កំពង់ស្ពឺ ៖ លោកហ៊ុន ម៉ានី អ្នកតំណាងរាស្ត្រមណ្ឌលខេត្តកំពង់ស្ពឺ បានសរសេរលើផេកហ្វេសប៊ុកផ្លូវការថា គិតមកត្រឹមថ្ងៃទី១៥ខែមីនានេះ យុទ្ធនាការតាមដាន និងត្រួតពិនិត្យ លើកិច្ចព្រមព្រៀង ចុះថ្ងៃទី១ ខែមីនា ឆ្នាំ២០១៩ រវាងអាជ្ញាធរមូលដ្ឋាន ក្នុងស្រុកភ្នំស្រួច និងក្រុមហ៊ុនអាជីវកម្មរ៉ែខ្សាច់ និងថ្ម មានរយៈពេល១៥ ថ្ងៃគត់។ ថ្ងៃទី១៥ខែមីនានេះ លទ្ធផលឈ្នះ-ឈ្នះមួយ បានលេចចេញជារូបរាងជាក់លាក់។ វាជាលទ្ធផល ដែលឆ្លើយតប បានទៅនឹងសំណូមពរជាក់ស្តែង របស់ប្រជាពលរដ្ឋយើង និងជាលទ្ធផល ដែលអាចទទួលយកបាន ពីគ្រប់ភាគីដែលពាក់ព័ន្ធ។
លោកហ៊ុន ម៉ានី បានថ្លែងថា ពិតណាស់ ជំហានដំបូង ជាជំហានដែលលំបាកបំផុត។ ប៉ុន្តែក្នុងបុព្វហេតុរួម ទោះលំបាកយ៉ាងណា យើងជួបគ្នា ពិភាក្សាគ្នា ស្វែងរកដំណោះស្រាយ ជាបន្តបន្ទាប់។ ជាមួយនឹងការចូលរួមពីគ្រប់មជ្ឈដ្ឋាន ដែលក្នុងនោះរួមមាន ក្រសួង មានសមត្ថកិច្ច អាជ្ញាធរពាក់ព័ន្ធ ម្ចាស់អាជីវកម្ម ក៏ដូចជាប្រជាពលរដ្ឋ ការបោះជំហានទីពីរ និងបន្តបន្ទាប់របស់យើង បានប្រព្រឹត្តិទៅដោយរលូន និងមានការយោគយល់ខ្ពស់ ។
លោកបានបន្តថា ថ្ងៃនេះ ក្រុមការងារយើង បានជួបជុំជាមួយបងប្អូនប្រជាពលរដ្ឋ នៅក្នុងស្រុកភ្នំស្រួច សារជាថ្មី។ ការត្អូញត្អែររបស់ពួកគាត់ ត្រូវបានជំនួសមកវិញ ដោយស្នាមញញឹម និងភាពរាក់ទាក់។ ក៏ដូចគ្នានេះដែរ ក្រុមអាជីវករ ក៏មានការសប្បាយរីករាយ ដោយអាជីវកម្មរបស់ខ្លួន ត្រូវបានអនុញ្ញាតឲ្យមានដំណើរការឡើងវិញ ជាបន្តបន្ទាប់ ក្រោយពីខ្លួន បានអនុវត្តយ៉ាងខ្ជាប់ខ្ជួន នូវកិច្ចព្រមព្រៀង និងសន្យាបន្តគោរពទៅថ្ងៃអនាគត។
អ្នកតំណាងរាស្ត្រ បានមានប្រសាសន៍ថា “ជាមួយនឹងជោគជ័យនេះ យើងខ្ញុំសូមថ្លែងអំណរគុណ យ៉ាងជ្រាលជ្រៅបំផុត ដល់ក្រសួង មានសមត្ថកិច្ច អាជ្ញាធរពាក់ព័ន្ធ ម្ចាស់អាជីវកម្ម និងប្រជាពលរដ្ឋទាំងអស់ ដែលបានចូលរួមយ៉ាងសស្រាក់សស្រាំ ក្នុងដំណើរការ នៃការអនុវត្តនូវកិច្ចព្រមព្រៀងខាងលើ។ ភាពជោគជ័យនេះ ពិតជាមិនអាចកើតឡើង ដោយគ្មានការចូលរួម និងការលះបង់នោះទេ”។
ក្នុងភាពជាតំណាង ក្រុមការងារនឹងបន្ត នៅជាមួយបងប្អូនប្រជាពលរដ្ឋ តាមដាន និងត្រួតពិនិត្យនិរន្តរភាពនៃការអនុវត្ត បន្តស្វែងរកដំណោះស្រាយឲ្យកាន់តែប្រសើរ ដើម្បីសង្គមជាតិយើង។
