លោកហេងឡុងបានលើកឡើងថាដោយសារតែមោទនភាពខ្លួនខ្លាំងពេកលោកផែងវណ្ណៈមិនបានបន្ទាបខ្លួនទៅចរចា ឬសម្របសម្រួលតាមការណែនាំរបស់លោកជាមួយបណ្ដាញសារព័ត៌មានហ្វ្រេសញ៊ូសនោះទេទើបរហូតដល់មានដីកាចាប់ខ្លួននិងធ្វើឲ្យប៉ះពាល់ដល់កិត្តិយសសម្តេចនាយករដ្ឋមន្ត្រី។
បន្ទាប់ពីសមត្ថកិច្ចអាវុធហត្ថរាជធានីចាប់ខ្លួនលោកផែងវណ្ណៈយោងតាមពាក្យបណ្ដឹងរបស់មេធាវីសម្ដេចហ៊ុនសែននិងយោងតាមដីកាបញ្ជាឱ្យចូលខ្លួនរបស់តំណាងអយ្យការសាលាដំបូងរាជធានីភ្នំពេញ ។ លោកហេង ឡុង ដែលជាស្វាមីរបស់អ្នកនាងចនច័ន្ទលក្ខិណានៅថ្ងៃទី 2 ខែមេសានេះ បានសរសេរលើ facebook ផ្លូវការថា” ខ្ញុំពិតជាសោកស្តាយមែនទែន ចំពោះករណីដែលបង ផែង វណ្ណៈ គាត់មិនទទួលយកការសម្របសម្រួលពីខ្ញុំ រហូតធ្វើឲ្យគាត់មោទនភាពភ្លេចខ្លួន និយាយប៉ះពាល់ទៅដល់អង្គភាពព័ត៌មាន Fresh News ដែលជាអង្គភាពព័ត៌មានធំបំផុត និងមានការគាំទ្រពីរាជរដ្ឋាភិបាលកម្ពុជា និងមហាជន ជាពិសេសបាននិយាយធ្វើឲ្យមហាជនមានការសង្ស័យទៅលើសម្ដេចតេជោ ហ៊ុន សែន ដែលលោកគ្រាន់តែជាសប្បុរសជនមួយរូប ដែលមានទឹកចិត្តជួយក្រុមគ្រួសារសពលោក កែម ឡី ដោយមានសន្តានចិត្តបរិច្ចាគថវិកា ៥ម៉ឺនដុល្លារជួយសាងសង់ចេតិយតាមការអំពាវនាវរបស់ក្រុមគ្រួសារសព”។
ចំណែកអង្គការខុមហ្វ្រែលតាមរយៈ facebook ផ្លូវការរបស់ខ្លួនក៏បានលើកឡើងថា នៅទីបំផុតនៅព្រឹកថ្ងៃទី២ ខែមេសា ឆ្នាំ២០១៩នេះលោក ផែង វណ្ណៈ ដែលជាអ្នកលេង Facebook ម្នាក់បង្កអសន្តិសុខដល់សង្គម ត្រូវបានកម្លាំងអាវុធហត្ថលើផ្ទៃប្រទេសចាប់ឃាត់ ខ្លួន ពាក់ព័ន្ធនឹងករណីបង្ហោះលើ Facebook នាំឲ្យសាធារណជនយល់ច្រឡំលោក ហ៊ុន សែន នាយករដ្ឋមន្ត្រីនៃកម្ពុជា ពាក់ព័ន្ធនឹងឃាតកម្មលើលោក កែម ឡី ៕ ដោយ ៖ កូឡាប
