កណ្តាល៖ ប៉ុស្តិ៍នគរបាលរដ្ឋបាលព្រែកតាកូវ ស្រុកខ្សាច់កណ្តាល នៅថ្ងៃទី១៨ មេសា ២០១៩ បានឲ្យដឹងថា មានករណីឆក់ត្រី (ឆក់ខ្លួនឯងស្លាប់) ដោយបុរសម្នាក់ ត្រូវ អ្នកជិតខាងប្រទះឃើញអណ្ដែតទឹក ខណៈដែលបុរសរងគ្រោះទៅឆក់ត្រីឆក់ខ្លួនឯងស្លាប់ ពេលផឹកស្រារួចជិះទូកទៅឆក់ត្រី។
កើតហេតុថ្ងៃព្រហស្បតិ៍ ១៤ កើត ខែ ចេត្រ ឆ្នាំកុរ ឯកស័ក ព.ស ២៥៦៣ ត្រូវនិងថ្ងៃទី១៨.០៤.២០១៩ វេលាម៉ោង ៧និង០០ នាទី នៅចំណុចបឹងកិច្ច ភូមិព្រែកល្វា ឃុំព្រែកតាកូវ ស្រុកខ្សាច់កណ្តាល ខេត្តកណ្តាល។
ជនរងគ្រោះ ០១ នាក់ ឈ្មោះ អឿន ចាន់ថន ហៅ ម៉ាប់ ភេទប្រុស អាយុ ៣៤ ឆ្នាំ ជនជាតិ ខ្មែរ មុខរបរ កម្មកររោងចក្រ មានទីលំនៅភូមិ ព្រែកល្វា ឃុំ ព្រែកតាកូវ ស្រុក ខ្សាច់កណ្តាល ខេត្តកណ្តាល និងមានប្រពន្ធឈ្មោះ ម៉ាឡៃ អាយុ ២៥ ឆ្នាំ មុខរបរ កម្មកររោងចក្រ មានកូន ០២ នាក់ប្រុស ។ វត្ថុតាងចាប់យក អាគុយចំនួន ០១ គ្រាប់ កម្លាំង ៤០ អំពែដុំឆក់ចំនួន ០១ ដងឆក់ធ្វើពីឬស្សី ចំនួន ០១ ។
នៅថ្ងៃទី ១៧មេសា២០១៩ វេលាម៉ោង ២១និង០០នាទីជនរងគ្រោះបានផឹកស្រាជាមួយអ្នកជិតខាង ។ រហូតដល់វេលាម៉ោង ២និង០០ នាទី រំលងអធ្រាត្រឈានចូលថ្ងៃទី១៨មេសា២០១៩ ជនរងគ្រោះបានទៅយកឧបករណ៍ឆក់ត្រីពីក្នុងផ្ទះរបស់ខ្លួន ហេីយជិះទូកតែម្នាក់ឯងឆ្ពោះទៅឆក់ត្រី នៅបឹងកិច្ច ។
ដល់វេលាម៉ោង ៧និង០០ នាទី ព្រឹកថ្ងៃដដែលឈ្មោះហម ថា ភេទ ប្រុស អាយុ ៤៥ ឆ្នាំ រួមនិងឈ្មោះអយ អឿន ឈ្មោះកាន គីម បាននាំគ្នាទៅហ៊ុមសម្រះ នៅបឹងកិច្ចនោះដែរ ។ ពេលទៅដល់បឹង ឃើញ អាគុយ ដុំឆក់ នៅលើទូក និងឃើញដងឆក់អណ្តែតក្នុងទឹក ពេលនោះឈ្មោះហម ថា បានទៅមើលហើយឃើញឈ្មោះអឿន ចាន់ថន ស្លាប់នៅក្នុងទឹកដៃកាន់ដងឆក់ជាប់ ពេលនោះឈ្មោះហម ថា បានប្រាប់បងប្អូនរបស់ជនរងគ្រោះ ព្រមទាំងរាយការណ៍ជូនសមត្ថកិច្ចនគរបាលប៉ុស្តិ៍ព្រែកតាកូវ ហេីយក្រុមគ្រួសារបានស្រង់សាកសពជនរងគ្រោះយកមកផ្ទះ ។
បន្ទាប់មកសមត្ថកិច្ចជំនាញសហការជាមួយ កម្លាំងនគរបាលប៉ុស្តិ៍ព្រែកតាកូវ ក្រុមប្រឹក្សាឃុំ មេភូមិ គ្រូពេទ្យ និងក្រុមគ្រួសារសព ពិនិត្យសាកសពដោយហ្មត់ចត់ ឃើញមានស្លាកស្នាម ស្លោកនៅម្រាមដៃឆ្វេង ក្រៅពីនេះពុំមានស្លាកស្នាមអ្វីគួរឲ្យកត់សម្គាល់ឡើយ និងបានប្រគល់សាកសពជូនក្រុមគ្រួសារធ្វើបុណ្យតាមប្រពៃណី ៕ ដោយ៖កូឡាប
