បាត់ដំបង ៖ ស្នងការដ្ឋាននគរបាលខេត្តបាត់ដំបង បានឲ្យដឹងថា ដោយសារភ្លើងប្រច័ណ្ឌបុរសវ័យចំណាស់ម្នាក់ ប្រើប្រាស់ដំបងឫស្សី វាយសម្លាប់បុរសម្នាក់ រួចអូសទម្លាក់ចូលក្នុងទឹកស្រះ នៅស្រុកកំរៀងខេត្តបាត់ដំបង ហើយត្រូវបាននគរបាលស្រាវជ្រាវរហូតឈានដល់ចាប់ខ្លួនជនសង្ស័យពីរនាក់ប្តីប្រពន្ធ ។
នៅព្រឹកថ្ងៃទី ១៧ ខែ មីនា ឆ្នាំ ២០១៩នេះ ដោយអនុវត្តនូវបទបញ្ជារបស់លោក ឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង និងដោយបានការសម្របសម្រួលលើនីតិវិធីពីលោក នួន សានព្រះរាជអាជ្ញាអមសាលាដំបូងខេត្តបាត់ដំបងផង នោះ លោកឧត្តមសេនីយ៍ត្រីជេត វណ្ណនី ស្នងការរងផែនការងារព្រហ្មទណ្ឌ បានដឹកនាំការកម្លាំងជំនាញក្នុងផែនសហការ ជាមួយកម្លាំងនគរបាលស្រុកកំរៀង ដែលមានលោកវរសេនីយ៍ឯក គឹម ពន្លក ជាអធិការនគរបាលស្រុក ធ្វើការស្រាវជ្រាវករណីឃាតកម្មគិតទុកជាមុនមួយករណី ក្នុងមូលដ្ឋានភូមិស្វាយធំ ឃុំបឹងរាំង ស្រុកំរៀងរហូតឈានទៅធ្វើការឃាត់ខ្លួន បុរសម្នាក់ និងប្រពន្ធរបស់ខ្លួនម្នាក់ទៀត ដែលជាជនជាប់សង្ស័យ ក្នុងអំពើឃាតកម្មមួយនេះ។
សូមជម្រាបជូនថា កាលពីថ្ងៃទី១៦ ខែ មីនា ឆ្នាំ២០១៩ ពលរដ្ឋបានប្រទះឃើញសាកសពបុរសម្នាក់នៅក្នុងស្រះទឹកមួយកន្លែង ស្ថិតក្នុងភូមិស្វាយធំ ឃុំបឹងរាំង ស្រុកកំរៀង ខេត្តបាត់ដំបង ដែលសាកសពបុរសនោះឈ្មោះ សំ ម៉ៅ អាយុ ៥១ឆ្នាំ រស់នៅភូមិថ្មី ឃុំត្រាង ស្រុកកំរៀង ខេត្តបាត់ដំបង ហើយនៅលើខ្លួនសាកសពមានស្លាកស្នាមរបួសដោយអន្លើ និងមានចំណងកន្សែងរឹតជាប់នឹងកផង ។ ផ្តើមចេញពីបញ្ហានេះ នគរបាលបានដាក់ការស័ង្សយ លើករណី ឃាតកម្ម ចំពោះជនងគ្រោះខាងលើ ដែលនាំទៅដល់ការស៊ើបអង្កេតយ៉ាងយកចិត្តទុកដាក់បំផុត ក្រោម បញ្ជាផ្ទាល់ពីលោកស្នងការនគរបាលខេត្តបាត់ដំបង មកដល់ថ្ងៃទី ១៧ ខែ មីនា ឆ្នាំ២០១៩ ដោយបានការយល់ព្រមពីលោក នួន សាន ព្រះរាជអាជ្ញាអមសាលាដំបូង នរបាលបានសម្រេចឃាត់ខ្លួន បុរសម្នាក់ឈ្មោះ ភេង ភាព អាយុ៥១ឆ្នាំ រស់នៅភូមិត្រាង ស្រុកកំរៀង ខេត្តបាត់ដំបង ជាប្តីនិងស្ត្រីជាប្រពន្ធឈ្មោះ សែត ភាព អាយុ ៥០ឆ្នាំ ដើម្បីធ្វើការស្រាវជ្រាវ ។
