ខេត្តព្រះសីហនុ ៖ ថ្នាក់ដឹកនាំសាខាគយនិងរដ្ឋាករខេត្តព្រះសីហនុ បានសហការជាមួយកម្លាំងនគរបាល និងកងរាជអាវុធហត្ថ បានបន្តចុះចាប់រថយន្តអត់ពន្ធចំនួន ៣គ្រឿងទៀត យកមករក្សាទុកនៅក្នុងបរិវេណសាខាគយ និងរដ្ឋាករខេត្តព្រះសីហនុ ដើម្បីអនុវត្តនីតិវិធីតាមផ្លូវច្បាប់។
រថយន្តទាំង៣គ្រឿងនោះរួមមាន ៖
១- រថយន្តម៉ាក RANGE ROVER ពណ៌សចង្កូតឆ្វេង ពាក់ស្លាកលេខ ភ្នំពេញ 2AC 4751 (ស្លាកក្លែងក្លាយ)
២- រថយន្តម៉ាក VELLFIRE ពណ៌ស ចង្កូតឆ្វេង ពាក់ស្លាកលេខ ភ្នំពេញ 2BE 6669 (ស្លាកក្លែងក្លាយ)
៣- រថយន្តម៉ាក VELLFIRE ពណ៌សចង្កូតឆ្វេង ពាក់ស្លាកលេខ ភ្នំពេញ 2AZ 2277 (ស្លាកក្លែងក្លាយ)
មន្ត្រីសាខាគយនិងរដ្ឋាករ បានបញ្ជាក់ថា បច្ចុប្បន្ន រថយន្តអត់បង់ពន្ធទាំង ៣គ្រឿង បានយកមករក្សាទុក នៅសាខាគយ និងរដ្ឋាករខេត្តព្រះសីហនុ ដើម្បីឲ្យម្ចាស់រថយន្តទាំនេះ ចូលខ្លួនមកដោះស្រាយ ឬបំពេញបែបបទបង់ពន្ធឲ្យស្របតាមច្បាប់ពន្ធដារ និងផាកពិន័យ។
កាលពីថ្ងៃទី២១ ខែ មីនា ឆ្នាំ២០១៩ លោក ទុំ ណូ ប្រធានសាខាគយ និងរដ្ឋាករខេត្តព្រះសីហនុ បានធ្វើសន្និសីទកាសែតបង្ហាញ រថយន្តសេរីទំនើបៗ ចំនួន១៣គ្រឿង ដែលស្ថាប័នខ្លួន សហការជាមួយសមត្ថកិច្ចស្ថាប័នពាក់ព័ន្ធ ចុះស្រាវជ្រាវ និងចាប់រថយន្តរថយន្តអត់ពន្ធ ហើយបានធ្វើចរាចរណ៍នាមូលដ្ឋានខេត្តព្រះសីហនុ។
ចំពោះបញ្ហានេះ លោក ទុំ ណូ បានឲ្យដឹងថា ក្នុងត្រីមាសទី១ ដើមឆ្នាំ២០១៩ គិតត្រឹមថ្ងៃទី២៣ ខែមីនានេះ សាខាគយ និងរដ្ឋាករខេត្តព្រះសីហនុ ចាប់រថយន្តសេរីទំនើបៗអត់បង់ពន្ធសរុបចំនួន១៦គ្រឿង។ ហើយថា រថយន្តអត់ពន្ធទាំងនោះ មានទាំងចង្កូតឆ្វេង និងចង្កូតស្តាំ។
លោក ទុំ ណូ បញ្ជាក់ថា សម្រាប់រថយន្តចង្កូតឆ្វេង សាខាគយ បានផ្តល់ឱកាសដល់ម្ចាស់រថយន្តទាំងនោះ ឲ្យមកបំពេញបែបបទ សុំបង់ពន្ធ និងផាកពិន័យតាមច្បាប់ពន្ធដារ។ ប៉ុន្តែចំពោះរថយន្តចង្កូតស្តាំងវិញ គឺត្រូវដកយកទុកជាទ្រព្យសម្បត្តិរដ្ឋ ដោយមិនប្រគល់ឲ្យម្ចាស់វិញទេ។ ព្រោះថា រថយន្តចង្កូតស្តាំ គឺត្រូវបានហាមឃាត់មិនឲ្យនាំចូលបន្តទៀតទេ ចាប់តាំងពីឆ្នាំ២០១៦មកម្ល៉េះ។
លោក ទុំ ណូ ឲ្យដឹងថា ចាប់ពីចុងឆ្នាំ២០១៨ មកដល់ថ្ងៃទី២៣ ខែមីនា ឆ្នាំ២០១៩នេះ សាខាគយ និងរដ្ឋាករខេត្តព្រះសីហនុ ចាប់បានរថយន្តសេរីទំនើបមអត់បង់ពន្ធសរុបចំនួន ៣០គ្រឿង យកមករក្សាទុក ដើម្បីផាកពិន័យឲ្យស្របតាមច្បាប់ពន្ធដារ។
លោក ទុំ ណូ អះអាងថា ក្រោមការណែនាំផ្ទាល់ពីថ្នាក់ដឹកនាំ អគ្គនាយក នៃអគ្គនាយកដ្ឋានគយ និងរដ្ឋាករកម្ពុជា ព្រមទាំង ថ្នាក់ដឹកនាំ គណៈបញ្ជាការឯកភាពខេត្តព្រះសីហនុ ស្តីពីការបង្ក្រាបអំពើរត់គេចពន្ធទំនិញគ្រប់ប្រភេទ ជាពិសេសរថយន្តគេចពន្ធ គឺមន្ត្រីសាខាគយ និងរដ្ឋាករខេត្តនេះ នឹងបន្តចុះធ្វើសកម្មភាពជាប្រចាំ និងឲ្យមានប្រសិទ្ធ ដើម្បីឈានទៅប្រមូលចំណូលថវិកាជាតិ ឲ្យបានច្រើនថែមទៀតនាបណ្តាឆ្នាំខាងមុខៗ៕ ដោយ ៖ ដែន សីមា
