ភ្ញៀវ “ដែលម្ចាស់ផ្ទះពុំបានអញ្ជើញ” ក៏មកដល់ ហើយវាយផ្តួលគោមួយក្បាល រួចខាំហែកស៊ីយ៉ាងព្រងើយ។ខ្សែវីដេអូនេះត្រូវបានថតនៅ Kununurra ភាគខាងលិចអូស្ត្រាលី ថ្ងៃទី ១៥/១២កន្លងមក។ នៅលើវាលស្មៅដ៏ទូលាយមួយក្នុងឧទ្យាននៃគេហដ្ឋានរបស់ខ្លួន Julia Durack បានប្រទះឃើញវត្តមានរបស់ “ភ្ញៀវដែលពុំបានអញ្ជើញ”។
ក្រពើទឹកប្រៃមួយក្បាលមានបណ្តោយជាង ៤ម៉ែត្រ កំពុងតែខាំហែកគោ ក្នុងឧទ្យានយ៉ាងព្រងើយ។ Julia ពោលបន្តថា យើងខ្ញុំឈរមើលក្រពើស៊ីសាច់គោតែប៉ុន្មាននាទី ក៏ចាកចេញពីកន្លែងកើតហេតុនេះទៅ។
ក្រពើមានបណ្តោយជាង ៤ម៉ែត្រ Julia ឲ្យដឹងថា មុននេះមិនយូរប៉ុន្មានសេះមួយក្បាលដែលរស់នៅក្បែរនេះ ក៏ត្រូវបានក្រពើវាយប្រហារ។ រីឯខ្សែវីដេអូខាងលើត្រូវបានស្វាមីរបស់ Julia ថត ហើយបង្ហោះឡើង facebook។ អ្នកថតវីដេអូនិយាយថា គោមួយក្បាលនេះបានមកស៊ីស្មៅក្នុងឧទ្យាន ប្រហែល២ថ្ងៃប៉ុណ្ណោះ ក៏ត្រូវក្លាយជាចំណីក្រពើ។
Julia ឲ្យដឹងថា ក្រោយករណីកើតហេតុនេះ នាងបានដាស់តឿនក្រើនរំលឹកកូនៗត្រូវប្រុងប្រយ័ត្នចៀសវាងកុំទៅជិតតំបន់ដៃសមុទ្រឲ្យសោះ។ ក្រពើជាប្រភេទដ៏គ្រោះថ្នាក់ វាអាចទាញមនុស្ស ឬសត្វចុះទឹកយ៉ាងងាយបំផុត។ សូម្បីតែនៅលើគោកក្នុងរយៈចម្ងាយជិត វាក៏មានសមត្ថភាពរត់លឿនជាងមនុស្សទៅទៀត៕ សូយន
