប់ និងទឹកក្រូចនាំចូលពីបរទេសដែលខូចគុណភាព និងហួសកាលបរិច្ឆេទប្រើប្រាស់ ចំនួន សរុប ១១ គីឡូក្រាម ហើយត្រូវបានមន្ត្រីសាខាកាំកុងត្រូលខេត្ត ធ្វើកំណត់ហេតុដកហូត និងស្នើសុំគោលការណ៍កម្ទេចចោលនៅពេលក្រោយ។
បន្ទាប់ពីត្រួតពិនិត្យរួចរាល់មន្ត្រីជំនាញបានឱ្យតំណាងម្ចាស់ទំនិញធ្វើកិច្ចសន្យាបញ្ឈប់ការដាក់តាំងលក់ទំនិញខូចគុណភាព និងហួសកាលបរិចេ្ឆទប្រើប្រាស់បន្តទៀត ករណីមិនរាងចោលនឹងកសាងសំណុំរឿងតាមនីតិវិធីច្បាប់៕ ដោយ:កូឡាប
