ប្រទេសប៉ាគីស្ថានបានអះអាងថា ខ្លួនបានចាប់រ៉ាដាបាននាវាមុជទឹកឥណ្ឌាមួយគ្រឿងដែលចង់ចូលដែនទឹករបស់ខ្លួន ប៉ុន្តែប្រទេសឥណ្ឌា បានបដិសេធការអះអាងនោះ។
ប៉ាគីស្ថានបញ្ជាក់ថា ហេតុការណ៍នោះកើតឡើងនៅយប់ថ្ងៃច័ន្ទ ប៉ុន្តែកងទ័ពជើងទឹករបស់ខ្លួនបានចាប់បាន និងរារាំងមិនឲ្យនាវាមុជទឹករបស់ឥណ្ឌាចូលក្នុងដែនទឹករបស់ខ្លួនឡើយ។
យោធារបស់ប៉ាគីស្ថានក៏បានបញ្ចេញវីដេអូផងដែរ ដើម្បីគាំទ្រដល់ការអះអាងរបស់ខ្លួន។ ក្នុងវីដេអូនោះ បង្ហាញពីនាវាមុជទឹកមួយគ្រឿងផុងឡើងលើទឹក នៅម៉ោង ៨:៣៥នាទីយប់ ថ្ងៃច័ន្ទ។
អគ្គនាយកផ្នែកទំនាក់ទំនងសាធារៈរបស់កងនាវាប៉ាគីស្ថាន បានថ្លែងនៅក្នុងសេចក្តីប្រកាសថា “នាវាមុជទឹកនោះអាចនឹងត្រូវចាប់ និងកម្ទេចចោលយ៉ាងស្រួល តែវាជាគោលការណ៏របស់ប៉ាគីស្ថានក្នុងការអត់ធ្មត់ទល់នឹងការឈ្លានពានរបស់ឥណ្ឌា ដើម្បីសន្តិភាព”។
ចំណែកភាគីឥណ្ឌាវិញ ឆ្លើយតបចំពោះការអះអាងរបស់ប៉ាគីស្ថានថា ជាការបង្កើតរឿងកុហកដោយ រដ្ឋធានី Islamabad (ប៉ាគីស្ថាន)។
ប្រភពពីរដ្ឋាភិបាលឥណ្ឌាបានជំទាស់ទៅនឹងវីដេអូដែលបញ្ចេញដោយប៉ាគីស្ថាន ដោយបានថ្លែងប្រាប់ CNN ថា នាវាមុជទឹករបស់ពួកគេនឹងមិនបង្ហាញខ្លួននោះទេ ប្រសិនជាពួកគេចង់ចូលដែនទឹករបស់ ប៉ាគីស្ថាន។ ប្រភពពីរដ្ឋាភិបាលឥណ្ឌាបញ្ជាក់ទៀតថា វាគឺជាយុទ្ធនាការឃោសនាដោយប៉ាគីស្ថាន ដើម្បីបង្កើតឲ្យមានការច្រឡោតខឹង៕ សុភ័ក្ត្រ
ប្រភព៖ CNN