ឆ្លងតាមរយៈការស្រាវជ្រាវ ប្រមូលភស្តុតាង ជនស័ង្សយ ភេង ភាព បានឆ្លើយសារភាពថា ខ្លួន បានប្រើប្រាស់ដំបងឫស្សីវាយម្លាប់ជនរងគ្រោះឈ្មោះ សំ ម៉ៅ កាលពីយប់ថ្ងៃទី ១៤ ខែ មីនា ឆ្នាំ២០១៩ ដែលក្នុងសម្មភាពនេះ ក៏បានការចូលរួមពីប្រពន្ធខ្លួនផងដែរ ហើយមូលហេតុ ដែលឈានដល់ការវាយសម្លាប់ ជនរងគ្រោះនេះ គឺផ្តើមចេញពីភ្លើងប្រច័ណ្ឌ រវាងជនរងគ្រោះ ជាមួយប្រពន្ធរបស់ខ្លួននាពេលកន្លងទៅ ។ សូមបញ្ជាក់ជូនថា នារយ:ពេលកន្លងទៅ ជនរងគ្រោះធ្លាប់ចេញ ចូលក្នុងលំនៅដ្ឋានរបស់ជនសង្ស័យ ដោយសារតែពួកគាត់មានទីលំនៅជិតខាងគ្នា ហើយបន្តិចម្តងៗ ជនសង្ស័យបានផ្តើមគំនិតប្រច័ណ្ឌថាជនរងគ្រោះនេះ និងប្រពន្ឌខ្លួន មានទំនាក់ទំនងស្នេហាជាមួយគ្នា ហើយធ្លាប់ប្រាប់ថាឈប់ឲ្យជនរងគ្រោះចេញ ចូល ក្នុងលំនៅដ្ឋានរបស់ខ្លួនទៀត។ នៅយប់កើយហេតុ ជនរងគ្រោះមកសុំស្នាក់នៅ ក្នុងផ្ទះរបស់ជនសង្ស័យ ដោយសារជនរងគ្រោះ និងប្រពន្ធជនរងគ្រោះ មានទំនាស់ជាមួយគ្នាហើយ មិនបានអនុញ្ញាតឲ្យជនរងគ្រោះ សម្រាកនៅក្នុងផ្ទះទេ បញ្ហានេះជាឱកាសដោយស្ថិតក្នុងកំដៅនៃភ្លើងប្រច័ណ្ឌផង ជនស័ង្សយនិងជាជនដៃដល់ បានបង្កជម្លោះជាមួយជនរងគ្រោះ រហូតឈានដល់ការប្រើប្រាស់ដំបង វាយប្រហារហើយអូសទៅទម្លាក់ក្នុងទឹកស្រះមួយកន្លែងនៅក្នុងភូមិ ។
ក្នុងពេលវាយប្រហារនេះ ប្រពន្ធជនសង្ស័យ បានជួយក្រៀកអូសជនរងគ្រោះ ទៅកាន់មាត់ស្រះ និងយកកន្សែងរឹតកបន្ថែមទៀត មុនពេលទម្លាក់ចូលក្នុងទឹកស្រះ ហើយដើម្បីជាការបង្វែងដាន សមត្ថកិច្ច ជនសង្ស័យបានយកក្រដាស់សរសេរអក្សរមានន័យថា (កូនស៊ីឪពុក…..) បង្កប់នៅក្នុងកាបូបរបស់ជនរងគ្រោះ ក្នុងចេតនាទម្លាក់រឿងនេះ ទៅឲ្យកូនប្រសាប្រុស របស់ជនរងគ្រោះជាអ្នកទទួល។
ជនស័ង្សយទាំងពីរនាក់ និងវត្ថុតាងកំពុងកសាងសំណុំរឿង បញ្ជូនទៅសាលាដំបូងខេត្តបាត់ដំបង ចាត់ការតាមផ្លូវច្បាប់៕ ដោយ ៖ កូឡាប
