ភ្នំពេញ ៖ ក្រុមប្រឹក្សាអភិវឌ្ឍន៍កម្ពុជា (CDC) បានប្រកាសថា ចាប់តាំងពីឆ្នាំ 1992 ដល់ 2018រដ្ឋាភិបាលអាល្លឺម៉ង់បានផ្ដល់ហិរញ្ញប្បទានឥតសំណងទ្វេភាគីសរុបប្រមាណជាង 600 លានដុល្លារអាមេរិក។
នាព្រឹកថ្ងៃព្រហស្បតិ៍ ១៥រោច ខែផល្គុន ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៤ ខែមេសា ឆ្នាំ២០១៩ នៅទីស្តីការក្រុមប្រឹក្សាអភិវឌ្ឍន៍កម្ពុជា បានរៀបចំកិច្ចប្រជុំអន្តរក្រសួង ត្រៀមសម្រាប់កិច្ចចរចារស្តីពីកិច្ចសហប្រតិបត្តិការអភិវឌ្ឍន៍រវាងរាជរដ្ឋាភិបាលកម្ពុជា និងរដ្ឋាភិបាលសាធារណរដ្ឋសហព័ន្ធអាល្លឺម៉ង់ ដែលនឹងប្រព្រឹត្តទៅចាប់ពីថ្ងៃទី១៤-១៦ ខែឧសភា ឆ្នាំ២០១៩ នៅទីក្រុងប៊ែកឡាំងនៃសាធារណរដ្ឋសហព័ន្ធអាលឺ្លម៉ង់ ។
ក្រុមប្រឹក្សាអភិវឌ្ឍន៍កម្ពុជា បានចេញសេចក្តីប្រកាសព័ត៌មានថា កិច្ចប្រជុំនេះដឹកនាំដោយ លោក ឈៀង យ៉ាណារ៉ា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការគណៈកម្មាធិការនីតិសម្បទា និងអភិវឌ្ឍន៍កម្ពុជានៃក្រុមប្រឹក្សាអភិវឌ្ឍន៍កម្ពុជា (គ.ជ.នា/ក.អ.ក) និងជាប្រធានគណៈប្រតិភូកម្ពុជាសម្រាប់កិច្ចចរចានេះ ដោយមានការចូលរួមពីសំណាក់លោកជំទាវ ឯកឧត្តម លោក លោកស្រី ដែលជា តំណាងជាន់ខ្ពស់ពីក្រសួង-ស្ថាប័ននៃរាជរដ្ឋាភិបាលចំនួន ៨ រួមមាន៖ ក្រសួងសេដ្ឋកិច្ច និងហិរញ្ញវត្ថុ ក្រសួងមហាផៃ្ទ ក្រសួងការបរទេស និងសហប្រតិបត្តិការអន្តរជាតិ ក្រសួងមុខងារសាធារណៈ ក្រសួងសុខាភិបាល ក្រសួងអភិវឌ្ឍន៍ជនបទ ក្រសួងផែនការ និងអង្គភាពប្រឆាំងអំពើពុករលួយ ។ គោលដៅចម្បងនៃកិច្ចប្រជុំនេះ គឺដើម្បីពិភាក្សា និងឯកភាពលើសេចក្តីព្រាងរបៀបវារៈ កំណត់ភារៈកិច្ចរបស់ក្រសួង-សា្ថប័នតាមរបៀបវារៈនីមួយៗ និងបញ្ហាផ្សេងៗ ដើម្បីត្រៀមសម្រាប់កិច្ចចរចាជាមួយភាគីមិត្តនាពេលខាងមុខ។
គួរបញ្ជាក់ផងដែរថារាជរដ្ឋាភិបាលកម្ពុជានិងរដ្ឋាភិបាលសាធារណរដ្ឋសហព័ន្ធអាល្លឺម៉ង់តែរៀបចំកិច្ចចរចាទ្វេភាគីស្ដីពីកិច្ចសហប្រតិបត្តិការអភិវឌ្ឍន៍ជារៀងរាល់ 2 ឆ្នាំម្តង ហើយកិច្ចចរចានាឆ្នាំនេះគឺជាកិច្ចចរចាលើកទ 13 ក្នុងគោលបំណងដើម្បីពង្រឹងនិងពង្រីកនូវកិច្ចសហប្រតិបត្តិការអភិវឌ្ឍន៍និងភាពជាដៃគូក៏ដូចជាដើម្បីពិភាក្សានិងឯកភាពជាលើកចុងក្រោយលើសំណើគម្រោងកម្មវិធីអភិវឌ្ឍន៍នឹងការសន្យាផ្តល់ហិរញ្ញប្បទានរបស់រាជរដ្ឋាភិបាលអាឡឺម៉ង់ដល់កម្ពុជាសម្រាប់រយៈពេល 2 ឆ្នាំ 2019 -2020 ដែលត្រូវបានធ្វើឡើងក្នុងកិច្ចប្រជុំពិគ្រោះយោបល់ទ្វេភាគីកាលពីខែវិច្ឆិកាឆ្នាំ 2018 កន្លងទៅ។ កិច្ចសហប្រតិការអភិវឌ្ឍន៍នេះផ្ដោតសំខាន់លើវិស័យអាទិភាពចំនួន 3 រួមមាន ១)វិស័យសុខាភិបាល(ការគាំពារសុខុមាលភាពសង្គមនិងសន្តិសុខស្បៀងនិងអាហារូបត្ថម្ភ) ២)វិស័យអភិវឌ្ឍន៍ជនបទ និង៣)វិស័យអភិបាលកិច្ចដែលសុទ្ធសឹងជាវិស័យអាទិភាពរបស់រាជរដ្ឋាភិបាលកម្ពុជាដូចមានចែងក្នុងយុទ្ធសាស្ត្រចតុកោណដំណាក់កាលទី 4។
បើតាមការប្រកាសរបស់ក្រុមប្រឹក្សាអភិវឌ្ឍន៍កម្ពុជា គិតចាប់តាំងពីឆ្នាំ 1992 ដល់ 2018រដ្ឋាភិបាលអាល្លឺម៉ង់បានផ្ដល់ហិរញ្ញប្បទានឥតសំណងទ្វេភាគីសរុបប្រមាណជាង 600 លានដុល្លារអាមេរិកស្មើនឹងប្រមាណ 3 ភាគរយនៃទំហំហិរញ្ញប្បទានទាំងអស់ផ្ដល់ដោយដៃគូអភិវឌ្ឍន៍មកកម្ពុជា។ ទំហំហិរញ្ញប្បទាននេះមិនរាប់បញ្ចូលហិរញ្ញប្បទានដែលភាគីអាល្លឺម៉ង់ផ្ដល់ដល់កម្ពុជាតាមរយៈគម្រោងថ្នាក់តំបន់និងសកល សហភាពអឺរ៉ុបអង្គការសហប្រជាជាតិ ស្ថាប័នហិរញ្ញវត្ថុអន្តរជាតិ និងស្ថាប័នពហុភាគីដទៃទៀត៕ ដោយ៖កូឡាប
