នគរបាលខេត្តបន្ទាយមានជ័យ បានឲ្យដឹងថា នៅព្រឹកថ្ងៃទី១៣ មេសា ២០១៩ វេលាម៉ោង ៦:៣០នាទីព្រឹក មានករណីគ្រោះថ្នាក់ចរាចរ ដ៏រន្ធត់ រថយន្ត ០២គ្រឿង បុកគ្នាពេញទំហឹង បណ្តាលឲ្យនារី ០២នាក់ ស្លាប់បាត់បង់ជីវិត និង០៣នាក់ ផ្សេងទៀត រងរបួសធ្ងន់ នៅតាមបណ្តោយផ្លូវជាតិលេខ៥ ចន្លោះគីឡូម៉ែត្រលេខ ៣៧៨-៣៧៩ ស្ថិតក្នុងភូមិកូបលិច ឃុំកូប ស្រុកអូរជ្រៅ ខេត្តបន្ទាយមានជ័យ ។
យោងតាមរបាយការណ៍ សមត្ថកិច្ច បានឱ្យដឹងថា អ្នកបើបររថយន្ត សាំយ៉ុង មានឈ្មោះ សារ ភេទប្រុស រស់នៅស្រុកម៉ោងឬស្សី ខេត្តបាត់ដំបង រថយន្តសាំយ៉ុង ពណ៌ស ពាក់ស្លាកលេខកណ្តាល ២A-០៣៩២ បើកបរ មានគោលដៅពីទិសខាងលិច ទៅទិសខាងកើត អ្នករួមដំណើរ១នាក់ មានឈ្មោះ ចិត្រ សម្ព័ន្ធ អាយុ៤៨ឆ្នាំ ភេទប្រុស រស់នៅភូមិក្តុល ឃុំក្រាំងស្គារ ស្រុកទឹកផុស ខេត្ត កំពង់ឆ្នាំង របួសធ្ងន់ បានបញ្ចូនទៅមន្ទីពេទ្យបង្អែកស្រុកមង្គលបូរី ។
ចំណែកឯរថយន្ត វីសស្តូ ពណ៌ស ពាក់ស្លាក់លេខ ២T. ៦៧៣២ ភ្នំពេញ ដែលមានឈ្មោះ កែវ សុភ័ត្រា អាយុ២៣ឆ្នាំ ភេទស្រី នៅភូមិប៉ាលិលេយ្យ១ សង្កាត់និងក្រុងប៉ោយប៉ែត ខេត្តបន្ទាយមានជ័យ ស្លាប់ ជាអ្នកបើកបរ មានគោលដៅ ពីទិសខាង កើត ទៅទិសខាង លិច អ្នករួមដំណើរ០២នាក់ ស្រី១នាក់ ដែលមានឈ្មោះ ១. ឈ្មោះ យ៉ុត ម៉ៃ អាយុ១៩ឆ្នាំ ភេទស្រីនៅភូមិប៉ាលិលេយ្យ១ សង្កាត់និងក្រុងប៉ោយប៉ែត ស្លាប់។ ២ ឈ្មោះ កែវសុខ បញ្ញា អាយុ២៥ឆ្នាំ ភេទប្រុស នៅភូមិប៉ាលិលេយ្យ១ សង្កាត់និងក្រុងប៉ោយប៉ែត រងរបួសធ្ងន់ បានបញ្ចូនទៅមន្ទីរពេទ្យ ស្រុកមង្គលបូរី ដើម្បីធ្វើការសង្គ្រោះ។
បច្ចុប្បន្ន រថយន្តទាំងពីរគ្រឿង និង សំភារះយកមករក្សាទុក នៅកន្លែងអធិការនគរបាលស្រុកអូរជ្រៅ ជាបណ្តោះអាសន្ន៕ ដោយ ៖ បញ្ញាស័ក្តិ