លោកបានថ្លែងថា ខ្ញុំសូមជម្រាបជូនថា ថ្មីៗនេះ ក្រុមការងារបានទទួលព័ត៌មាន ពីខាងក្រសួងរ៉ែ និងថាមពល អំពីការអនុញ្ញាតឱ្យ ក្រុមហ៊ុនអាជីវកម្មរ៉ែខ្សាច់ និងថ្ម ដែលមានទីតាំង នៅស្រុកភ្នំស្រួចគឺ ក្រុមហ៊ុន Seng Hua Minning Co,. Ltd. អោយមានប្រតិបត្តិការអាជីវកម្មរបស់ខ្លួនឡើងវិញ ដោយសារភាព ចាំបាច់ក្នុងការចាក់ថ្ម បំពេញទីតាំងសម្រាប់ការបើកសម្ភោធ ការដ្ឋានសាងសង់ផ្លូវល្បឿនលឿនភ្នំពេញ ក្រុងព្រះសីហនុ ក្រោមអធិបតីភាពសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នាថ្ងៃទី២២ ខែមីនា ឆ្នាំ២០១៩ ខាងមុខនេះ។
ជាមួយនឹងការអនុញ្ញាត ឱ្យបន្តអាជីវកម្មរបស់ខ្លួន ក្រុមហ៊ុនបានសន្យាថា ខ្លួននឹងបន្តគោរពតាម គ្រប់ចំណុចដែលបានព្រមព្រៀង កាលពីថ្ងៃទី១ ខែមីនា ឆ្នាំ២០១៩ និងបន្តអនុវត្តតាមការណែនាំ របស់អាជ្ញាធរមានសមត្ថកិច្ច ក៏ដូចជា សារាចររបស់ក្រសួងរ៉ែ និងថាមពល និងក្រសួងពាក់ព័ន្ធយ៉ាងខ្ជាប់ខ្ជួន។
បើទោះជាមានការវិវឌ្ឍ ក្នុងភាពវិជ្ជមានជារួមក៏ដោយ ក្រុមការងារ ក៏នឹងនៅបន្តតាមដានការអនុវត្ត និងដំណើរការដឹកជញ្ជូន របស់ក្រុមហ៊ុនខាងលើ ដើម្បីធានាមិនឱ្យមានការប្រព្រឹត្ត ប្រាសចាកពីលក្ខខណ្ឌណាមួយ ដែលមានចែងក្នុងសេចក្តីណែនាំ របស់ក្រសួងពាក់ព័ន្ធ និងអាជ្ញាធរ មានសមត្ថកិច្ចជាដាច់ខាត។
តបតាមសំណូមពរ របស់ប្រជាពលរដ្ឋ ចំនួន៧ឃុំ ក្នុងស្រុកភ្នំស្រួច អំពីផលប៉ះពាល់ ដែលបណ្តាលមកពីអាជីវកម្មរ៉ែខ្សាច់ និងថ្ម ក្រុមការងារយើងខ្ញុំ បានអញ្ជើញភាគី ដែលពាក់ព័ន្ធរួមមាន តំណាងក្រសួងរ៉ែ និងថាមពល អាជ្ញាធរខេត្ត ស្រុក មន្ទីរ អង្គភាពជុំវិញខេត្ត និងតំណាងក្រុមហ៊ុន ដើម្បីពិភាក្សា ជំរុញឱ្យមានការដោះស្រាយ និងឈានទៅដល់ការអនុវត្តជាក់ស្តែង លើចំណុចដែលបានឯកភាពមួយចំនួន ដែលក្នុងនោះរួមមាន៖ (១)សកម្មភាពនៃការកិន និងការបំផ្ទុះ មិនត្រូវធ្វើហួសពីម៉ោង ៦ ព្រឹក ដល់ម៉ោង ៦ល្ងាច (២) ការស្រោចទឹកថ្នល់ជាប្រចាំ ដើម្បីបញ្ចៀសផលប៉ះពាល់ដល់ជីវភាព និងសុខភាព ប្រជាពលរដ្ឋរស់នៅ តាមដងផ្លូវ (៣) ការដឹកជញ្ជូន ត្រូវរក្សានូវគម្លាតយ៉ាងតិច ១៥០ម៉ែត្រ ពីរថយន្តមួយ ទៅរថយន្តមួយ និងដោយរក្សាល្បឿនយឺតបំផុត នៅក្នុងទីប្រជុំជន ហើយ (៤) ក្រុមហ៊ុន ត្រូវរួមគ្នាចេញបដិភាគ ជួសជុលផ្លូវ ដែលរងការខូចខាត ដោយសារការដឹកជញ្ជូនរបស់ខ្លួន។
គួររំលឹកផងដែរថា រាជរដ្ឋាភិបាលកម្ពុជា ស្វាគមន៍ចំពោះការវិនិយោគធនធានរ៉ែ ដើម្បីចូលរួមចំណែក ចំពោះតម្រូវការ នៃការអភិវឌ្ឍសេដ្ឋកិច្ច តែការប្រកបអាជីវកម្មនោះ ត្រូវគោរពតាមបទដ្ឋានបច្ចេកទេស មិនត្រូវធ្វើឱ្យប៉ះពាល់ ដល់សហគមន៍ ជីវភាព និងសុខុមាលភាព ប្រជាពលរដ្ឋឡើយ។
ក្រុមការងារ នឹងបន្តតាមដាន យ៉ាងយកចិត្តទុកដាក់បំផុត ចំពោះការអនុវត្ត នូវកិច្ចព្រមព្រៀងខាងលើ ធ្វើយ៉ាងណា ដើម្បីធានាឲ្យបាននូវភាពឈ្នះ ឈ្នះ សម្រាប់ភាគីទាំងអស់នៅក្នុងរឿងនេះ៕ ដោយ ៖ កូឡាប
