ភ្នំពេញ ៖ ក្រសួងធនធានទឹក និងឧតុនិយម បានជូនដំណឹងថា ឥទ្ធិពលរបស់ព្យុះទី ២៧ ឈ្មោះ តឹមប៊ិន ដែលកំពុងវាយប្រហារនៅភាគខាងកើតប្រទេសហ្វីលីពីន នឹងធ្វើដំណើរមកដល់កម្ពុជា នឹងធ្វើឲ្យមានភ្លៀងយ៉ាងខ្លាំង។
បើតាមប្រកាសរបស់ក្រសួងធនធានទឹកនៅថ្ងៃទី២១ខែធ្នូនេះ លោកលឹម គានហោ រដ្ឋមន្ត្រីក្រសួងធនធានទឹកនិងឧតុនិយម បានថ្លែងថា បន្ទាប់ពីបានធ្វើការសង្កេត តាមដានលើស្ថានភាពអាកាសធាតុ រួចមក ក្រសួងធនធានទឹក សូមជម្រាបជូនដំណឹងដល់សាធារណជនឲ្យបានជ្រាបថា វិសម្ពាធមួយដែលបានកើតឡើងនៅក្នុងមហាសមុទ្រប៉ាស៊ីហ្វិក កាលពីថ្ងៃទី១៩ខែធ្នូឆ្នាំ២០១៧ បានវិវត្តខ្លួនទៅជាព្យុះទី២៧ ឈ្មោះ តឹមប៊ិន នាម៉ោង ១រំលងអធ្រាត្រ ឈានចូលថ្ងៃទី២១ខែធ្នូ ។
បច្ចុប្បន្នព្យុះនេះកំពុងស្ថិតនៅភាគខាងជើងប្រទេសហ្វីលីពីន។ យោងតាមការព្យាករណ៍ព្យុះតឹមប៊ិននឹងធ្វើដំណើរឆ្លងកាត់ប្រទេសហ្វីលីពីន ចូលមកក្នុងសមុទ្រចិនខាងត្បូង រួចបន្តដំណើរមកកាន់តំបន់ដីសណ្តរទន្លេមេគង្គ ប្រទេសវៀតណាម។ លក្ខណៈបែបនេះ នឹងធ្វើឱ្យស្ថានភាពអាកាសធាតុនៅកម្ពុជា ចាប់ពីថ្ងៃទី ២៦ ដល់ ថ្ងៃទី ២៨ ខែធ្នូ ឆ្នាំ២០១៧ មានពពកច្រើនដេរដាស មានភ្លៀងធ្លាក់រាយប៉ាយក្នុងក្របខ័ណ្ឌស្ទើរទូទាំងប្រទេស ពីមធ្យមទៅច្រើន ពិសេសបណ្តាខេត្ត ដែលស្ថិតនៅតាមបណ្តោយព្រំដែនកម្ពុជា-វៀតណាម។ តំបន់មាត់សមុទ្រ និងនៅលើផ្ទៃសមុទ្រ ផ្ទៃមេឃមានពពកច្រើនដេរដាស មានភ្លៀងធ្លាក់ពីបង្គួរទៅច្រើន មានខ្យល់បក់បោកខ្លាំង រួមនឹងរលកសមុទ្រមានកំពស់ខ្ពស់ៗ ។
ជាមួយនឹងស្ថានភាពអាកាសធាតុបែបនេះ អាជ្ញាធរដែនដី និងប្រជាពលរដ្ឋ ពិសេសប្រជានេសាទ និងអ្នកធ្វើដំណើរតាមសមុទ្រ បង្កើនការប្រុងប្រយ័ត្នខ្ពស់ ដើម្បីចៀសវាងនូវគ្រោះថ្នាក់ផ្សេងៗ ដែលអាចកើតមានឡើងជាយថាហេតុ៕ ដោយ ៖ កូឡាប
